(Study Number 3) Ki Ora Susesonan A Tuma Lugá den e Korida di Tempu—Parti 2 [Par. 16 te ku 30]

(Parti 1—kmPA 9/04 pág. 3-6 i Parti 2 kmPA 11/04 pàg. 3-6)

E BIDA DI HESUS RIBA TERA

¹⁶ Aparentemente, e kuater relatonan inspirá di Hesus su bida riba tera a ser skirbí den e siguiente órden: Mateo (rònt di 41 di nos era), Lukas (rònt di 56-58 di nos era), Marko (rònt di 60-65 di nos era), i Juan (rònt di 98 di nos era). Manera e kapítulo anterior a splika, si nos usa e informashon na Lukas 3:1-3, i aña 14 di nos era komo komienso di e reinado di Tiberio Cesar, nos ta yega na aña 29 di nos era komo e komienso di Hesus su ministerio remarkabel riba tera. Den Mateo no ta semper e susesonan ta sigui otro den órden kronológiko, pero aparentemente e otro tres bukinan sí ta presentá mayoria di e susesonan krusial ku nan ta deskribí den e sekuensia ku nan a tuma lugá. E tabèl athunto ta kontené un resúmen di esakinan.a For di dje por mira ku e relato di Juan, ku a ser skirbí mas ku 30 aña despues di e último promé kuné, ta yena e puntonan esensial di e historia ku e otro tresnan a laga afó. Algu di interes spesial ta e echo ku aparentemente Juan ta menshoná ku tabatin kuater Pasku Hudiu durante e ministerio terenal di Hesus. Esaki ta konfirmá ku su ministerio a dura tres aña i mei, finalisando na aña 33 di nos era.b—Juan 2:13; 5:1; 6:4; 12:1; 13:1.

¹⁷ Tin mas evidensia ku ta proba ku ta na aña 33 di nos era Hesus a muri. Den e Lei di Moisés, semper 15 di nisan tabata un sabat spesial, sin importá riba ki dia di siman e kai. Pero ora e kai riba un sabat normal, e tabata bira un sabat ‘grandi,’ i Juan 19:31 ta mustra ku ta un sabat asina tabatin e dia despues ku Hesus a muri, i konsekuentemente e mester a muri riba un djabièrnè. I ni na aña 31 ni aña 32 e dia 14 di nisan no a kai riba un djabièrnè. Ta na aña 33 di nos era esei tabata e kaso. P’esei, e morto di Hesus mester a kai riba dia 14 di nisan di aña 33 di nos era.c

¹⁸ E di 70 “Siman,” Aña 29 pa 36 di Nos Era. Nos ta haña algun detaye relashoná ku transkurso di tempu den e ministerio di Hesus den Daniel 9:24-27 tambe. E profesia aki ta pronostiká ku 69 siman di aña (483 aña) lo pasa “for di e momentu ku e òrdu a wòrdu duná pa restorá i rekonstruí Yerusalèm te na e Mesias, e Prens.” Segun Nehemias 2:1-8 e palabra aki a sali “den e di binti aña di Rei Artahérhes” di Pèrsia. Ki ora Artahérhes a kuminsá reina? Su tata Hérhes, ku tabata rei promé kuné, a muri durante e di dos mitar di aña 475 promé ku nos era. Pues, Artahérhes su aña di subimentu di trono a kuminsá na 475 promé ku nos era, i tin evidensia fuerte di fuentenan griego, perso i babilonio ku ta apoyá esaki. Por ehèmpel, e historiadó griego Tusídides (kende a bira famoso pa su eksaktitut) a skirbi ku e polítiko griego Temístokles a hui bai Pèrsia “poko despues ku [Artahérhes] a subi trono.” Un otro historiadó griego di promé siglo di nos era, Diodoro Síkulo, ta duna nos e datonan nesesario pa por establesé ku Temístokles a fayesé entre aña 471 i 470 promé ku nos era. Despues ku Temístokles a hui for di su pais, el a pidi Artahérhes pèrmit pa studia idioma perso un aña largu promé ku e aparesé su dilanti, i esei a tuma lugá tambe. Pues, Temístokles no por a kuminsá biba na Pèrsia mas lat ku aña 472 promé ku nos era, i ta rasonabel pa kalkulá ku el a yega Pèrsia na aña 473 promé ku nos era. Esei a kai “poko despues ku [Artahérhes] a subi trono.”d

