Caha Di Pregunta

◼ Bo ta prepará pa un emergencia?

Den e mundu djawe, hopi bes “tempu i suceso imprevisto” ta combiná pa crea un emergencia médico, i esei ta incluí e preshon pa tuma transfusion di sanger. (Ecl. 9:11) Pa haci sigur cu nos ta prepará pa tal eventualidad, Jehova, mediante su organisacion, a percurá yudansa den hopi manera, pero e ta verwagt pa nos haci nos parti. Aki bou tin un lista di control pa yuda bo.

• Semper tin huntu cu bo e karchi di Instruccion/Exoneracion Médico Delantá dje aña coriente.

• Soru pa bo yunan tin huntu cu nan e Karchi di Identidad dje aña coriente.

• Repasá e suplemento di Nos Ministerio di Reino di september 1992, i ensayá con pa razoná cu dokter i huesnan relacioná cu tratamentu médico pa bo yu.

• Repasá artículonan tocante componentenan di sanger i alternativanan pa sanger. (Nos ta recomendá: E Toren di Vigilancia, 1 di october 1994, página 31; [na spañó] 1 di juni 1990 página 30-1; 1 di mart 1989, página 30-1; Spierta!, [na spañó] 8 di december 1994, página 23-7; 8 di augustus 1993, página 22-5; 22 di november 1991, página 10; i suplementonan di Nos Ministerio di Reino di september 1992 i november 1990 [na spañó]. Warda nan huntu den un map, ya por haña nan unbes ora mester.)

• Dicidí segun bo concenshi si bo por permití uso di mashinnan cu ta circulá sanger pafó di bo curpa of si bo por aceptá productonan cu ta contené componente di sanger.

• Promé cu bo bai hospital, si ta posibel, laga e ancianonan sa, di manera cu nan por apoyá bo i tuma contacto cu e Comité di Contacto cu Hospital (CCH) si ta necesario. Den caso di un mucha chikitu, pidi e ancianonan notificá e CCH for di trempan.

Mustra Bon Cla cu Bo No Kier Sanger: Informenan ta mustra cu tin ruman ta warda te na último momento pa bisa e dokternan cu ta trata nan cu nan no kier sanger. Esaki no ta hustu pa cu e personal médico i ta hinca bo den riesgo di haña transfusion. Si e dokternan sa di bo conviccion i bo a respaldá bo deseo cu documentonan firmá cu ta declará bo instruccionnan specífico, esei ta yuda cu nan por actua sin tardansa i hopi bes ta duna nan mas opcion pa trata bo sin sanger.

Ya cu un emergencia médico por sosodé na cualkier momento, i por lo general ora cu ménos bo ta sper’é, dal paso awor pa protehá bo mes i bo yunan di haña un transfusion di sanger.—Pro. 16:20; 22:3.