Referensia pa Material i Tarea pa Reunion Nos Bida i Sirbishi Kristian
12-18 DI OUGÙSTÙS
TESORONAN DI E PALABRA DI DIOS | TITO 1– FILEMON
Buska Hoyanan Spiritual
w89-S 15/5 31 §5
Pregunta di Lektor
Pablo sigur no tabata di akuerdo ku niun forma di prehuisio ku hende tabatin kontra e hendenan di Kreta. Nos por tin sigur di esei, pasobra Pablo tabata sa ku tabatin kristian na Kreta ku tabatin Dios su aprobashon i ku a ser ungí ku spiritu santu di Dios. (Echonan 2:5, 11, 33) Tabatin sufisiente kristian pa forma kongregashon den “kada stat.” Aunke e kristiannan ei no tabata perfekto, nos por tin sigur ku nan no tabata gañadó ni haragan ni floho; sino nan lo no por a sigui disfrutá di Yehova su aprobashon. (Filipensenan 3:18, 19; Revelashon 21:8) Manera ta sosodé den tur pais, probablemente tabatin hende di kurason sinsero na Kreta ku tabata masha tristu pa motibu di e normanan moral baho ku nan tabata mira rònt di nan i tabata kla pa aseptá e mensahe kristian.—Ezekiel 9:4; kompará ku Echonan 13:48.
19-25 DI OUGÙSTÙS
TESORONAN DI E PALABRA DI DIOS | HEBREONAN 1-3
Buska Hoyanan Spiritual
it-1-S 1211 §3
Imágen
Semper Hesus a reflehá e kualidatnan di su Tata na e mesun grado ku su Tata?
Dios su Yu primogénito, kende despues a bira e hòmber Hesus, ta e imágen di su Tata. (2Ko 4:4) Ta mas ku klaru ku Dios tabata papia ku Hesus ora Dios a bisa: “Laga nos traha hende segun nos imágen.” Pa e motibu ei, nos por bisa ku for di tempu ku Dios a krea Hesus, Hesus tabata reflehá e kualidatnan di su Tata, e Kreador. (Gén 1:26; Hua 1:1-3; Kol 1:15, 16) Tempu ku e tabata un hòmber perfekto riba tera, el a reflehá e kualidatnan i personalidat di su Tata te na e grado di mas haltu ku un hende lo por a reflehá. P’esei, e por a bisa ku “esun ku a mira mi, a mira e Tata tambe.” (Hua 14:9; 5:17, 19, 30, 36; 8:28, 38, 42) Sinembargo, Hesus lo a parse su Tata mas ainda ora ku el a ser resusitá komo un kriatura selestial i a risibí “tur outoridat den shelu i riba tera” di su Tata, Yehova Dios. (1Pe 3:18; Mat 28:18) Komo ku Dios a halsa Hesus na “un puesto mas haltu,” e Yu di Dios ta reflehá e gloria di su Tata na un grado mas haltu ku promé ku el a baha for di shelu pa bini tera. (Flp 2:9; Heb 2:9) Awor Hesus ta e “kopia eksakto di [Dios] su personalidat.”—Heb 1:2-4.
it-1-S 478 §2
Shelu
E palabranan na Salmo 102:25 i 26 ta apliká na Yehova Dios. Pero apòstel Pablo ta sita i apliká e palabranan akí na Hesukristu. El a hasi esei, pasobra Dios a usa su Yu unigénito pa krea universo. Pablo a mustra e diferensia entre e Yu di Dios i kreashon. Pablo a bisa ku si Dios tabata ke, Dios lo por a “lora [shelu i tera] manera un mantel” i asina pone fin na nan eksistensia. Di otro banda, Pablo a bisa ku e Yu di Dios sí lo eksistí pa semper.—Heb 1:1, 2, 8, 10-12.
26 DI OUGÙSTÙS–1 DI SÈPTÈMBER
TESORONAN DI E PALABRA DI DIOS | HEBREONAN 4-6
Buska Hoyanan Spiritual
it-1-S 851 §1
Speransa
E speransa kristian akí di bida eterno i un kurpa ku no ta kaba na nada ku hende ku a “risibí e yamada selestial” lo haña ta un speransa sigur i algu ku por konfia den dje. (Heb 3:1) E speransa akí ta basá riba dos kos den kua ta imposibel pa Dios gaña: su promesa i su huramentu. Ademas, e speransa ei por bira realidat danki na Kristu, kende awor ta den shelu komo un persona inmortal. P’esei, Beibel ta bisa ku e speransa ei ta manera “un anker pa nos alma; e ta sigur i tambe firme i ta hiba nos te tras di e kortina [meskos ku e sumo saserdote tabata drenta e Santísimo riba Dia di Ekspiashon]. Einan esun ku a bai nos dilanti pa habri kaminda a drenta, esta, Hesus, kende a bira sumo saserdote na e manera di Melkísedèk pa semper.”—Heb 6:17-20.