¹⁹ Pues, ‘e di binti aña di Artahérhes’ lo tabata 455 promé ku nos era. Si nos pone 483 aña (e 69 “simannan”) riba e fecha aki, i nos kòrda ku no tabatin un aña sero promé ku drenta nos era, nos ta yega na aña 29 di nos era komo e aña den kua “Mesias, e Prens” mester a aparesé. Hesus a bira Mesias ora el a batisá i a ser ungí ku spiritu santu, den hèrfst di e aña ei. E profesia ta indiká tambe ku “meimei di e siman e lo pone un fin na sakrifisio i ofrenda di maishi.” Esei a sosodé ora ku e sakrifisionan hudiu literal a pèrdè nan valides debí ku Hesus a sakrifiká su mes. Pa nos yega “meimei di e siman” di e aña ei, nos mester agregá tres aña i mei mas, loke ta hiba nos na lènte di aña 33 di nos era, ora ku Hesus a ser matá. Sin embargo, e mester a “hasi un aliansa firme ku hopi hende” durante henter e di 70 siman. Esaki ta referí na e konsiderashon spesial ku Yehova a tene ku e hudiunan durante e shete añanan di 29 pa 36 di nos era. Ta te despues di esei kaminda a habri pa hende ku no tabata ni hudiu ni sirkunsidá bira israelita spiritual, manera e kombertimentu di Cornelio na aña 36 di nos era ta indiká.e—Echo. 10:30-33, 44-48; 11:1.

KONTEO DI AÑA DEN E TEMPU DI E APÒSTELNAN

²⁰ Di Aña 33 pa 49 di Nos Era. Nos por tuma aña 44 komo un aña útil pa kalkulashonnan di e periodo aki. Segun Hosefo (Jewish Antiquities, XIX, 351 [viii, 2]), Herodes Agripa I a reina tres aña largu despues ku Emperador Claudio di Roma a subi na poder (na 41 di nos era). Evidensia históriko ta indiká ku e Herodes aki a muri na aña 44 di nos era. Awor, si nos wak e registro históriko di Beibel nos ta mira ku ta nèt promé ku Herodes a muri e siguiente susesonan a tuma lugá: Agabo a profetisá “pa medio di e spiritu” tokante un gran skarsedat di kuminda ku mester a bini, nan a mata apòstel Santiago ku spada, i Pedro a kai será (den temporada di Pasku Hudiu) i a sali liber milagrosamente. Pues, nos por konkluí ku tur e susesonan aki a tuma lugá na aña 44 di nos era.—Echo. 11:27, 28; 12:1-11, 20-23.

²¹ E skarsedat di kuminda ku a ser profetisá a bini na aña 46 di nos era. Pues, mester ta den e tempu ei Pablo ku Barnabas a efektuá nan ‘sirbishi di ousilio na Yerusalèm.’ (Echo. 12:25, NW) Ora nan a bolbe na Antiokia di Siria, spiritu santu a skohe nan pa e promé gira di misionero, ku a kubri Chipre i hopi stat i distrito di Asia Menor.f Probablemente e gira aki a dura di lènte di aña 47 te hèrfst di aña 48 di nos era, durante kua nan a pasa un wenter na Asia Menor. Parse ku Pablo a pasa e siguiente wenter bèk na Antiokia di Siria, loke ta hiba nos na lènte di aña 49 di nos era.—Echo. 13:1; 14:28.

²² E registro na Galationan kapítulo 1 i 2 ta parse di amplia riba e kronologia aki. Ei Pablo ta bisa ku el a hasi dos otro bishita spesial na Yerusalèm despues ku el a kombertí, unu “tres aña despues” i e otro ‘despues di 14 aña.’ (Gal. 1:17, 18; 2:1) Si nos tuma e dos sifranan aki komo sifra ordinal, di akuerdo ku kustumber di e tempu ei, i si Pablo a kombertí for di na kuminsamentu di e tempu di e apòstelnan, loke e registro ta parse di indiká, anto nos por konta ku e 3 añanan a kore di aña 34 pa 36, i e 14 añanan, di 36 pa 49 di nos era.

