E Porta Grandi na Actividad Ta Habrí
1 Como un predicadó celoso dje bon nobo, Pablo a busca ansiosamente pa haña teritorionan caminda e necesidad tabata mas grandi. Un di nan tabata e stad Efeso. E tabatin asina tantu éxito predicando ei cu el a skirbi compañeronan cristian: “Un porta grandi cu ta hiba na actividad a ser habrí pa mi.” (1 Cor. 16:9) Pablo a sigui sirbi den e teritorio ei i a yuda hopi efesio bira creyente.—Echo. 19:1-20, 26.
2 Awe, un porta grandi cu ta hiba na actividad a habri pa nos. Nos ta ser invitá pa yuda congregacionnan cu no por traha tur nan teritorio cabalmente tur aña. Dje manera ei nos esfuersonan por compensá e necesidad cu ta existí den cierto áreanan.—Compará cu 2 Corintionan 8:13-15.
3 Bo Por Sirbi Caminda Tin Mas Necesidad? Bo a yega di considerá, huntu cu oracion, e posibilidad pa sirbi otro caminda? Kisas lo bo por yuda un congregacion den bo mes stad. Pakico no papia cu e superintendente di circuito tocante e asuntu i mira kico e ta sugerí? Of por ta cu den e teritorio di bo mes congregacion tin un gran cantidad di hende di otro idioma of hende surdu, pa ken te ainda ningun hende por a percurá. Lo bo kier haci un esfuerso pa siña nan idioma pa asina satisfacé e necesidad aki? Ademas, tal bes tin un grupo of congregacion caba di otro idioma cerca di bo cu tabata ‘rogando e Doño pa mas trahadó di Reino.’ (Mat. 9:37, 38) Si ta asina, lo bo por yuda?
4 Den e último décadanan, miles di famia cristian a muda bai otro pais pa por participá mas plenamente den e trabou di cosecha. Un pareha cu a haci esaki a bisa: “Nos tabata kier a sirbi Jehova caminda nos por tabata mas útil.” Si bo tin e deseo aki i bo tin e posibilidad pa muda bai otro caminda den e pais aki of si bo ta cualificá pa sirbi den un otro pais, papia promé cu e ancianonan di bo congregacion tocante bo plannan.
5 Si bo ta deseá di pidi informacion cerca Sociedad tocante unda tin necesidad, entregá un carta na e Comité di Sirbishi di Congregacion specificando bo deseo. Nan lo incluí nan comentarionan i mand’é pa Sociedad. Pero en todo caso, tanten cu e porta grandi di actividad permanecé habrí, laga nos tur keda ocupá den e sirbishi di Jehova.—1 Cor. 15:58.