Kaha di Pregunta

◼ Den ki maneranan práktiko nos por yuda pioneronan?

Rònt mundu, mas o ménos 800.000 ruman a sirbi komo pionero regular i spesial durante e aña di sirbishi 2009. E sirbidónan di tempu kompletu akí ta ofresé e promé fruta⁠—⁠e mihó parti⁠—⁠di nan tempu, energia i rekursonan material pa nan por plama e bon notisia di Reino. (Pro. 3:⁠9) Yehova ta masha kontentu ku e esfuerso ku nan ta hasi! Den ki maneranan nos por imitá Yehova i kontribuí na nan goso i perseveransia den e rasgo di sirbishi akí?

Nos palabranan bon skohí por ta un gran animashon pa nan sigui traha pionero. (Pro. 25:⁠11) Nos lo por ahustá nos programa semanal di manera ku nos por traha ku nan den sirbishi? Ora nos ta traha huntu, kisas nos por sugerí pa usa nos outo en bes di esun di nan. Ma si un pionero ta usa su outo, nos lo por ofresé un kontribushon pa yud’é kubri su gastu. (1 Kor. 13:⁠5; Fil. 2:⁠4) Un otro manera ku nos por apoyá e pioneronan ta ora nos ta mustra hospitalidat i invitá nan de bes en kuando pa bin kome serka nos.​—⁠1 Ped. 4:​8, 9.

Beibel ta garantisá ku Yehova lo proveé loke ta nesesario pa esnan ku ta buska su Reino promé. (Sal. 37:⁠25; Mat. 6:⁠33) Un manera ku Yehova ta hasi esaki ta pa medio di nos amoroso hermandat kristian. (1 Juan 3:​16-⁠18) Ta klaru ku pioneronan no ta ferwagt ku ta otro hende mester kumpli ku nan responsabilidatnan finansiero. I kisas nan mes no ta laga otro hende sa ora ku nan tin mester di algu. Sinembargo, si nos ta alerta i atento, nos por yuda pioneronan i asina “kompensá loke nan falta” na maneranan práktiko.​—⁠2 Kor. 8:​14, 15.

Ora Febe, un predikadó zeloso di e kongregashon di Senkrea den promé siglo a bai Roma, Pablo a animá e rumannan na Roma pa: “Risibié den Señor na un manera digno di e santunan, i . . . yud’é den kualke asuntu ku e por tin mester di boso.” (Rom. 16:​1, 2) Nos tin oportunidat pa demostrá e mesun apoyo amoroso na e pioneronan regular i spesial den nos kongregashon ku ta prediká e bon notisia sin stòp.​—⁠Echo. 5:⁠42.