Un Areglo pa Yuda Famianan

1. Kon e dia di sabat a benefisiá famianan israelita?

¹ E dia di sabat tabata un provishon amoroso di Yehova ku a benefisiá tur e famianan den Israel. Riba e dia ei, e israelitanan no a traha i tabatin tempu pa reflekshoná riba Yehova su bondat i nan relashon kuné. Mayornan por a hasi bon uso di e oportunidat akí pa inkulká e Lei den kurason di nan yunan. (Deu. 6:​6, 7) E sabat a duna Yehova su pueblo oportunidat pa enfoká tur siman riba nan adorashon.

2. Kiko e lei di sabat ta siña nos tokante Yehova?

² Ta klaru ku Yehova no ta rekerí pa famianan warda sabat mas. Sinembargo, e Lei ei ta siña nos algu di nos Dios. Semper e tabatin un interes profundo den e bienestar spiritual di su pueblo. (Isa. 48:​17, 18) E areglo di e anochi di Adorashon Komo Famia ta un manera ku Yehova amorosamente ta demostrá su interes awe den su pueblo.

3. Kiko ta e propósito di e anochi di Adorashon Komo Famia?

³ Ki Propósito e Anochi di Adorashon Komo Famia Tin? Na yanüari 2009, a kuminsá tene e Estudio di Buki di Kongregashon riba e mesun anochi ku e Skol di Ministerio Teokrátiko i e Reunion di Sirbishi. Un motibu pa esaki tabata pa duna famianan e oportunidat di programá un anochi spesífiko kada siman pa adorashon komo famia i asina fortalesé nan relashon ku Yehova. Kada famia a haña e animashon pa pone e estudio di famia riba e anochi ku anteriormente tabatin e estudio di buki, si esei ta práktiko, i usa e tempu ei pa papia riba Beibel i studia informashon ku ta kuadra ku e nesesidatnan di e famia.

4. E estudio mester dura ún ora so? Splika.

⁴ Pa nos por a asistí na e Estudio di Buki di Kongregashon nos mester a tuma tempu pa bisti, bai reunion, etcetera. E reunion tabata dura ún ora, pero pa hopi di nos e preparashon pa bai reunion tabata dura mas ku ún ora. Ku e ahuste den nos programa di reunionnan, awor nos tin e anochi ei pa adorá Yehova komo famia. P’esei, nos no mester limitá nos anochi di Adorashon Komo Famia na ún ora so. Mas bien, nos tin ku tene kuenta ku e nesesidat- i limitashonnan di nos famia i ahustá e tempu na esei.

5. Ta henter e anochi e famia mester studia huntu? Splika.

⁵ Henter e Anochi e Famia Mester Studia Huntu? Ora parehanan kasá i famianan ku tin yu ta papia tokante tópikonan bíbliko, nan ta animá otro. (Rom. 1:⁠12) E famia ta bira mas pegá ku otro. P’esei, e kos prinsipal durante e anochi di Adorashon Komo Famia ta pa studia i papia riba Beibel. Sinembargo, kada miembro di famia por dediká tempu tambe na estudio personal. Por ehèmpel, despues di studia huntu, e famia por keda huntu miéntras kada un ta sigui studia individualmente, kisas kaba di prepará pa reunion òf lesa revista. Algun famia ta opta pa no sende televishon e anochi ei.

6. Den ki maneranan por tene e estudio?

⁶ Kon Lo Por Tene e Estudio? No ta nesesario pa semper studia den forma di pregunta i kontesta. Pa tene e anochi di Adorashon Komo Famia bibu i interesante, hopi famia tin un programa ku ta paresido na nos reunion den siman. Nan ta parti e estudio den diferente sekshon i ta tene nan den diferente forma. Por ehèmpel, nan ta lesa Beibel huntu, prepará sierto partinan pa reunion i ta train pa e sirbishi di vèlt. Na página 6 tin algun sugerensia.

