Bo Ta Trahando cu un Propósito?
1 Jehova ta e Dios di propósito. (Isa. 55:10, 11) Bijbel ta consehá nos pa imit’é. (Efe. 5:1) Nos mester demostrá esaki foral den e manera cu nos ta efectuá nos ministerio. Pues e pregunta aki ta na su lugá: “Bo ta trahando cu un propósito?”
2 Nos predicacion di cas pa cas, testificacion informal i distribucion di literatura, tur ta parti di un ministerio cu propósito. Pero corda cu nos comision no ta encerá predicá so, sino haci disipel tambe. (Mat. 28:19, 20) Despues di sembra simianan dje berdad di Reino, nos tin cu bolbe bek pa muha nan i cuida nan riba un base regular. Na mésun tempu nos ta spera riba Jehova pa trece aumento. (1 Cor. 3:6) Nos mester ta conciencial den haci rebishita i cuminsá studionan di Bijbel.
3 Expandé Bo Ministerio: Semper bo ta bai sinti bo bon ora bo por wak bek riba loke bo a haci den sirbishi i bisa bo mes: “Mi a logra loke mi a sali pa haci.” Manera ta pará skirbí na 2 Timoteo 4:5, Pablo a urgi: “Cumpli cu bo ministerio plenamente.” Esei ta encerá haci mas esfuerso pa rebishitá tur hende interesá cu bo haña. Den bo programa semanal di sirbishi, planea un ora definí pa haci rebishita. Traha pa alcansá e meta di cuminsá studio di Bijbel cu esnan cu ta incliná den direcccion di husticia. Esaki mester ta bo propósito ora bo ta participá den e ministerio.
4 Puntra publicadónan con nan a sinti ora nan a mira nan studiantenan di Bijbel bautisá na un asamblea. Nan a alegrá, kisas mes tantu cu esnan cu a bautisá mes. Nan a logra un gran propósito! Un hacidó di disipel a expres’é asina aki: “Haci disipel ta nificá forma mas alabadó di Jehova. E ta nificá bida pa esnan cu aceptá e berdad. Mi simplemente ta gusta siña otronan e berdad—e ta algu asina bunita! . . . Hopi di esnan cu a yega di stima Jehova a bira mi amigunan masha stimá.”
5 Imaginá bo yuda un persona bira un sirbidó dedicá di Jehova! Esta un causa di goso! Tal resultado ta bini dor di traha cu un propósito den e ministerio.—Col. 4:17.