Adoracion Berdadero Ta Expandiendo na Oost Europa
1 Cristiannan di promé siglo tabata predicadónan di Reino celoso. Nan tabata alegrá ora e congregacionnan a “aumentá na cantidad dia tras dia.” (Echo. 16:5) Nan predicacion cu curashi a hiba adoracion berdadero te den Asia, Africa i Europa, loke a resultá den un cosecha grandi di creyente.
2 Den e tempu aki di fin, adoracion berdadero ta sigui expandé, foral den e paisnan di Oost Europa. Den paisnan caminda nos tabata bou di prohibicion di gobiernu te cu principio di añanan ’90, awor nos ta experenciá aumento sobresaliente. E Anuario di 1999 ta revelá cu dos dje paisnan ei, Rusia i Ucrania, cada un a raportá riba 100.000 publicadó cu ta participá den e ministerio público. Den e 15 teritorionan di ex-Union Soviético, desde 1991 mas cu 220.000 hende a dedicá nan mes na Jehova i a bautisá! E crecementu rápido aki a haci cu mester a construí hopi Salon di Reino i Salon di Asamblea nobo, i tambe rek vários sucursal.
3 Manera a anunciá den Nos Ministerio di Reino di mart 1997, awor ta usa un parti dje Fondo pa Salon di Reino di Sociedad pa duna fiansa na congregacionnan den paisnan caminda tin hopi mester di mas Salon di Reino, pero caminda e recursonan ta limitá i tin problemanan económico severo. Entre mart 1996 i october 1998, Sociedad a aprobá 359 peticion di fiansa pa Salon di Reino for dje sucursalnan cu ta supervisá 11 pais di Oost Europa. Ta usa e fondonan contribuí pa cumpra tereno i material pa construí Salonnan di Reino nobo, i pa yuda congregacionnan remodelá e lugánan cu nan tin caba. E potretnan cu nos ta mira aki ta duna nos un idea dje manera cu e contribucion dje Fondo pa Salon di Reino di Sociedad di Merca i di otro paisnan, a beneficiá nos rumannan na Oost Europa.
4 Durante 1998, Bulgaria a experenciá un aumento di 12 porciento, i e rumannan a keda masha emocioná ora a dedicá nan promé Salon di Reino na april dje aña ei. Croacia a disfrutá di un aumento di 4 porciento, i actualmente e rumannan einan ta construyendo mas Salon di Reino, pa promové adoracion berdadero. Na Hungria, 144 congregacion ta usa un 80 Salon di Reino asina. Esaki ta nificá cu dje 235 congregacionnan den e pais ei, 61 porciento tin nan mes lugá di adoracion. Na Macedonia e programa di construccion di Salon di Reino a completá dos salon nobo, i mas ta na caminda. Den zomer di 1999, nan a completá un Salon di Reino dòbel den e stad capital Skopje. E salon aki tin e capacidad di acomodá por lo ménos seis congregacion.
5 Aña pasá na Rusia, como promedio, mas cu 260 hende tabata bautisá tur siman! Siguiendo e patronchi cu otro paisnan ta usa, e sucursal di Rusia awor a organisá 12 Comité Regional di Construccion den henter nan inmenso teritorio, pa apoyá futuro proyectonan di construccion di Salon di Reino. Den e parti nort di St. Petersburg, nan ta construyendo e promé Salon di Asamblea dje pais, cu lo tin stul pa 1.600 hende. E facilidad lo tin cincu Salon di Reino tambe, i cada un lo tin stul pa 200 hende. Pa sirbi e necesidadnan spiritual di nos rumannan i di hopi hende interesá na Ucrania, e rumannan a completá 84 Salon di Reino i nan ta trahando riba 80 mas.
6 E aumento aki na Oost Europa no ta haci nos curason contentu? Sin importá unda nos ta biba, e expansion di adoracion berdadero ta recordá nos cu Dios no ta haci distincion di persona i cu su pacenshi lo nificá salbacion pa “un multitud grandi.” (Rev. 7:9; 2 Ped. 3:9) Esta un privilegio cu nos por tin un parti chikitu den contribuí cu e crecementu spiritual di otronan, asta di esnan den paisnan leu! Proverbionan 28:27 ta sigurá nos cu “esun cu ta dunando na esun di poco recurso lo no pasa necesidad.” E echo cu nos ta dispuesto pa yuda cubri e gastunan aki di construccion ta resultá den “un igualacion” di cosnan material, i ta haci posibel cu tur ruman por disfrutá dje felicidad cu ta bini dor di duna i dje goso cu ta resultá di mira adoracion berdadero expandé rond mundu.—2 Cor. 8:14, 15; Echo. 20:35.
[Picture on page 3]
Săcele, Rumania
[Picture on page 3]
Maardu, Estonia
[Picture on page 3]
Sevnica, Slovenia
[Picture on page 3]
Tiszavasvári, Hungria
[Picture on page 4]
Jūrmala, Latvia
[Picture on page 4]
Taurage, Lituania
[Pictures on page 4]
Tallinn, Estonia
[Pictures on page 5]
Prievidza, Slovakia
[Picture on page 5]
Mátészalka, Hungria
[Pictures on page 5]
Belgrado, Yugoslavia
[Picture on page 6]
Ruma, Yugoslavia
[Pictures on page 6]
Vranov nad Topl’ou, Slovakia
[Caption on page 6]
Tornakalns, Latvia