Mayornan, Pone un Bon Ehempel pa Boso Yunan
1 E Palabra di Dios ta bisa nos cu “e tata [i mama] di un persona hustu sin falta lo ta gososo.” (Pro. 23:24, 25) Esta un bendicion pa mayornan cu a pone un bon ehempel pa nan yunan! Un miembro di un Comité di Sucursal a bisa di su mayornan: “E berdad tabata henter nan bida, i mi tambe kier a hacié henter mi bida.” Kico yunan mester mira den nan mayornan?
2 Bon Manera i Respet Profundo: Ta responsabilidad dje mayornan pa inculcá característicanan saludabel den nan yunan. Yunan ta siña bon manera, no djis dor di instruccion duná cu boca, sino dor di mira i imitá. P’esei, ki manera bo ta desplegá? Bo yunan ta tende bo bisa “despensa,” “por fabor” i “danki”? Den boso famia, boso ta trata otro cu respet profundo? Boso ta paga tinu ora otro ta papia? Boso ta scucha ora boso yunan ta papia cu boso? Boso ta desplegá e bon maneranan aki tantu na Salon di Reino como den e privacidad di boso cas?
3 Spiritualidad Fuerte i Actividad Celoso: Un ruman homber cu a pasa mas cu 50 aña den sirbishi di tempu completo ta corda: “Mi mama cu tata tabata un ehempel maraviyoso den nan aprecio pa e reunionnan i den nan celo pa e ministerio.” Con boso ta demostrá na boso yunan cu boso ta interesá den mantené e spiritualidad di tur hende den boso famia di cas? Boso ta considerá e texto di dia huntu? Boso tin un studio di famia regular? Boso yunan ta mira boso lesa Bijbel i e publicacionnan di Sociedad? Kico nan ta tende ora boso ta haci oracion pa e famia? Boso ta tene combersacion spiritualmente edificante cu boso yunan, papiando di cosnan positivo dje berdad i dje congregacion? Boso ta ansioso pa asistí na tur reunion i pa participá den e ministerio di veld como famia?
4 Mayornan, refleccioná riba e ehempel cu boso ta poniendo pa boso yunan. Hacié un ehempel excelente, i henter nan bida nan lo apreci’é manera un tesoro. E casá di un superintendente di circuito, cu awor tin 70 i picu aña, a bisa: “Te ainda mi ta beneficiando dje bon ehempel di mi mayornan cristian amoroso. I mi ta pidi Dios cu henter mi alma cu mi por duna prueba di mi pleno aprecio pa e herencia aki dor di us’é bon pa semper den futuro.”