Con Importante Compañerismo Cristian Ta?
1 “Niun hende no ta un isla.” E declaracion ei di un poëta di siglo 17 simplemente ta ripití loke Bijbel a bisa tocante un necesidad humano básico: compañerismo. (Pro. 18:1) Nos asociacion cristian ta satisfacé e necesidad aki. Den ki maneranan probechoso?
2 Den e Ministerio: Un dje beneficionan principal ta e manera cu nos rumannan ta fortalecé i apoyá nos den e ministerio público. Jesus a manda su disipelnan “dos dos” bai predicá. (Mar. 6:7; Luc. 10:1) Siguiendo e modelo aki, nos ta experenciá e berdad di Eclesiástes 4:9 i 10 ora nos ta traha cu otro rumannan den sirbishi di veld. Segun cu nos ta efectuá nos ministerio huntu, nos compañeronan su fe, obedencia i amor ta yena nos cu curashi i ta renobá nos celo.
3 Pa Yudansa Personal: Tambe nos hermandad ta un fuente di animacion i guia pa yuda nos enfrentá preshon i resistí tentacion. Nos amistadnan cristian por hala nos atencion na textonan bíblico cu ta trata cu nos preocupacionnan personal. Kisas nan ta asta haci oracion pa nos, mescos cu nos ta haci pa nan. (2 Cor. 1:11) I nan bon ehempel sigur ta fortalecé nos i motivá nos pa haci obra excelente.
4 Na e Reunionnan: Nos ta disfrutá dje bendicion di compañerismo cristian ora nos ta asistí regularmente na reunionnan di congregacion. (Heb. 10:24, 25) E programa tin un abundancia di instruccion spiritual, i nos presencia na reunion ta yuda nos mantené un relacion estrecho cu nos compañeronan di creencia. E reunionnan aki ta duna nos oportunidad pa tende nos rumannan expresá nan fe, sea ta for di plataforma of for di den auditorio. (Rom. 1:12) Nos laso di compañerismo ta bira mas estrecho ora nos combersá cu otro promé i despues di reunion. Ocasionnan asina ta duna nos chens pa conta e experencianan fortalecedor di fe cu nos mes tabatin. Nos personalidad ta ser influenciá den un manera positivo ora nos ta asociá libremente cu esnan cu stima Jehova, stima su Palabra, su trabou i su pueblo.—Fil. 2:1, 2.
5 Nos tin mester di nos compañeronan cristian. Sin nan, lo ta mas difícil pa cana riba e caminda cu ta hiba na bida. Pero cu nan amor i animacion, nos por sigui rumbo pa Jehova su hustu mundu nobo.—Mat. 7:14.