Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 24 di aprel 2006. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 6 di mart te ku 24 di aprel 2006. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Ora di instruí otro hende dikon nos tin ku pousa kada bes ku nos ta kambia di pensamentu, pero kiko por stroba nos di hasi esaki? [be-PA pág. 98 §3-4] Dor di pousa nos ta duna e ouditorio chèns pa reflekshoná riba loke nos a kaba di bisa, prepará nan mente pa tende algu otro i realisá ku nos ta kambia di un idea pa otro. Ora nos ta pousa, esaki ta laga nos ideanan destaká, kousa impreshon profundo, i e ouditorio ta keda kòrda nan. Un motibu pakiko algun oradó ta pura bai di un idea pa otro sin pousa entre e ideanan ta pasobra nan ta purba kubri demasiado informashon.
2. Dikon ta importante pa nos pousa ora nos ta duna testimonio na otro hende? [be-PA pág. 99 §5–pág. 100 §4] Dor di pousa nos ta mehorá nos abilidatnan di komuniká i nos lo ta mas efikas den sirbishi. Pousa ta permití e doño di kas ekspresá su pensamentunan, loke na su turno ta anim’é pa pensa. Ora nos ta hasi bon uso di pousa, esaki por pone ku e persona ta revelá loke tin den su kurason i asina permití nos yud’é mas mihó. (Pro. 20:5)
3. Dikon énfasis ku ta komuniká sentido ta importante ora di duna un diskurso, i kon nos por logr’é? [be-PA pág. 101 §1-5, kuadro] Ora nos ta enfatisá e palabra- i ekspreshonnan klave korektamente, nos ta keda ku e atenshon di e ouditorio segun ku nos ta konvensé i motivá nan. Nos por enfatisá palabra dor di subi volúmen di nos stèm, mustra mas intensidat di sintimentu, papia mas slow, pousa, usa gesto i ekspreshon di kara i dor di kambia tono di bos. Pa por usa énfasis korektamente, nos tin ku komprondé nos informashon bon i deseá sinseramente pa nos ouditorio retené e informashon i aplik’é. (Neh. 8:8)
4. Kon nos por hasi sigur di pone énfasis riba ideanan prinsipal ora nos ta lesa den públiko? [be-PA pág. 105 §1-6] Di antemano nos mester tin na mente e ideanan prinsipal di henter e informashon. Esaki lo yuda nos saka afó kua puntonan nos mester enfatisá. Ora nos tin ku lesa e paragrafnan for di un publikashon na bos haltu, sea na un estudio di Beibel òf na un reunion di kongregashon, nos mester enfatisá e kontestanan riba e preguntanan di e lès i tambe e pensamentunan konektá ku e suptemanan skirbí ku lèter diki.
5. Dikon ta importante pa nos tin un volúmen adekuá ora nos ta instruí otro hende, i kon nos por determiná si nos ta papia sufisiente duru? [be-PA pág. 107-8] Si hende no por tende nos bon, nan mente por kuminsá dual i e balor di loke nos ta bisa por bai pèrdí. Esei por stroba nos di motivá nos ouditorio pa nan aktua riba loke nan ta tende. E reakshon di e ouditorio ta un bon indikashon di si nos volúmen ta adekuá òf no. Si nos ripará ku algun hende ta fòrsa pa tende, nos tin ku papia mas duru. E tamaño i tipo di ouditorio i zonidunan ku ta kita hende su tinu tambe ta determiná kon duru nos tin ku papia.
PARTI NUM. 1
6. Den ki sentido e situashon di kristiannan djawe ta meskos ku esun di Ester i Mardokeo, i kon nos por imitá nan ehèmpel? [si-S pág. 94 §17] Meskos ku Ester i Mardokeo, kristiannan awe tambe ta biba bou di “outoridatnan ku ta goberná” den un mundu straño i nan ta hasi esfuerso pa ta siudadanonan ku ta kumpli ku lei, ku ta duna “Cesar loke ta di Cesar, i Dios loke ta di Dios.” (Rom. 13:1; Luk. 20:25; Est. 1:1; 2:5, 7, 8, 21-23) Sin embargo, kristiannan mester ta konsiente ku obedensia na outoridatnan di e mundu aki ta relativo na komparashon ku e boluntat di Dios. Mardokeo a demostrá esei ora el a nenga di obedesé e òrdu pa bùig pa Haman e agagita. (Est. 3:1-4; 5:9) Tambe kristiannan por buska nan derechonan legal ora esaki ta nesesario. (Est. 4:6-8; Echo. 25:11)
7. Di kiko Salomon tabata papia ora el a bisa ku “tur tabata banidat i korementu tras di bientu”? (Ekl. 2:11) [w04-PA 15/10 pág. 4 §3-4] Den e konteksto, Salomon a papia di un bida ku ta konsentrá riba plaser i akumulashon di tur loke e mundu aki tin di ofresé den sentido material. Salomon a traha kas, e tabatin hardin, hòfi, sirbidó, krio di bestia, propiedat i rikesa. E tabata interesá den arte tambe. Pero niun di e kosnan aki no tabatin balor permanente i p’esei no a dun’é un satisfakshon duradero. (Ekl. 2:1-10) El a yega n’e konklushon ku hende ta haña satisfakshon permanente dor di sigui tras di balornan spiritual. (Ekl. 12:13)