²³ Parse ku Pablo su di dos bishita na Yerusalèm menshoná den Galationan tabatin di haber ku e asuntu di sirkunsishon, pasobra e ta asta menshoná ku niun hende no a eksigí pa Tito, su kompañero di biahe, sirkunsidá. Si esaki tabata e mesun bishita deskribí na Echonan 15:1-35, pa haña sa e desishon tokante sirkunsishon, anto aña 49 di nos era ta kai nèt entre e promé i e di dos biahe di Pablo komo misionero. Ademas, segun Galationan 2:1-10, Pablo a usa e okashon aki pa presentá e bon notisia ku e tabata prediká dilanti di e ‘hendenan di influensia’ di e kongregashon na Yerusalèm, ‘pa miedu ku lo e tabata kore en bano.’ Lógikamente ta despues di su promé gira komo misionero e lo a entregá e informe aki na nan. Pablo a hasi e bishita aki na Yerusalèm “pa motibu di un revelashon.”

²⁴ E di Dos Biahe di Pablo Komo Misionero, Rònt di 49 pa 52 di Nos Era. Despues ku Pablo a bolbe for di Yerusalèm, el a pasa un tempu na Antiokia di Siria; pues, ora el a sali pa su di dos gira, zomer di aña 49 lo mester tabata kabando. (Echo. 15:35, 36) E di dos gira aki tabata hopi mas ekstenso ku esun promé, i a pone ku e mester a pasa wenter na Asia Menor. Probablemente, ta den lènte di aña 50 di nos era el a respondé na e yamada di Masedonia i a drenta Europa. El a prediká i organisá kongregashonnan nobo na Filipos, Tesalónika, Berea i Atenas. Esei lo kier men ku ta den hèrfst di aña 50 di nos era e lo a yega Korinto, den e provinsia di Akaya, despues di a biaha aproksimadamente 2.090 kilometer, i mayor parti di dje na pia. (Echo. 16:9, 11, 12; 17:1, 2, 10, 11, 15, 16; 18:1) Di akuerdo ku Echonan 18:11, Pablo a keda 18 luna na Korinto, loke ta hiba nos na komienso di aña 52 di nos era. Unabes ku wenter a terminá, Pablo por a nabegá bai Cesarea via Efeso. Despues ku el a subi bai hasi e kongregashon un bishita, aparentemente na Yerusalèm, el a yega bèk na su base di salida, Antiokia di Siria, probablemente den zomer di aña 52 di nos era.g—Echo. 18:12-22.

²⁵ Tin un deskubrimentu arkeológiko ku ta apoyá e idea aki, esta, ku ta di aña 50 pa 52 di nos era Pablo a bishitá Korinto pa promé bes. Ta trata aki di un fragmento di un inskripshon, un deklarashon ofisial di Emperador Claudio Cesar na e delfianonan di Gresia, ku ta kontené e palabranan aki: “[Lucio Ju]nio, Galion, . . . prokónsul.” Historiadónan en general ta di akuerdo ku e number 26, ku tambe ta aparesé den e teksto, ta referí na e echo ku Claudio a ser aklamá komo emperador pa di 26 biaha. Otro inskripshonnan ta mustra ku Claudio a ser aklamá komo emperador pa di 27 biaha, un poko promé ku dia 1 di ougùstùs di aña 52 di nos era. Un prokónsul tabata sinta pa un aña, for di komienso di zomer. Pues, parse ku Galion [Gayo] su aña komo prokónsul di Akaya a kore di zomer di aña 51, te zomer di aña 52 di nos era. “Ma miéntras ku Galion tabata prokónsul di Akaya, e hudiunan, di un akuerdo, a lanta kontra Pablo i a hib’é dilanti di tribunal.” Despues ku Galion a deklará Pablo inosente, e apòstel a keda na Korinto “basta dia mas,” i despues el a subi barku bai Siria. (Echo. 18:11, 12, 17, 18) Tur esaki ta parse di konfirmá ku ta den lènte di aña 52 di nos era Pablo a konkluí su estadia di 18 luna na Korinto. Nos ta haña un otro indikashon di tempu den e deklarashon ku ora Pablo a yega Korinto, el a “topa un hudiu ku yama Akila, nasí na Ponto, kende resientemente a bin di Italia ku su esposa Prisila, pasobra Claudio a ordená tur hudiu pa sali for di Roma.” (Echo. 18:2) Segun e historiadó Paulo Orosio di komienso di siglo sinku, Claudio a duna e òrdu di ekspulshon aki den su di nuebe aña, esta, aña 49 òf komienso di aña 50 di nos era. Pues, Akila ku Prisila por a yega Korinto algu promé ku hèrfst di e aña ei, di manera ku Pablo por a pasa einan di hèrfst di aña 50 te lènte di aña 52 di nos era.h

