Nos No A Tende Esei Caba?
1 Claro cu sí! Den su Palabra Jehova ta ripití hopi cos pa e beneficio di su pueblo. Jesus a ripití hopi bes su siñansanan tocante vários aspecto dje Reino. Su apostelnan a repasá continuamente asuntunan spiritual cu personanan cu tabata firme ankrá den e berdad.—Rom. 15:15; 2 Ped. 1:12, 13; 3:1, 2.
2 Den nos tempu Jehova su organisacion a haci areglo pa repasá bes tras bes temanan importante na reunionnan di congregacion. Nos a studia cierto publicacionnan vários biaha. Sí, ta importante pa tende cosnan cu nos a yega di tende caba!
3 Ripiticion Ta Cumpli cu un Necesidad Vital: Jehova su recordatorionan ta profundisá nos comprendimentu, ta expandé nos punto di bista i ta fortalecé nos determinacion pa keda spiritualmente riba e caminda corecto. (Sal. 119:129) Repasá e norma i principionan di Dios ta manera wak den un spiel. E ta yuda nos examiná nos mes i ta contrarestá e tendencia di ta “un tendedó lubidadó.”—Sant. 1:22-25.
4 Si nos no sigui recordá nos mes dje berdad, otro cosnan lo influenciá nos curason. E recordatorionan di Dios ta fortalecé nos pa resistí e mal influencianan dje mundu di Satanas. (Sal. 119:2, 3, 99, 133; Fil. 3:1) E recordatorionan regular cu nos ta ricibí relacioná cu cumplimentu dje propósitonan di Dios ta impulsá nos pa “sigui vigilá.” (Mar. 13:32-37) Ripiticion di berdadnan bíblico ta yuda nos keda riba e caminda cu ta hiba na bida eterno.—Sal. 119:144.
5 Con pa Beneficiá Personalmente: Nos tin cu ‘incliná nos curason na e recordatorionan di Dios.’ (Sal. 119:36) Ora ta bai trata un tema conocí na un reunion di congregacion, nos tin cu prepará di antemano, busca e textonan mencioná i refleccioná riba con nos por aplicá e informacion. Laga nos no keda sin prepará pa e repaso skirbí dje Scol di Ministerio Teocrático, pensando cu esei no ta necesario. (Luc. 8:18) Nunca nos lo kier keda sin presta e debido atencion pasobra tog ta ripití berdadnan básico na nos reunionnan bes tras bes.—Heb. 5:11.
6 Laga nos tin mésun actitud cu e salmista: “Den e caminda di bo recordatorionan mi a hubilá, mescos cu pa tur otro cos balioso.” (Sal. 119:14) Sí, nos a yega di tende e cosnan balioso aki caba, i probablemente nos lo tende nan atrobe. Di con? Pasobra Jehova sa cu nos tin mester di tende nan!