Kon Nos Por Yuda Kasánan Ku No Ta Testigu?
1 Hopi sirbidó di Yehova ta kasá ku hende ku ta amigabel ku rumannan i ku ta mustra interes den e kongregashon. Pero nan ta yega te ei, nan no ta bira sirbidó di Dios. Esposo di un di nos rumannan a atmití: “E idea di bai di kas pa kas tabata un opstákulo grandi pa mi.” Otronan kisas tin ku vense kustumbernan ku Beibel ta desaprobá, òf podisé nan ta pensa ku nan lo no por sigui un programa teokrátiko drùk manera nan kasá. Kon nos por yuda nan?
2 Mustra Interes Personal: Si nos ta mustra interes personal den otro hende i ta tuma nota di loke ta nan preokupashonnan, esei lo por habri kaminda pa nan reakshoná faborabel riba e bèrdat di Beibel. (Fil. 2:4) Kasánan ku promé no tabata Testigu, hopi bes ta menshoná e interes amoroso ku otro Testigunan a mustra den nan. E esposo ku nos a sita anteriormente a splika: “José, un ansiano den e kongregashon, a mustra interes spesial den mi. Mi ta pensa ku ta su animashon a pone ku finalmente mi a kuminsá studia seriamente.” Un otro esposo ta kòrda ku e rumannan ku tabata bishit’é a hasi esfuerso pa papia tokante su interesnan. El a bisa: “Mi a kuminsá mira e religion [di mi kasá] for di un punto di bista kompletamente diferente. Su amistatnan tabata hende hopi inteligente ku por a kòmbersá riba vários tópiko.”—1 Kor. 9:20-23.
3 Duna Yudansa Práktiko: Tin kasánan ku no ta Testigu ku a keda impreshoná tambe dor di e yudansa bondadoso ku nan a haña. (Pro. 3:27; Gal. 6:10) Un biaha ku un esposo ku no tabata Testigu su outo a daña, un hóben Testigu a dun’é un man. E ta kòrda: “E kos ei a impreshoná mi mashá.” Un otro ruman hòmber a pasa henter un dia ta yuda un ruman muhé su kasá ku no ta Testigu, sera su kurá. Segun ku nan tabata traha i papia ku otro, nan a sera amistat. Dos siman despues, e hòmber a aserká e ruman hòmber i a bis’é: “A yega tempu pa mi hasi algun kambio den mi bida. Bo ke studia Beibel ku mi?” El a progresá masha lihé i awor e ta un Testigu batisá.
4 Segun ku nos ta buska hende meresedor den nos teritorio, laga nos sigui yuda esnan ku ta kasá ku nos rumannan den fe.—1 Tim. 2:1-4.