Kon pa Kultivá un Relashon Íntimo ku Yehova
1 “Durante e último 20 añanan aki mi a eksistí den e bèrdat dor di solamente bai reunion i sirbishi di vèlt,” un ruman muhé a atmití. Sin embargo, el a sigui bisa: “Mi a yega n’e konklushon ku ounke e kosnan aki ta importante, nan so no por sostené mi ora kosnan kuminsá bira difísil. . . . Awor mi ta realisá ku mi tin ku reahustá mi manera di pensa i kuminsá un programa di studio signifikativo pa mi por ègt siña konosé Yehova, stim’é i apresiá loke su Yu a duna nos.”
2 Pa bo kultivá un relashon personal íntimo ku Yehova, bo tin ku hasi esfuerso. E ta eksigí mas ku djis sigui un rutina di aktividat kristian. Si nos no ta komuniká regularmente ku Yehova, ku tempu e por bira pa nos manera un persona ku un tempu tabata nos bon amigu pero ku nos a pèrdè kontakto kuné. (Rev. 2:4) Laga nos analisá kon un studio personal di Beibel i orashon por yuda nos kultivá un relashon íntimo ku Yehova.—Sal. 25:14.
3 Orashon i Meditashon Ta Vital: Studio personal ku ta alimentá nos kurason ta enserá mas ku djis hala strepi bou di palabranan klave den e informashon ku nos ta studia i buska e tekstonan sitá. E eksigí pa nos reflekshoná riba loke e informashon ta revelá tokante Yehova su kamindanan, su normanan i personalidat. (Eks. 33:13) Ora nos komprondé asuntunan spiritual, esaki ta influensiá nos emoshonnan i ta motivá nos pa pensa riba nos propio bida. (Sal. 119:35, 111) Nos mester hasi studio personal ku e meta pa hala mas serka Yehova. (Sant. 4:8) Pa hasi un studio serio, nos tin mester di tempu i un ambiente apropiá. I si nos kier studia riba un base regular, nos tin mester di disiplina tambe. (Dan. 6:10) Ounke bo bida ta hopi drùk, bo ta apartando tempu tur dia pa bo meditá riba Yehova su maravioso kualidatnan?—Sal. 119:147, 148; 143:5.
4 Orashon sinsero ta un parti vital di un studio personal signifikativo. Pa e bèrdat di Beibel stimulá nos kurason i motivá nos pa “ofresé na Dios un sirbishi aseptabel ku reverensia i temor,” nos tin mester di e spiritu santu di Dios. (Heb. 12:28) P’esei, kada bes ku nos ta bai studia nos tin roga Yehova pa su spiritu santu promé. (Mat. 5:3, NW, nota na pia di página) Ora nos ta meditá riba e Skritura i ta usa e literatura pa studia Beibel ku e organisashon di Yehova ta perkurá, nos ta habri nos kurason pa Yehova. (Sal. 62:8) Studiando di e forma aki, ta un akto di adorashon via kua nos ta ekspresá nos deboshon na Yehova i fortalesé nos relashon kuné.—Hudas 20, 21.
5 Manera ta e kaso den tur relashon, nos mester traha kontinuamente riba nos relashon ku Yehova pa e por sigui krese durante henter nos bida. P’esei, laga nos saka tempu tur dia pa hala serka Dios, pasobra nos sa ku e ora ei, e na su turno lo hala serka nos.—Sal. 1:2, 3; Efe. 5:15, 16.
[Questions]
1. Kiko un ruman muhé a realisá relashoná ku su rutina spiritual?
2. Dikon ta importante pa nos kultivá un relashon íntimo ku Yehova?
3. Kon nos studio personal mester ta pa e yuda nos hala serka Dios?
4. Kon orashon promé ku studio personal ta yuda nos kultivá un relashon íntimo ku Yehova?
5. Dikon ta importante pa nos meditá riba e Palabra di Dios tur dia?