Ofreciendo Nos Mes di Buena Gana

¹ E salmista David a profetisá cu Jehova su pueblo “lo ofrecé nan mes di buena gana”; esta, manera “boluntarionan cu ta cla pa respondé.” (Sal. 110:​3, nota) Esaki siguramente ta ser cumplí entre nos asociacion mundial di ruman. Durante cada un dje último cuater añanan di sirbishi, Jehova su pueblo a dedicá mas cu mil miyon ora na plama e bon nobo di Reino. I tin hopi manera mas, aparte di e trabou di predicá i di haci disipel, den cua nos por ofrecé nos mes di buena gana pa yuda otronan.

² Maneranan cu Nos Por Mustra Nos Buena Gana: Algun ruman den e congregacion kisas tin mester di yudansa pa yega n’e reunionnan. Pakico no ofrecé boluntariamente pa abo bin cu nan? Otro rumannan por ta malu, limitá debí na mal salú of edad avansá of hospitalisá. Lo bo por tuma e iniciativa pa bishitá nan of pa ser un yudansa den un of otro manera? Por tin un persona of un famia cu tin mester di animacion. Bo a pensa di extendé un invitacion na rumannan asina pa sinta den bo studio di famia de bes en cuando? Un pionero of un publicador kisas tin mester di un compaño den e ministerio. Pakico no ofrecé pa traha huntu den sirbishi? Esakinan ta algun dje maneranan den cua nos por obra boluntariamente loke ta bon pa cu esnan relacioná cu nos den e fe.​—⁠Gal. 6:⁠10.

³ Ruman hombernan por mustra nan buena gana pa ser usá den Jehova su organisacion dor di haci esfuerso pa tin e cualificacionnan necesario pa anciano i sirbidor ministerial. (1 Tim. 3:​2-10, 12, 13; Tito 1:​5-9) Segun cu nos ta sigui crece na cantidad, tin mester di ruman hombernan cualificá cu ta dispuesto pa hiba delantera den predicá i siña i den pastoreá e congregacionnan.​—⁠1 Tim. 3:⁠1.

⁴ Kisas algun di nos por haci nos mes disponibel na un mayor grado p’e sirbishi di Jehova dor di inscribí de bes en cuando como pionero auxiliar. Tambe, cu un par di ahuste razonabel den nos orario, kisas nos lo por traha pionero auxiliar continuamente of asta drenta den e sirbishi di pionero regular. Nos circunstancianan ta permití nos muda pa un área caminda tin mayor necesidad di yudansa? Nos lo por haci nos mes disponibel pa sirbi na Betel i dje manera ei contribuí directamente den e progreso dje trabou mundial? Hopi ta ser hací tambe pa loke ta construccion di Salonnan di Reino, Salonnan di Asamblea i edificionan di sucursal rond mundu, caminda tin hopi mester di trahadornan boluntario. Esnan cu a ofrecé nan mes pa e obranan excelente aki ta ser apreciá mashá i nan a ser bendicioná ricamente!​—⁠Luc. 6:⁠38.

⁵ Esaki ta un tempu emocionante. Mediante su spiritu, Jehova ta efectuando un trabou maraviyoso riba tera cu su pueblo boluntario! Ki ora cu Jehova, mediante su organisacion, extendé un invitacion pa participá den mayor actividad di Reino, nos ta haci bon di puntra nos mes, ‘Ainda mi ta ofreciendo mi mes di buena gana?’ Anto huntu cu oracion nos mester examiná nos curason i circunstancianan. Nos debocion piadoso lo impulsá nos pa haci tur loke nos por den sirbishi sagrado, dje manera ei haciendo Jehova su curason masha contentu!​—⁠Sof. 3:⁠17.