8. Kon nos por kultivá amor pa Dios? (Mar. 12:30) [w04-PA 1/3 pág. 19-21] Nos por kultivá amor pa Dios dor di oumentá nos konosementu di dje i di su propósito mediante un estudio signifikativo di su Palabra, e Beibel. Tambe nos por meditá riba su aktividatnan i pensa kon loke nos ta siña mester influensiá nos. (Sal. 77:6, 11, 12) Nos amor pa Yehova por krese tambe ora nos ta rekordá e bon eksperensianan ku nos a disfrutá di dje segun ku nos ta sirbi Yehova i hasi kosnan na su manera. (Pro. 3:5, 6)
9. Kiko ta e diferensia entre balornan spiritual i materialismo? [w04-PA 15/10 pág. 5-7] Siguimentu tras di balornan spiritual ta hiba na felisidat i benefisio eterno, miéntras ku materialismo ta hiba solamente na un satisfakshon temporal ku ta resultá den morto. (Pro. 11:4; Mat. 5:3, NW; 2 Kor. 4:18) Hopi bes materialismo ta tenta hende pa buska plaka, posishon i poder usando medionan tramposo òf desonesto, miéntras ku balornan spiritual ta transformá hende su manera di pensa for di ke haña so i pon’é konsentrá riba duna. (Isa. 48:18; 1 Tim. 6:9, 10)
10. Kiko por yuda nos skucha na asamblea i kongreso sin ser distraí? [be-PA pág. 15-16] Un faktor importante ta pa sosegá sufisiente anochi pa asina nos por presta atenshon. Nos por graba e tema di dia bon den nos mente, wak e tema di kada diskurso, i purba imaginá kiko lo ser presentá. Ora nos ta hasi anotashon, esei tambe ta yuda nos sigui e liña di e diskurso i presta atenshon na e programa.
LESAMENTU SEMANAL DI BEIBEL
11. Dikon nan a tapa kara di Haman? (Est. 7:8) Haman mes no a tapa su kara komo muestra di bèrgwensa òf di remordimentu. Ta parse ku ta e funshonarionan di korte a tapa su kara posiblemente komo un símbolo di bèrgwensa òf kondenashon. Probablemente esaki tabata e promé kos ku nan tabata hasi ora nan ta bai ehekutá un sentensia di morto. [1, w06-PA 1/3 “E Palabra di Yehova Ta Bibu—Puntonan Sobresaliente di e Buki di Ester”; w86-S 15/3 pág. 25]
12. Ki tipo di spiritu a influensiá e pensamentu di Elifaz? (Jòb 4:15, 16) [w05-PA 15/9 pág. 26 §2] E tono krítiko di Elifaz su palabranan ta mustra ku e spiritu sigur no tabata un di e angelnan hustu di Dios. (Jòb 4:17, 18) Elifaz a haña su mes bou di influensia di un spiritu malbado. Su komentarionan a reflehá un pensamentu malbado. Si no ta asina, dikon Yehova a reprendé Elifaz i su dos amigunan pa e mentiranan ku nan a saka? (Jòb 42:7)
13. E deklarashonnan di Jòb na Jòb 7:9, 10 i Jòb 10:21 ta indiká ku e no tabata kere den resurekshon? Nò. Jòb tabata papia di un futuro inmediato. Kisas e tabata ke men ku si e tabata bai muri, niun di su kontemporáneonan lo no a mir’é mas. For di nan punto di bista, lo e no a bolbe bèk ni lo no a haña rekonosementu mas sino te na e debido tempu di Dios. Por ta tambe ku Jòb tabata ke men ku ningun hende no por sali for di Seol riba su propio forsa. Jòb 14:13-15 ta mustra bon kla ku Jòb a kere den un futuro resurekshon. [3, w06-PA 15/3 “E Palabra di Yehova Ta Bibu—Puntonan Sobresaliente di e Buki di Jòb”]
14. Kiko Jòb por tabata ke men ku e ekspreshon “mi ta skapa ku e kueru di mi djente”? (Jòb 19:20, NW) Ta parse ku nos no tin nodi purba splika e deklarashon di Jòb a base di loke sientífikonan a deskubrí resientemente ku yudansa di mikroskop. (it-2-S pág. 663) Dor di bisa ku el a skapa ku e kueru di algu ku aparentemente no tin kueru, Jòb lo tabata ke men ku el a skapa ku kasi nada. [5, w06-PA 15/3 “E Palabra di Yehova Ta Bibu—Puntonan Sobresaliente di e Buki di Jòb”]
15. Kiko Jòb tabata ke men ora el a bisa “lo mi no bandoná mi integridat,” i kiko nos por siña for di esaki? (Jòb 27:5) Ta Jòb so por a bandoná su propio integridat ya ku un persona su integridat òf fieldat ta dependé di su amor pa Dios. P’esei, pa nos por mantené nos integridat, nos tin ku kultivá un amor fuerte pa Yehova. [6, w06-PA 15/3 “E Palabra di Yehova Ta Bibu—Puntonan Sobresaliente di e Buki di Jòb”]