Ora Bo Ta Sinti Ku Bo No Por Sigui Biba Mas

Adriana di Brazil a atmití: “Tur ora mi tabata sinti mi masha angustiá, p’esei mi a pensa ku lo ta mihó pa mi kaba ku mi bida.”

BO A yega di sinti bo asina malu ku bo no kier a biba mas? E ora ei lo bo por komprondé kon Adriana a sinti. El a sufri di ansiedat severo i tabata sintié tristu i desesperá. Adriana a haña sa ku e tin depreshon.

Laga nos wak tambe e ehèmpel di un hòmber hapones ku yama Kaoru, kende tabata kuida su mayornan enfermo di edat avansá. El a splika: “E tempu ei, mi tabata sinti mi agotá debí na hopi preshon na trabou. Ku tempu, mi a pèrdè mi apetit i no por a drumi bon mas. Mi a kuminsá pensa ku lo ta un alivio si mi djis muri.”

Un hòmber nigeriano ku yama Ojebode a bisa: “Tur ora mi tabata sinti mi tristu, i mi tabata yora pa kualke kos. P’esei mi a buska un manera pa kaba ku mi bida.” Afortunadamente, Ojebode, Kaoru i Adriana no a mata nan kurpa. Pero tur aña, sientos di míles di hende ta kometé suisidio.

KEN POR YUDA BO?

Hende hòmber ta esnan ku mas ta kometé suisidio. Mayoria di nan tabatin bèrgwensa pa pidi yudansa. Hesus a bisa ku hende ku ta malu mester di dòkter. (Lukas 5:31) Pues, si bo ta sinti bo asina deprimí ku bo ta pensa pa kaba ku bo bida, por fabor, no sinti bèrgwensa pa pidi yudansa. Hopi hende ku ta sufri di depreshon a haña tratamentu médiko ku a yuda nan. Ojebode, Kaoru i Adriana a haña yudansa médiko, i awor nan tambe ta sinti nan hopi mas mihó.

Tin biaha dòkter ta rekomendá pa usa remedi òf pa papia ku un terapista òf pa hasi tur dos kos pa trata ku depreshon. Hende ku ta sufri di depreshon tin mester tambe di famia i amigu ku ta sostené nan, tene pasenshi ku nan i komprondé nan. E mihó amigu ku nos por tin ta Yehova Dios, kende ta perkurá yudansa pa nos den Beibel.

TIN UN SOLUSHON PERMANENTE?

Hende ku ta sufri di depreshon hopi biaha mester haña tratamentu médiko pa un periodo largu i kisas mester hasi sierto kambio den nan bida. Pero si bo ta sufri di depreshon, bo por pensa riba e futuro maravioso ku tin nos dilanti. Esei ta loke Ojebode a hasi. El a bisa: “Mi ta spera ansiosamente riba kumplimentu di Isaías 33:24, ku ta bisa ku lo yega e dia ku niun hende riba tera lo bisa ‘mi ta malu.’” Meskos ku Ojebode, e promesa di Dios di un “tera nobo,” kaminda lo no tin “doló” mas, por konsolá nos. (Revelashon 21:1, 4) E promesa ei ta nifiká tambe ku lo no tin niun problema emoshonal ni mental mas. Bo sintimentunan ku ta kousa doló lo disparsé pa semper i “lo no wòrdu rekordá mas ni bini na memoria.”—Isaías 65:17.

Teksto di Beibel Ku Por Yuda Bo

Dios ta komprondé loke bo ta sinti.

“Ami ta SEÑOR bo Dios, kende ta sostené bo man drechi, kende ta bisa bo: ‘No tene miedu, lo mi yuda bo.’”—Isaías 41:13.

Yehova ta komprondé loke nos ta sinti mas mihó ku kualke otro hende, i e ke yuda nos.

Meditá riba e Palabra di Dios.

“[Elías] a pidi pa e muri, i a bisa: ‘ . . . O SEÑOR, tuma mi bida.’”—1 Reinan 19:4.

Ojebode a bisa: “Mi a meditá riba Beibel, i esei a yuda mi. Mi a realisá ku profeta Elías a sinti meskos ku mi.”

Siña for di e ehèmpelnan ku tin den Beibel.

“Mi [Hesus] a supliká Dios pa bo [Pedro], pa bo fe no debilitá.”—Lukas 22:32.

Despues ku apòstel Pedro a nenga Hesus tres biaha, el a sinti ku e no tabata por mas i a kuminsá yora amargamente. Kaoru a bisa: “Pedro su eksperensia a yuda mi mira ku Yehova i Hesus a komprondé loke Pedro a sinti, i esei a animá mi.”

Bo sintimentunan ku ta kousa doló lo disparsé pa semper i “lo no wòrdu rekordá mas ni bini na memoria.”—Isaías 65:17