Caha Di Pregunta

◼ Riba kico mayornan mester paga tinu ora nan yunan chikitu ta participá den sirbishi di veld?

Ta corecto cu mayornan cristian ta bai cu nan yunan den e ministerio di veld, i ta entrená nan pa compartí e bon nobo di Reino cu otro hende. Pero ora di haci esei, ta necesario sí pa nan vigilá nan yunan pa posibel peligernan den e teritorio, asta den barionan mas “safe.” Dia pa dia, mucha ta e obheto di violencia i abusu debí n’e aumento di golosidad i perversion sexual den e “tempu crítico” aki den cua nos ta biba. (2 Tim. 3:1-5) Mayornan tin cu tuma precaucionnan razonabel pa protehá nan yunan chikitu di bira víctima di hende. Kico por haci?

Bijbel ta consehá sabiamente pa nos ta cauteloso i mira di antemano unda por tin peliger. (Pro. 22:3; Mat. 10:16) E intencion no ta pa nos traha regla, pero ta sabí pa un mayor of un otro adulto compañá un mucha ora di participá den sirbishi di veld. Si dos publicadó hóben i responsabel ta traha huntu, ta consehabel pa un mayor of un otro adulto tin bista riba nan na tur momento. Di mes, segun un mucha ta crece bira mas grandi i ta duna prueba di ta mas responsabel, mayornan por dicidí si e tin mester di ménos vigilancia directo dje mayornan.—Mira tambe Caha di Pregunta di Nos Ministerio di Reino di october 1992.

Ta sabí tambe pa ta semper conciente di siguridad ora nos ta biaha den auto i ora nos ta cana. Si nos tuma precaucionnan apropiado, hopi bes nos por prevení accidente i e carganan trágico di dolor, gastunan médico i posibel problemanan legal den e mundu aki cu dia pa dia ta mas lihé pa demandá hende.

Ta na su lugá pa muchanan “alabá e nomber di Jehova.” (Sal. 148:12, 13) Ora nan ta den e ministerio di veld, nan palabranan encantador i bon comportacion ta impresioná otro hende mashá i ta duna onor na Jehova. Por fabor mayornan, yuda boso yunan participá regularmente den proclamá e bon nobo, miéntras cu boso ta semper alerto tambe pa protehá nan di cualkier posibel peliger cu ta existí!