Eksperensia

◼ Australia: Tempu John tabata mucha, e tabata bai misa, pero despues, e hòmber bon siñá akí a bira un “fiel ateista.” Un pionero a lag’é ku e foyeto Bida Ta Obra di un Kreador? i na e siguiente bishita el a laga e foyeto El origen de la vida. Pa por a kultivá John su interes, e pionero a sigui trese e último revistanan i tabata resaltá kualke artíkulo di kreashon òf profesia di Beibel. Ora e pionero a sinti ku John tabata kla, el a ofres’é e buki E Bijbel—e Palabra di Dios of e palabra di hende? Despues di lesa e buki, John a kuminsá yama su mes un “agnóstiko mansu.” Riba un dia e pionero a mustra John e buki Beibel Ta Siña, el a bai kuné na paragraf 8 di página 20 i paragraf 13-16 di página 23-24. E tekstonan menshoná den e informashon a hasi asina un impreshon riba John ku el a bisa: “Kisas mi tin ku duna Beibel un chèns mas.”

◼ México: Un mener a bisa un publikadó ku e no ta kere ku Beibel ta inspirá pa Dios. E publikadó a bis’é ku lo e ke mustr’é dikon Beibel sí ta inspirá di Dios. Loke e mener a siña for di Beibel, despues di algun bishita, a kuminsá traha ku su konsenshi. Ora el a siña tokante e normanan moral di Dios, el a keda hopi impreshoná. El a bisa e publikadó: “Na promé instante ora ami ku bo tabata lesa Beibel huntu, e konsehonan a parse manera di kualke otro buki i nan no a bisa mi nada. Pero awor sí, spesialmente su konsehonan enkuanto moralidat, ta traha ku mi.”

◼ Merka: Un dia, un pareha ku tabata partisipá den e aktividat spesial di prediká den área públiko den statnan grandi, a topa un señora di Taiwan. E tabata kere den Dios pero a sinti ku Beibel ta pa hende di paisnan oksidental. El a bini na e stènt di literatura pasobra aunke e tabata bon pará, el a sinti un bashí. El a pensa ku Beibel lo por a yud’é haña un propósito den bida. E pareha a kuminsá studia kuné for di e buki Beibel Ta Siña huntu ku e foyeto Cómo hallar paz y felicidad duraderas. En bes di studia kapítulo 2 di e buki, nan a bai den e foyeto i trata e sekshon titulá: “Una guía para toda la humanidad.” Despues di analisá e promé seis paragrafnan den e sekshon ei, e señora a bisa ku el a keda asombrá ku Beibel ta asina úniko kompará ku otro bukinan religioso. Despues di konsiderá profesianan di Beibel ku a kumpli, el a bisa: “Mi no ta kere ku tin niun otro buki ku ta asina eksakto.”

◼ Hapon: Aunke un doño di kas a bisa un publikadó ku e no ta kere den Dios, e publikadó a sigui hasié algun bishita kòrtiku i mustr’é e artíkulonan den ¡Despertad! titulá “¿Casualidad o diseño?” Tiki tiki, e hòmber su punto di bista a kambia, i el a kuminsá atmití ku kisas tin un Kreador. Awor e ta kere ku tin un Dios, i e publikadó ta studia kuné for di e foyeto Dios Tin Bon Notisia pa Nos!

◼ Canada: Un ruman muhé a laga nos último revistanan ku un señora ku nèt tabata sali kas i kana bai su outo. Ora e ruman muhé a bishit’é bèk, e señora a bis’é flèt ku e no ta interesá i ku e no ta kere den Dios. E ruman muhé a disidí di no entregá pero a trese e foyeto Cómo lograr una vida llena de satisfacción p’e. Ora e ruman muhé a topa e señora na kas, el a bis’é ku aunke e tabata sa ku e señora no ta kere den Dios, el a keda pensa riba dje pasobra e ruman tabata sa ku e ta un mama soltero. El a bai den e foyeto na paragraf 4 di página 6, ku ta splika unda un hende por haña bon konseho. Anto el a animá e señora pa lesa e sugerensianan den lès 2 enkuanto kon pa lanta yu. E señora a tuma e foyeto felis i kontentu.