Un Privilegio Disponibel pa Esnan Mas Hóben
1 Hopi ruman cu awor ta mayor tin grato recuerdo di un privilegio cu nan a disfrutá di dje como mucha creciendo den e berdad: predicá riba Dia di Revista. Na aña 1949 a instituí e obra ei den tur congregacion. Un dia pa siman, tur hende mester a concentrá riba distribuí E Toren di Vigilancia i Spierta! den caya, di cas pa cas, di negoshi pa negoshi i den otro maneranan. Foral publicadónan hóben a gusta participá den e obra aki pasobra el a duna nan un chens di participá den e mésun actividad cu hende grandi den congregacion. Esaki tabata cierto den bo caso tempu cu bo tabata mucha?
2 Enbolbé Bo Yunan: Mucha hopi chikitu cu no ta cla pa cuminsá un combersacion bíblico na porta, tog por ofrecé revista. Nan tin cu siña solamente un presentacion simpel di un par di frase corticu. Por ta suficiente si nan duna un comentario breve, kisas tocante e plachi riba portada. Hopi doño di cas ta tuma e revistanan cu smak cerca nos muchanan, i hopi bes nan ta papia bon dje sinceridad i bon comportacion dje hóbennan aki. Cu un poco yudansa, e sirbishi aki ta algu cu mucha por haci hopi bon, dunando asina un contribucion balioso na plama e mensahe di Reino. Claro cu segun e muchanan ta crece, nan mayornan lo kier yuda nan sigui haci progreso den desaroyá nan abilidad di duna testimonio.
3 Manuel a cuminsá predicá di cas pa cas ora e tabatin tres aña. Su mayornan a yud’é siña un presentacion breve for di cabes. Cu celo e tabata predicá huntu cu nan, lagando hopi revista, foyeto i tratado. Tambe e tabata duna testimonio informal. Un biaha ora cu su mayornan a bai un parke cuné pa recreá, el a tuma e iniciativa pa laga algun tratado cu hende cu tabata einan. Aunke ainda e ta hopi yong, Manuel su entusiasmo pa e ministerio ta un fuente di berdadero animacion pa su mayornan i pa henter e congregacion.—Pro. 22:6.
4 Tur diasabra riba e Kalender 2000 di Testigonan di Jehova ta designá como “Dia di Revista.” Mayornan, nos ta recomendá boso pa renobá boso interes den e trabou aki, yudando boso yunan participá mas regular posibel den e privilegio aki di sirbishi.