²⁶ E di Tres Biahe di Pablo Komo Misionero, Rònt di 52 pa 56 di Nos Era. Despues di a pasa “poko tempu” na Antiokia di Siria, Pablo a bolbe kohe rumbo pa Asia Menor, i probablemente el a yega Efeso promé ku wenter di aña 52-53 di nos era. (Echo. 18:23; 19:1) Pablo a pasa “tres luna” i despues “dos aña” siñando na Efeso, i despues di esei el a bai Masedonia. (Echo. 19:8-10) Mas despues el a rekordá e superintendentenan di Efeso ku el a sirbi meimei di nan pa un temporada di “tres aña,” pero por ta masha bon ku esaki ta djis un afronding. (Echo. 20:31) Parse ku Pablo a bandoná Efeso despues di e fiesta di “Pentekòste,” na komienso di aña 55 di nos era, i a yega te na Korinto, Gresia, na tempu pa pasa e tres lunanan di wenter ei. Despues el a bolbe den direkshon nort i yega te Filipos promé ku Pasku Hudiu di aña 56 di nos era. Djei el a subi barku i bai Cesarea via Troas i Mileto, i djei el a biaha bai Yerusalèm, i a yega promé ku Pentekòste di aña 56 di nos era.i—1 Kor. 16:5-8; Echo. 20:1-3, 6, 15, 16; 21:8, 15-17.

²⁷ E Añanan Final, di 56 pa 100 di Nos Era. Poko despues ku Pablo a yega Yerusalèm, el a kai será. Nan a hib’é Cesarea, i el a keda ei bou di kustodia pa dos aña largu te ora ku Festo a bira gobernadó na lugá di Felix. (Echo. 21:33; 23:23-35; 24:27) Aparentemente, e aña ku Festo a yega, despues di kua Pablo a sali pa Roma, tabata aña 58 di nos era. Despues ku barku a kibra ku Pablo i el a pasa wenter na Malta, nan a kompletá e biahe rònt di aña 59 di nos era, i e registro ta mustra ku el a keda prezu na Roma, predikando i siñando, durante un periodo di dos aña, te banda di aña 61 di nos era.—Echo. 27:1; 28:1, 11, 16, 30, 31.

²⁸ E registro históriko di Echonan no ta hiba nos mas leu ku esaki, pero tin indikashon ku Pablo a sali liber i a sigui ku su aktividat komo misionero dor di bai Kreta, Gresia i Masedonia. No ta konosí si el a yega te Spaña. Probablemente, Pablo a muri komo mártir na man di Emperador Nero poko despues ku el a kai prezu pa di último bes na Roma, rònt di aña 65 di nos era. Historia seglar ta bisa ku ta den yüli di aña 64 di nos era tabatin e gran kandela na Roma, i despues di esei Nero a kuminsá un persekushon pisá kontra kristiannan. Pablo su enkarselamentu ‘na kadena’ i su ehekushon despues di esei, ta pas lógikamente den e periodo aki.—2 Tim. 1:16; 4:6, 7.

²⁹ E sinku bukinan di apòstel Juan a ser skirbí despues di un periodo di persekushon inisiá dor di Emperador Domisiano. Ta ser bisá ku durante e último tres añanan di su reinado, ku a dura di 81 pa 96 di nos era, e tabata aktua meskos ku hende loko. Ta durante ku Juan tabata den eksilio na Patmos el a skirbi Revelashon, rònt di aña 96 di nos era. Su Evangelio i su tres kartanan a bini despues ku Juan a sali liber, skirbí na Efeso òf den su bisindario. E apòstel aki a muri komo último rònt di aña 100 di nos era.

³⁰ Asina nos ta mira ku dor di kompará susesonan di historia seglar ku e kronologia interno di Beibel i ku profesia, ta bira mas fásil pa nos lokalisá susesonan den Beibel den e korida di tempu. E armonia ku ta eksistí den e kronologia di Beibel ta oumentá nos konfiansa den e echo ku e Santu Skritura ta e Palabra di Dios.

[Footnotes]