Memorial—Un Evento di Gran Importancia!
1 Riba diadomingo, 23 di mart, despues cu solo baha, nos lo celebrá e memorial di Cristo su morto. (Luc. 22:19) Esaki di berdad ta un evento di gran importancia! Dor di mantené su integridad na Jehova te na morto, Jesus a duna prueba cu ta posibel pa un hende mantené debocion piadoso perfectamente asta bou di tension severo, sosteniendo asina e legitimidad di Jehova su soberania. (Heb. 5:8) Ademas, e morto di Cristo a percurá e sacrificio humano perfecto cu tabata necesario pa rescatá humanidad, haciendo posibel cu esnan cu ehercé fe por biba pa semper. (Juan 3:16) Dor di ta presente na e Memorial, nos por demostrá nos aprecio sincero tantu pa e amor di Jehova como pa e sacrificio di Jesus pa nos.
2 Tur ruman ta ser animá pa sigui e programa di lesamentu di Bijbel cu ta programá pa 18-23 di mart, manera e ta aparecé riba e calender di Testigonan di Jehova pa 1997. Tambe, un consideracion den famia di capítulonan 112-16 dje buki E homber mas importante cu hamás a biba lo yuda enfocá nos atencion riba e siman mas importante den historia humano.
3 Bo por aumentá e tempu cu bo ta dedicá n’e ministerio di veld durante e temporada di Memorial? Hopi publicador lo probechá plenamente dje cincu fin di simannan den mart pa sirbi como pionero auxiliar. Pakico no incluí bo den nan? Nos tur por tin un pleno participacion den enfatisá e importancia di asistí n’e Memorial. Como cu e ta cai riba un diadomingo, lo ta mas fácil pa hopi hende asistí. Haci sigur di invitá tur studiante di Bijbel i otro personanan interesá pa djoin nos. Compartí cu nan loke ta ser bisá na página 127, §18, dje buki Conocimentu relacioná cu e solo dia di aña cu specialmente tin cu ser observá.
4 Mantené un aprecio profundo pa tur loke Jesus su morto ta nificá pa nos, segun cu nos ta acercá e evento di mas grandi di 1997. Sea presente e anochi di 23 di mart, ora cu cristiannan berdadero na tur parti ta observá e Memorial fielmente.