Kon Nos Famia Por Ta Spiritualmente Fuerte?
1 Mester felisitá famianan kristian pasobra nan ta “praktiká deboshon na Dios den nan mes famia di kas.” (1 Tim. 5:4, NW) Pero ku asina tantu mal influensia rònt di nos ku por debilitá nos fe, ta masha importante pa famianan traha duru pa keda spiritualmente fuerte. Kon nan por logra esaki?
2 Kabes di Kas, Imitá Kristu: Kabesnan di kas tin ku imitá Hesukristu den e manera ku nan ta kumpli ku nan responsabilidat pa fortalesé nan famia. No ta ku su morto komo sakrifisio so Hesus a demostrá su amor pa e kongregashon. Huntu ku esei, e “ta aliment’é i ta kuid’é” kontinuamente. (Efe. 5:25-29) Mayornan amoroso ta sigui e ehèmpel aki di duna kuido tierno dor di atendé e nesesidatnan spiritual di nan famia diariamente. Esaki ta enserá entre otro, kondusí un studio di Beibel di famia tur siman, kombersá riba kosnan spiritual profundo i práktiko ki ora ku ta posibel, i atendé problemanan ku ta surgi.—Deu. 6:6, 7.
3 Den Sirbishi di Fèlt: Tur miembro di famia mester komprendé ku un parti importante di nan adorashon ta pa prediká na otro hende tokante Yehova i su propósito. (Isa. 43:10-12) Mayornan, si boso kier pa boso yunan ta fiel Testigu di Yehova, boso tin ku kuminsá prepará nan kurason pa sirbishi for di chikitu. Papia ku nan tokante e motibunan pakiko nos mester desplegá sakrifisio propio den sirbishi i partisipá den dje tur siman. (Mat. 22:37-39) Anto hasi areglo pa nan sali regularmente huntu ku boso den sirbishi di fèlt.
4 Ademas boso por yuda e famia komprendé e importansia di e trabou di prediká dor di apartá tempu durante e studio di famia semanal pa prepará i train un presentashon efikas. Duna bo yunan entrenamentu individual den sirbishi, i yuda nan hasi progreso segun nan edat i abilidat. Despues ku boso kaba di traha huntu den sirbishi, kòmbersá tokante kon nan a mira Yehova su bondat personalmente. Relatá eksperensianan ku ta hasi boso fe firme. Mas e famianan “purba e kariño di Señor,” mas serka di Yehova nan lo hala, i esei lo fortifiká nan pa resistí “tur malisia.”—1 Ped. 2:1-3.
5 Na e Reunionnan: Ta hopi bon ora miembronan di famia ta yuda otro asistí na tur reunion di kongregashon, foral si un di nan ta kansá, desanimá òf bou di hopi preshon! Un hobensita a komentá: “Ora mi tata bini kas for di trabou, e ta kansá, pero mi ta kont’é di un bon punto ku lo ser tratá na reunion e anochi ei, i esaki ta anim’é pa bai. Anto ora ami ta kansá, e ta animá mi pa bai.”—Heb. 10:24, 25.
6 Hasi Kos Huntu: Famianan mester hasi kos huntu, por ehèmpel yuda ku trabou di kas. Tambe nan mester apartá tempu pa hasi rekreo sano. Piknik, kana, hunga spèl i biaha pa bishitá famia i amigunan por perkurá momentonan felis i laga grato rekuerdo.—Ekl. 3:4.
7 Famianan kristian fuerte ta vensé e opstákulonan diario kontra nan spiritualidat. Halando semper mas serka di Yehova, nan ta eksperensiá e poder ku e ta duna.—Efe. 6:10.