“Sabiduria Ta Wòrdu Hustifiká pa Medio di Su Obranan”
1. Kon algun hende ta mira nos trabou?
1 Tin biaha nos por topa un doño di kas ku ta reakshoná negativo pa motibu ku e no a kompronde nos bon òf pasobra el a haña informashon robes tokante Testigunan di Yehova. Kisas informenan negativo den medionan di komunikashon a influensiá nan. Den algun lugá hende a tilda nos di ta “un sekta peligroso.” Kon nos mester reakshoná ora nos haña nos ku e tipo di krítika ei?
2. Kiko por yuda nos pa no desanimá ora nos haña krítika?
2 Keda ku un Aktitut Positivo: Den promé siglo, hende hopi bes tabata mal komprondé Hesus i otro sirbidónan di Yehova i tabata papia malu di nan. (Echo. 28:22) Sinembargo, nan no a laga krítika pone nan sinti bèrgwensa di nan ministerio. Hesus a bisa: “Sabiduria ta wòrdu hustifiká pa medio di su obranan.” (Mat. 11:18, 19) El a sigui hasi e boluntat di su Tata ku zelo i tabatin konfiansa ku hende ku realmente tabata kier a haña e bèrdat lo bin mira e balor di e bon notisia. Ora nos kòrda kon hende a trata e Yu di Dios, esei ta yuda nos pa no desanimá.
3. Dikon informenan negativo i oposishon no mester laga nos keda sorprendí?
3 Hesus a indiká ku mundu lo odia su siguidónan meskos ku nan a odi’é. (Juan 15:18-20) P’esei, informenan negativo i oposishon no ta algu ku mester laga nos keda sorprendí. En realidat, nos por ferwagt ku nan lo bira mas komun segun ku e fin ta yega mas serka i segun ku Satanas ta bira mas furioso. (Rev. 12:12) Nos por alegrá pasobra e kosnan ei ta indiká ku pronto e mundu di Satanas lo ser destruí.
4. Si hende reakshoná negativo riba e bon notisia, kiko nos mester hasi?
4 Laga Nos Reakshoná ku Grasia: Ora un hende reakshoná negativo, semper nos mester purba kontest’é ku grasia i suavedat. (Pro. 15:1; Kol. 4:5, 6) Si ta posibel, kisas nos por splika un doño di kas ku ta sinsero ku tin hopi informashon inkorekto tokante Testigunan di Yehova òf nos por puntr’é dikon e ta pensa asina. Nos reakshon suave kisas por pon’é kuestioná loke el a tende tokante Testigunan di Yehova i skucha un otro biaha ora un Testigu bishit’é. Sinembargo, si e doño di kas ta hopi rabiá, kisas ta mihó pa terminá e kòmbersashon na un manera respetuoso. Nos por tin sigur ku sea loke sea hende ta pensa di nos, Yehova ta konsiderá nos ministerio importante.—Isa. 52:7.