Siña Conocé Bo Rumannan
1 Bijbel ta describí un berdadero amigu como un persona cu ta mas pegá cu un ruman, cu ta constante den su amor i lealtad, i cu ta sali pa yuda su compañero den tempu di angustia. (Pro. 17:17; 18:24) Amigunan asina lo no haci falta den e congregacion si nos haci esfuerso pa siña conocé i stima otro.—Juan 13:35.
2 Tin bon oportunidad pa familiarisá cu nos rumannan tantu promé como despues dje reunionnan. Pakico no yega trempan i keda un poco mas despues di reunion pa bo por disfrutá di asociacion caluroso i animador? Busca diferente ruman pa combersá cuné, incluso esnan mas grandi cu tin experencia i esnan mas yong of tímido.
3 Cuminsá Combersacionnan: Bai mas leu cu djis saludá bo rumannan den careda. Bo por cuminsá un combersacion dor di compartí un experencia di sirbishi di veld, un punto di interes den un revista nobo, of un comentario tocante e reunion cu a caba di terminá. Bo por siña hopi di bo rumannan dor di ser un bon scuchadó, animando nan pa papia tocante nan experencianan i cosnan cu nan ta siñando. Djis puntra un ruman con el a yega na conocé Jehova por revelá hopi cos. Algun a pasa dor di experencianan fortalecedor di fe den nan bida, miéntras cu otronan ta wantando situacionnan awor aki mes cu lo por ta duru pa hopi di nos imaginá. Ora nos realisá esaki, nos lo ta mihó ekipá como berdadero amigu pa comprendé e necesidadnan di otro rumannan i ser dispuesto pa yuda nan.
4 Bira Amigu di Otro: Despues di morto di yu di un ruman muher, el a haña cu tabata difícil pa canta canticanan di Reino cu ta mencioná resureccion. E ta corda: “Un biaha, un ruman muher cu tabata sintá den un otro rij a wak mi ta yora. El a bini cerca mi, a pone su brasa rond di mi, i a canta e resto dje cantica huntu cu mi. Mi a sintí mi asina yená cu amor p’e rumannan i asina contentu cu nos a bai n’e reunionnan, realisando cu ta ei nos yudansa ta, ei na Salon di Reino.” Nos mester bira amigu di nos rumannan dor di ofrecé nan consuelo ora ta necesario i duna nan animacion tur ora.—Heb. 10:24, 25.
5 Segun cu e mundu bieu aki ta bira mas i mas opresivo, laga nos determiná pa siña conocé nos rumannan mihó. E intercambio di estímulo genuino aki lo resultá di ta un bendicion pa nos tur.—Rom. 1:11, 12.