Si E Ta Duna Resultado, Us’é!
1 Nos Ministerio di Reino ta duna nos continuamente un variedad di sugerencia pa haci presentacion den e ministerio. Esaki ta duna nos ideanan nobo en cuanto con pa lanta interes den e mensahe di Reino. Por ta cu tur luna bo ta haci un esfuerso pa siña un of mas dje presentacionnan aki. Sin embargo, algun publicadó kisas ta ripará cu pa ora nan a usa un di nan un par di biaha, un otro edicion di Nos Ministerio di Reino ta duna presentacionnan nobo. Ta obvio cu tal bes no ta posibel pa tur hende siña un presentacion nobo promé cu e ta dominá esun anterior.
2 Naturalmente tin miles di pionero i otro publicadónan cu ta pasa hopi tempu den sirbishi di veld. Ademas, hopi congregacion ta traha henter nan teritorio cada tantu siman. Den e circunstancianan aki, publicadónan ta apreciá di tin introduccion i ideanan nobo pa presentá e mensahe. Esaki ta yuda nan mehorá nan abilidadnan. Tambe esei ta haci nan ministerio mas interesante i fructífero, i ta yuda nan enfrentá e desafionan cu nan ta topa.
3 Sea cual sea bo caso, si bo a prepará un presentacion cu ta eficas den lanta interes, sin falta sigui us’é! No ta necesario pa stop di usa un presentacion eficas cu ta duna bon resultado. Simplemente adapt’é n’e oferta di literatura p’e luna coriente. Ora bo ta repasá e sugerencianan cu Nos Ministerio di Reino ta ofrecé, busca puntonan interesante cu bo ta deseá di incluí den bo presentacion.
4 Pues ora bo ricibí un edicion nobo di Nos Ministerio di Reino, corda cu e presentacionnan cu e ta contené ta simplemente sugerencianan. Si bo por usa nan, bon. Pero si ya caba bo a haña un presentacion cu ta duna resultado den bo teritorio, us’é! E cos importante ta pa “cumpli cu bo ministerio plenamente” den un manera excelente, hañando esnan cu ta merecedor i yuda nan bira disipel.—2 Tim. 4:5.