7. Ki ambiente e mayornan mester perkurá pa reina durante e estudio?

⁷ Kon e Ambiente Mester Ta? E famia lo apsorbá e informashon mihó si tin un ambiente agradabel i relahá. Boso por asta studiá na aire liber. Boso por sinti liber pa tuma pousa ora ta nesesario. Despues di e estudio, algun famia sa kome i bebe algu. Aunke mayornan ta evitá di usa e anochi di Adorashon Komo Famia pa skual òf disipliná e yunan, kisas nan tin ku dediká parti di e tempu na un tendensia òf problema spesífiko ku nan a nota den e famia. Sinembargo, lo ta mihó pa nan trata asuntunan personal i delikado den privá ku un yu na un otro ora durante siman pa evitá ku e ta haña bèrgwensa dilanti di su rumannan. E anochi di Adorashon Komo Famia no mester ta laf ni demasiado serio, ya ku nos ta sirbi un Dios felis i esei mester ta bisto durante e anochi ei.​—⁠1 Tim. 1:⁠11, NW.

8, 9. Ki preparashon ta bon pa kabesnan di famia hasi?

⁸ Kon e Kabes di Famia Por Prepará? E famia lo saka mas benefisio si e kabes di famia prepará adelantá pa kada anochi di Adorashon Komo Famia i disidí kiko ta bai ser tratá i kon ta e mihó manera pa trat’é. (Pro. 21:⁠5) Lo ta bon pa e esposo konsultá ku su esposa tokante esaki. (Pro. 15:⁠22) De bes en kuando lo ta bon pa e kabes di famia pidi e yunan tambe sugerensia, ya e ta haña un bon idea kiko ta nan interes- i preokupashonnan.

⁹ Mayoria di e simannan akí e kabes di kas lo no tin nodi pasa ratu largu pa prepará. Probablemente, e famia lo ke studia sierto kosnan fiho tur siman. Pues, no ta nesesario pa e kabes di famia bin ku un programa kompletamente nobo kada siman. Kisas lo e por prepará despues di kada estudio di famia ora ku ainda e nesesidat di e famia ta fresku den su mente. Algun kabes di famia ta skirbi e puntonan ku lo tratá e siguiente siman i ta peg’é, por ehèmpel, na frishidèr kaminda henter e famia por mir’é. Esaki por lanta ekspektativa i duna e famia chèns pa prepará si ta nesesario.

10. Kon un publikadó ku ta biba su so por usa su anochi di Adorashon Komo Famia?

¹⁰ Kiko si Ta Mi So Mester Studia? Esnan ku ta biba nan so por usa e anochi di Adorashon Komo Famia pa hasi nan estudio personal. Un bon programa básiko pa estudio personal mester inkluí lesamentu di Beibel, preparashon pa e reunionnan i lesamentu di E Toren di Vigilansia i ¡Despertad! Banda di esei, algun publikadó tin un proyekto di investigashon bíbliko. De bes en kuando, nan por invitá un otro publikadó òf un famia pa nan trata un tópiko bíbliko.

11, 12. Kiko ta algun benefisio ku Adorashon Komo Famia riba un base regular ta trese?

¹¹ Ki Benefisio Adorashon Komo Famia Riba un Base Regular Ta Trese? Esnan ku ta partisipá den adorashon berdadero ku henter nan kurason ta hala mas serka di Yehova. Ademas, famianan ku huntu ta partisipá den adorashon ta fortalesé e lasonan di famia. Un pareha kasá a skirbi tokante e bindishonnan ku nan a risibí: “Komo un pareha pionero regular sin yu, nos ta antisipá e anochi di Adorashon Komo Famia. Nos ta sinti ku nos ta hala mas serka otro i mas serka nos Tata selestial. Awor, ora nos lanta mainta riba e dia ku nos a pone e estudio, nos ta bisa: ‘Rei ki dia awe ta? Dia di Adorashon Komo Famia!’ ”

¹² E areglo di un anochi di adorashon komo famia ta yuda famianan ku ta hopi okupá tambe. Un mama soltera ku tin dos yu hòmber i ta traha komo pionero regular a skirbi: “Den pasado kasi nos no tabatin estudio di famia. Pa motibu ku mi tabata kansá, nos tabata ten’é de bes en kuando. Simplemente mi no por a haña un manera pa hink’é den mi programa. Pues, mi ta skirbi pa gradisí boso mashá pa e anochi di Adorashon Komo Famia. Nos ta logra tene nos estudio di famia regularmente i ta saka benefisio.”

