“Sigui Hasi Esaki” Memorial Lo Ta Dia 5 di Aprel
1. Dikon ta importante pa asistí na Memorial?
1 Promé ku Hesus a ofresé su bida komo reskate pa humanidat, el a bisa su siguidónan: “Sigui hasi esaki na mi memoria.” (Luk. 22:19) Sí, el a manda nan pa konmemorá su morto. Debí na tur loke e reskate a logra, Memorial ta e dia di mas importante di aña pa un kristian. E aña akí e ta kai riba 5 di aprel. Kon nos por mustra Yehova nos gratitut segun ku e fecha akí ta aserkando?—Kol. 3:15.
2. Kon nos por mustra mediante estudio i meditashon ku Memorial ta importante pa nos?
2 Prepará: Por lo general, nos ta prepará pa un evento ku nos ta konsiderá importante. Pa loke ta Memorial, nos por prepará nos kurason ora nos studia huntu komo famia e susesonan ku a tuma lugá promé ku Hesus su morto i meditá riba esakinan. (Èsd. 7:10, NW) Nos por haña algun teksto ku ta trata e susesonan akí tantu riba nos kalènder komo den e Teksto di Dia. Pero pa un lista di teksto mas kompleto, huntu ku e kapítulonan korespondiente for di e buki E homber mas importante, wak E Toren di Vigilansia di 1 di febrüari 2011, página 17 i 18.
3. Kon nos por mustra pa medio di nos predikashon ku Memorial ta importante pa nos?
3 Prediká: Un otro manera ku nos por mustra ku Memorial ta importante pa nos ta ora nos sali mas den sirbishi. (Luk. 6:45) Entrante djasabra 17 di mart, nos lo kuminsá ku un kampaña mundial pa invitá hende na Memorial. Bo por ahustá bo programa pa traha mas den sirbishi, kisas komo pionero ousiliar? Dikon no trese esaki dilanti durante boso siguiente anochi di Adorashon Komo Famia?
4. Ki benefisionan nos ta haña ora nos asistí na Memorial?
4 Tur aña di nobo nos asistensia na Memorial ta benefisiá nos den vários manera. Ora nos reflekshoná riba kon Yehova generosamente a manda su Yu unigénito komo reskate, nos kurason ta yena di goso i un gran amor p’e. (Huan 3:16; 1 Huan 4:9, 10) Esaki ta duna nos e deseo di no biba mas pa nos mes. (2 Kor. 5:14, 15) I tambe nos ta haña mas gana di alabá Yehova públikamente. (Sal. 102:19-21) Sí, komo sirbidónan gradisidu di Yehova, nos ta spera ansiosamente e oportunidat ku e Memorial di dia 5 di aprel ta duna nos pa “proklamá e morto di Señor.”—1 Kor. 11:26.