Prepará Bo Propio Presentacion di Revista
1 Nos ta apreciá e revistanan Toren di Vigilancia i Spierta! pa nan artículonan oportuno i informativo, cu ta trata di tur cos for di temanan importante cu ta toca e mundu te na “e cosnan profundo di Dios.” (1 Cor. 2:10) Nos tur ta corda hopi cos nobo i edificante cu nos a yega di lesa den e revistanan aki, cu Jehova ta usando pa revelá e berdad progresivamente. (Pro. 4:18) Nos kier ta celoso den distribuí nan mas ampliamente posibel.
2 Analisá Bo Teritorio: Ki tipo di hende ta biba den bo área? Si nan semper tin purá, lo bo tin cu prepará un presentacion cu ta breve i al caso. Si bo tin teritorio caminda e paso di bida ta ménos anshá, lo bo por bisa mas den bo presentacion. Si mayoria doño di cas ta traha den dia, bo por tin mas éxito bishitando nan cas atardi lat of anochi trempan. Kisas lo bo por haña contacto cu algun di nan den dia dor di testificacion riba caya of dor di traha di negoshi pa negoshi. Algun publicador ta haña bon resultado dor di acercá hende informalmente riba lugánan di parkeer i den parkenan público.
3 Familiarisá Bo Mes cu e Revistanan: Lesa cada edicion asina cu bo ricibié. Selectá e artículonan cu bo ta kere lo por atraé e hendenan den bo teritorio. Ki tópiconan ta interesá nan? Busca un punto specífico cu bo por cita for dje artículo cu bo ta planea pa presentá. Pensa riba un pregunta cu bo por haci pa stimulá interes. Scoge un texto bíblico oportuno pa lesa p’e doño di cas si bo haña chens pa haci esei. Pensa riba loke lo bo por bisa pa mencioná e contribucion i con lo bo por pone e fundeshi pa un rebishita.
4 Prepará Bo Palabranan di Introduccion: Cuidadosamente scoge e palabranan cu bo ta planea pa usa pa introducí bo mes i pa cuminsá un combersacion. Algun ruman tabatin éxito cu e comentario aki di introduccion: “Mi a lesa un artículo fasinante den e revista aki, i mi kier compartié cu otro hende.” Hopi ruman ta cuminsá cu un pregunta cu ta enfocá riba e punto di combersacion cu nan ta planea pa usa. Por ehempel:
5 Si bo ta bai resaltá un artículo tocante con extenso crímen ta, lo bo por puntra:
◼ “Kico lo ta necesario pa nos por drumi anochi sin tin miedu di ser atracá of cu daño ta ser hací na nos?” Splica cu bo tin algun informacion tocante un solucion pa e problema aki. E solucion pronto lo eliminá tur otro clase di problema social tambe. Referí na algu den e revista cu ta ofrecé un speransa asina. Ora bo bolbe pa haci rebishita, bo por hala e doño di cas su atencion na capítulo 1 dje buki Conocimentu.
6 Ora di ofrecé un artículo tocante bida di famia, lo bo por bisa esaki:
◼ “Mayoria mayornan ta haña cu ta realmente difícil pa lanta un famia den e dianan aki. Hende a skirbi hopi buki riba e tema, pero asta e expertonan no ta di acuerdo cu otro. Tin un persona cu por percurá guia confiabel?” Compartí for dje revista un comentario specífico cu ta mustra e conseho sabí cu bo por haña den Bijbel. Ora bo ta haci e rebishita, considerá e pensamentunan bíblico en cuanto criamentu di yu cu ta ser tratá den e buki Conocimentu, página 145-8.
7 Ora di presentá un artículo tocante un problema social, lo bo por bisa:
◼ “Hopi hende ta sinti nan bou di presion debí n’e tempu yen di tension cu nos ta biba aden. Bo ta kere cu tabata Dios su intencion pa nos biba asina aki?” Señalá na un artículo cu ta mustra con pa trata cu e problemanan djawe of cu ta duna motibu pa anticipá un futuro cu lo ta liber di ansiedad. Na bo siguiente bishita, considerá e plachi i texto cu ta compañ’é na página 4-5 dje buki Conocimentu, i despues cuminsá di biaha cu un studio di Bijbel na cas.
8 Adaptá na e Doño di Cas: Lo bo topa hende cu tin interes i antecedentenan distinto. Prepará un presentacion básico cu bo por ahustá na cada doño di cas. Tene na mente con lo bo por adaptá loke bo ta bisa na un hende homber, un hende muher, un hende di mas edad, of na un hóben. No tin reglanan rígido en cuanto loke bo tin cu bisa. Bisa loke bo ta sintí bo cómodo cuné i cu ta producí bon resultado. Sin embargo, sea entusiasmá, papia di curason i sea un bon scuchador. Esnan cu ta “corectamente dispuesto” lo sinti bo sinceridad i lo reaccioná faborablemente.—Echo. 13:48.
9 Un Yuda Otro: Dor di compartí ideanan un cu otro, nos ta siña maneranan nobo pa expresá nos mes. Practicando nos presentacionnan huntu ta duna nos experencia i confiansa. (Pro. 27:17) Si bo ensayá loke bo ta bai bisa, lo bo sintí bo mas trankil na porta. Ta vital pa mayornan dedicá tempu na yuda nan yunan prepará, scucha segun cu nan ta practicá nan presentacion, i ofrecé sugerencianan pa mehorá. Publicadornan nobo por beneficiá dor di traha cu publicadornan cu mas experencia.
10 Preparando bo propio presentacionnan di revista no mester ta difícil. Esei ta simplemente un asuntu di prepará algu specífico pa bisa i despues expres’é den un manera atractivo. Cu iniciativa i preparacion di antemano, bo por formulá un presentacion excelente cu lo ricibí un reaccion faborabel.
11 Distribucion di revista ta un dje maneranan principal cu nos ta usa pa plama e mensahe di Reino na tur parti di mundu. Si bo por laga E Toren di Vigilancia i Spierta! den man di hende sincero, e revistanan por papia pa nan mes. Semper corda nan balor i con nan mensahe por salba bida. Esaki ta e clase di “hacimentu di bon i e compartimentu di cosnan cu otronan” cu ta agradá Jehova masha hopi.—Heb. 13:16.