13. Di kiko e benefisio ku e famia lo saka ta dependé?

¹³ Meskos ku e areglo di sabat, e anochi di Adorashon Komo Famia ta un regalo di nos Tata selestial ku por yuda famianan. (Sant. 1:⁠17) E manera ku e famianan israelita a usa nan sabat a determiná kuantu nan a benefisiá den sentido spiritual. Meskos tambe, e manera ku nos ta usa e anochi ku nos a haña pa adorashon komo famia lo determiná kuantu benefisio nos famia lo saka. (2 Kor. 9:⁠6; Gal. 6:​7, 8; Kol. 3:​23, 24) Ora e famia hasi bon uso di e areglo akí, nan tambe lo por ekspresá meskos ku e salmista: “Ma pa loke t’ami, ta bon pa mi keda serka di Dios; mi a hasi Señor DIOS mi refugio.”​—⁠Sal. 73:⁠28.

[Komentario na página 5]

E anochi di Adorashon Komo Famia no mester ta laf ni demasiado serio, ya ku nos ta sirbi un Dios felis i esei mester ta bisto durante e anochi ei

[Kuadro na página 6]

WARDA ESAKI

Algun Sugerensia pa e Anochi di Adorashon Komo Famia

Beibel:

• Lesa un porshon di e lesamentu semanal di Beibel. Kaminda esei ta aplikabel, un miembro di famia por lesa e partinan di e naradó i e otronan por lesa e partinan di e otro personahenan.

• Hunga e esenanan di un porshon di e lesamentu di Beibel.

• Di antemano tur miembro di famia ta lesa e kapítulonan di Beibel asigná i ta skirbi ún òf dos pregunta ku e tin. Riba e dia di estudio nan ta sinta huntu pa buska informashon di tur e preguntanan.

• Traha un karchi kada siman ku un versíkulo di Beibel riba dje i purba splik’é i memoris’é. Forma un kolekshon di e karchinan ei, anto repasá nan tur siman pa mira kuantu teksto boso por kòrda.

• Skucha grabashon di e lesamentu di Beibel miéntras kada un di boso ta siguié den su Beibel.

Reunion:

• Prepará parti di e reunion huntu.

• Train e kantikanan di Reino di e siguiente reunion.

• Si un miembro di famia ta bai tin un parti den e Skol di Ministerio Teokrátiko òf un demostrashon den e Reunion di Sirbishi, duna sugerensianan kon pa presentá esaki òf lag’é present’é pa e famia.

Nesesidat di e Famia:

• Trata informashon for di e bukinan Hóbennan Sa Puntra òf e buki Siña for di e Gran Maestro.

• Train kon pa trata ku situashonnan ku por surgi na skol.

• Laga mayornan i yunan kambia ròl. E yunan lo investigá un tópiko i rasoná ku e mayornan riba e tópiko ei.

Sirbishi:

• Praktiká presentashonnan ku boso lo usa den sirbishi den fin di siman.

• Papia riba metanan realístiko ku e famia por pone pa oumentá nan partisipashon den sirbishi durante e temporada di Memorial òf fakansi.

• Duna kada miembro di famia un par di minüt pa buska informashon pa kontestá preguntanan ku por lanta den sirbishi i despues praktiká esakinan.

Sugerensianan Adishonal:

• Lesa huntu un artíkulo for di un revista resien.

• Laga kada miembro di famia lesa di antemano un artíkulo ku ta fasin’é for di un revista resien anto despues lag’é konta kiko el a lesa.

• De bes en kuando invitá un publikadó òf un pareha pa sinta huntu ku boso durante e anochi di Adorashon Komo Famia i kisas boso por entrevistá nan.

• Wak un di nos vidionan i papia riba dje.

• Konsiderá tópikonan for di “Los jóvenes preguntan” òf “Actividades para la familia” for di e ¡Despertad!

• Trata artíkulonan for di e seri “De padres a hijos” òf “El rincón del joven” den La Atalaya.

• Lesa i papia riba un parti di e Anuario di mas resien òf un publikashon ku a sali na e último kongreso di distrito.

• Repasá puntonan prinsipal di e kongreso òf asamblea ku a kaba di pasa.

• Opservá Yehova su kreashon, anto papia riba loke e ta siña nos di Yehova.

• Traha huntu riba un sierto proyekto, sea un makèt, un mapa òf tabèl.