Maneranan pa Expandé Bo Ministerio
1 Mas cu 40 aña pasá, a aparecé un artículo den E Toren di Vigilancia na ingles di 15 di januari 1955 titulá “Bo Ta Haciendo Bo Best?” Den un forma amoroso e artículo a señalá con e pueblo di Jehova lo por mehorá nan esfuerso individual den e ministerio pa asina nan por aumentá nan actividad di Reino. E bon conseho ei ta aplicá awe tambe, miéntras cu nos ta sigui haci nos best asta mas mihó.
2 Tur nos sirbishi mester ta motivá dor dje mandamentu di mas grandi: “Bo tin cu stima Jehova bo Dios cu henter bo curason i cu henter bo alma i cu henter bo mente i cu henter bo forsa.” (Mar. 12:30) Nos ta demostrá nos amor completo pa Jehova dor di haci pleno uso dje oportunidadnan cu tin disponibel pa nos adelantá su obra di Reino. Considerá e siguiente maneranan cu lo bo por expandé bo ministerio.
3 Carga Bo Responsabilidad: Ruman hombernan dedicá por haci esfuerso pa cualificá como sirbidó ministerial i despues progresá pa sirbi como anciano. E artículonan “Bo Ta Purba Bai Dilanti?” i “Bo Ta Capacitá pa Sirbi?,” den e edicion di 1 di september 1990 di La Atalaya, a motivá hopi ruman pa haci nan mes disponibel pa responsabilidadnan di congregacion. Pidi bo ancianonan local duna bo sugerencianan specífico tocante con pa bai dilanti i bira cualificá.
4 Nos ta invitá anciano i sirbidónan ministerial cu ta soltero pa pensa seriamente riba aplicá p’e Scol di Entrenamentu Ministerial. Bo por familiarisá bo mes cu e scol aki dor di lesa e referencianan bou di “Escuela de Entrenamiento Ministerial” [na ingles, Ministerial Training School] den e Watch Tower Publications Index pa 1986-1995, 1996 i 1997. Bo ta mira e ‘porta grandi di actividad’ habri bo dilanti? (1 Cor. 16:9a) Hopi ruman homber cu a pasa dor dje porta ei, no a imaginá nan mes nunca cuantu privilegio di sirbishi tin n’e otro banda. Awe nan tin e goso di sirbi na Betel of den veld, como pionero special, misionero of superintendente di circuito.
5 Purba Alcansá e Sirbishi di Tempu Completo: Hóbennan cu ta cabando scol secundario, amanan di cas i ken cu a yega edad di baha cu penshon, mester pensa seriamente riba e trabou di pionero. Repasá e suplemento den Nos Ministerio di Reino di juli 1998, anto papia cu pioneronan kende nan circunstancianan di bida ta similar na di bo. Por ta cu lo bo ser motivá pa expandé bo ministerio dor di traha pionero, mescos cu nan ta haciendo. (1 Cor. 11:1) Lo ta posibel pa bo expandé bo actividad na 70 ora pa luna i asina sirbi como pionero regular?
6 Awor tin mas cu 17.000 ruman ta sirbi den oficina di sucursal i casnan di Betel rond mundu. Nos Ministerio di Reino di mart 1995 ta trata loke ta rekerí pa bo por aplicá p’e sirbishi ei. Pakico no lesa e suplemento ei i wak si bo no ta un di esnan cu por cualificá pa e privilegio único di sirbishi di Betel?
7 Sirbi Caminda e Necesidad Ta Mas Grandi: Bo ta biba caminda ta traha e teritorio cu hopi frecuencia of caminda tin hopi ruman homber pa carga responsabilidad? Bo a pensa riba expandé bo ministerio dor di muda bai caminda e necesidad ta mas grandi? Podisé bo por muda bai pafó di stad, caminda tin mester di mas trahadó. (Mat. 9:37, 38) No mester haci esaki purá-purá. E ta merecé consideracion compañá pa oracion. (Luc. 14:28-30) Papia cu e ancianonan i cu e superintendente di circuito tocante bo situacion. Nan lo razoná cu bo pa wak si ta sabí pa muda awor of mihó prepará pa haci esei den futuro. Si bo ta deseá di skirbi Sociedad pa haña un sugerencia tocante unda lo bo por muda bai, e Comité di Sirbishi di bo congregacion tin cu manda un carta firmá huntu cu esun di bo.
8 Mehorá e Calidad di Bo Sirbishi: Probablemente nos tur por participá mas plenamente den e ministerio dor di mehorá e calidad di nos sirbishi di veld. Bo ta participando den tur e rasgonan dje trabou, entre otro di cas-pa-cas, testimonio informal i tambe den e trabou di haci rebishita i conducí studio di Bijbel? Si bo ta conducí un studio, bo por mehorá bo arte di siña? Lo ta bon pa repasá e suplemento di Nos Ministerio di Reino di juni 1996 pa haña sugerencianan cu bo por usa pa motivá bo studiantenan den direccion di dedicacion i bautismo.
9 Den capítulo 9 dje buki Organisá pa Cumpli cu Nos Ministerio, tin un consideracion mas extenso di maneranan pa expandé i mehorá nos ministerio. Sigur nos tur mester deseá pa haci mas tantu posibel den e sirbishi di Dios. Pakico no pensa seriamente riba bo metanan spiritual? Haci manera 1 Timoteo 4:15 ta recomendá: “Refleccioná riba e cosnan aki; sea intensamente ocupá den nan, pa bo progreso por ser manifestá na tur hende.”