Kico Lo Bo Bisa un Hindú?
1 Manera kisas bo sa, tin hopi hindú ta biba den vários pais, i aki nan tambe. Esaki ta nificá cu tardi of trempan bo por topa un hindú durante bo ministerio. Ora esei sosodé, con lo bo papia cuné?
2 Corda e Puntonan Aki: Misioneronan cu tabatin éxito den predicá cu hindú ta bisa cu no ta necesario haci un estudio profundo di hinduismo pa por duna un testimonio eficas. Presentá e berdad den un forma simpel i cu tacto, hopi bes ta resultá den un reaccion positivo. Promé, pidi pa papia cu e cabes di cas. Si su reaccion ta faborabel, lo ta mas fácil pa duna testimonio na otro miembronan di famia. Evitá di sugerí den bo introduccion cu bo ta treciendo un mensahe cu ta superior na loke e doño di cas ta kere of cu bo kier papia dje único Dios berdadero of dje scritura sagrado di mas bieu. Ya cu hopi hindú ta considerá Bijbel como un buki di hende occidental, bo por kibra prehuicio dor di splica cu Bijbel no ta promové colonialismo ni superioridad di un rasa riba otro.
3 Usa e Hermentnan Corecto: Tin dos foyeto cu a ser prepará specíficamente cu hindú na mente. Na idioma gujarati i punjabi a imprimí Pakico Nos Mester Adorá Dios den Amor i Berdad? E foyeto Nos Problemanan—Ken lo Yuda Nos Solucioná Nan? ta imprimí den 11 idioma mas di India. Tur dos foyeto ta disponibel na ingles. E foyetonan “Mira! mi ta traha tur cos nobo” i Dios Realmente Ta Interesá den Nos? tambe a resultá di ta eficas ora di duna testimonio na esnan cu antecedente hindú. Bo por tin éxito tambe cu e foyeto Rekerí i e buki Conocimentu pa conducí studionan di Bijbel.
4 Establecé un Tereno Comun: No ta difícil pa haña un tereno comun cu hindú. Nan ta kere cu nos ta bibando den e tempu cu maldad ta na su máximo i cu Dios lo libra mundu di su problemanan pa medio di un gran catástrofe i pa despues sigui un era di berdad. Ta bisto cu ta masha fácil pa relacioná e creencianan aki cu loke Bijbel ta siña tocante e último dianan, e gran tribulacion i e binidero mundu nobo. Como cu mayoria hindú ta mira bida como un seri di problema pa cua no tin solucion, nan ta interesá den tópico cu ta trata bida di famia, crímen i siguridad, i loke ta sosodé ora nos muri. Ata aki dos ehempel di presentacion cu bo por purba.
5 Esaki lo por atraé un tata di famia:
◼ “Mi ta bishitando hende cu ta preocupá cu e estado di bida di famia den hopi pais awe. Kico bo ta pensa lo yuda famia keda huntu? [Permití contesta.] Tin hende sa kico e scrituranan hindú ta bisa tocante famia, pero nunca nan no tabatin e oportunidad pa compará esaki cu loke Bijbel tin di bisa riba e tópico ei. Lo mi kier compartí cu bo e pensamentu aki cu tin na Colosensenan 3:12-14.” Despues di lesa e texto, mustra e doño di cas capítulo 15 dje buki Conocimentu i bisa: “Gustosamente lo mi kier dedicá poco tempu na lesa e capítulo aki huntu cu bo.”
6 Un hóben kisas ta reaccioná faborabel riba esaki:
◼ “Sin duda, bo ta kere den Dios. Kico bo ta pensa ta Dios su propósito pa nos?” Permití contesta. Anto lesa Génesis 1:28, i bisa: “Den hopi lugá e tera ta sobrepoblá i plagá cu problema. Bo ta kere cu e Creador lo ta dispuesto pa yuda nos solucioná nos problemanan?” Despues di tende e contesta, bai na un publicacion apropiado.
7 Disfrutá di Resultadonan Positivo: Un homber hindú di 22 aña a acercá un ruman muher cu tabata predicá den un marshe i a pidié un studio di Bijbel. El a splica e ruman cu ocho aña promé el a tende un combersacion bíblico entre e ruman i su mama. Aunke el a keda impresioná cu e contestanan práctico di Bijbel pa solucioná e problemanan di humanidad, su mama no tabata interesá i el a sinti cu e tabata muchu yong pa sigui e berdad su so. Awor como adulto, e kier a siña mas. E yoncuman no a perde tempu. Den 23 dia so, el a caba di studia e buki Conocimentu, i cuater luna so despues cu el a topa e ruman na marshe, el a pidi pa bautisá!
8 Un ruman homber a cuminsá un studio cu un homber hindú cu el a topa den trein. E homber tabatin problema den su matrimonio. Tambe e tabatin un problema cu bebementu. El a bai di acuerdo pa e Testigo bishit’é pa compartí e conseho cu Bijbel ta duna tocante bida di famia. E siñansanan moral di Bijbel a atra’é, i el a bai eens pa haña un studio di Bijbel. E cu su famia a cuminsá bai reunion huntu. Despues nan a compartí e berdad cu amigu i famianan. Te asina leu, seis dje hendenan aki a aceptá e berdad!
9 Dios su boluntad ta pa “tur clase di hende ser salbá i yega na un conocimentu exacto dje berdad.” (1 Tim. 2:4.) Esaki ta incluí hende cu ta di un religion no-cristian, manera hinduismo. Si tin hindú den bo teritorio, pakico no bishitá nan mas pronto posibel i usa algun dje sugerencianan presentá den e artículo aki?