Caha Di Pregunta

◼ Ora pidi e congregacion pa yuda den haci areglo pa un entiero, e siguiente preguntanan por lanta:

Ken mester duna e discurso di entiero? Esaki ta un decision cu miembronan di famia mester tuma. Nan por scoge cualkier ruman homber bautisá cu ta den posicion aprobá. Si pidi e cuerpo di anciano pa percurá un orador, nan generalmente lo scoge un anciano competente pa duna un discurso basá riba e boskeho di Sociedad. Aunke lo no elogiá e defuntu di mas, lo por ta apropiado pa hala atencion na cualidadnan ehemplar cu el a desplegá.

Por usa e Salon di Reino? Por us’é si e cuerpo di anciano duna permiso pa esei i e no ta interferí cu un reunion programá normalmente. Por usa e salon si e defuntu tabatin un bon reputacion i tabata un miembro dje congregacion of e yu menor di edad di un miembro. Si e individuo a causa hopi papiamentu den e comunidad dor di conducta no-cristian, of si otro factornan ta existí cu lo por reflehá desfaborablemente riba e congregacion, e ancianonan lo por dicidí pa no duna permiso pa usa e salon.—Mira e buki Nos Ministerio, página 62-3.

Normalmente, no ta usa Salonnan di Reino pa entieronan di incrédulonan. Por haci un excepcion si miembronan di famia cu a keda tras ta activamente asociá como publicadornan bautisá, si e defuntu tabata conocí cerca suficiente publicador den e congregacion pa tabatin un actitud faborabel pa cu e berdad i un bon reputacion di conducta recto den e comunidad, i si ningun custumber mundano ta ser incorporá den e acto di entiero.

Ora di otorgá uso dje Salon di Reino, e ancianonan lo considerá si ta e custumber di tin e caha di morto presente n’e entiero. Si ta asina, nan lo por permitié den salon.

Kico di entieronan pa hende mundano? Si e defuntu tabatin un bon reputacion den e comunidad, un ruman homber lo por duna un discurso bíblico consolador na e cas mortuorio of na santana. E congregacion lo nenga di areglá un entiero pa un persona cu tabata conocí pa conducta inmoral i ilegal of kende su estilo di bida tabata gravemente na conflicto cu principionan bíblico. Un ruman homber siguramente lo no participá huntu cu un miembro di clero den conducí un servicio ecuménico ni den ningun entiero efectuá den un iglesia di Babilonia e Grandi.

Kico si e defuntu tabata scomulgá? E congregacion generalmente lo no ta enbolbí, ni lo no usa e Salon di Reino. Si e persona tabata dunando evidencia di repentimentu i a manifestá un deseo di ser restorá, e concenshi di un ruman homber kisas ta permitié duna un discurso bíblico na e cas mortuorio of na santana, pa duna un testimonio na incrédulonan i pa consolá e parientenan. Sin embargo, promé cu tuma e decision aki, lo ta sabí pa e ruman homber consultá cu e cuerpo di anciano i duna consideracion na loke nan kisas ta recomendá. Den situacionnan caminda lo no ta sabí pa e ruman homber ei ser enbolbí, kisas ta apropiado pa un ruman homber cu ta un miembro dje defuntu su famia duna un discurso pa consolá e parientenan.

Por haña mas instruccion den e edicionnan di Atalaya di 15 di october, 1990, página 30-1; 15 di november, 1981, página 25 (w81-E 15/9 31); 15 di augustus, 1980 (w80-E 15/3), página 5-7; 15 di october, 1978 (w78-E 1/6), página 5-8; 15 di october, 1977, página 634-5 (w77-E 1/6 347-8); 1 di juli, 1970, página 414-5 (w70-E 15/3 191-2); i ¡Despertad! di 8 di september, 1990, página 22-3 i 22 di augustus, 1977 (g77-E 22/3), página 12-15.