Loke Abo Por Hasi pa Biba den e Mundu Nobo

Den e artíkulonan anterior, nos a mira ku Dios pronto lo kaba ku tur e hendenan malbado huntu ku tur mundu su problemanan. Dikon nos por tin sigur ku esaki lo sosodé? Pasobra Dios su Palabra, Beibel, a primintí ku:

“Mundu ta pasa bai.”—1 HUAN 2:17.

Nos tin sigur ku hende lo sobrebibí pasobra e mesun teksto ei ta sigui bisa ku:

“Esun ku ta hasi e boluntat di Dios ta keda pa semper.”

Pues, si bo ke sobrebibí, bo tin ku hasi Dios su boluntat. Pero, pa bo por haña sa kiko Dios su boluntat ta, bo tin ku siña konosé Dios promé.

“SIÑA KONOSÉ DIOS” PA BO POR SOBREBIBÍ E FIN

Kolekshon di plachi: 1. Un zùster na hospital ta sintá riba flur, kansá i agitá. 2. Den kafetaria durante su pousa, e ta mira un kolega kontentu di dje ta lesa un revista. 3. E kolega ta lesa un teksto di Beibel p’e i ta dun’é un karchi di kontakto di jw.org.

Hesus a bisa: “Pa haña bida eterno, nan tin ku siña konosé bo, e úniko Dios berdadero.” (Huan 17:3) Pues, pa sobrebibí e fin i biba pa semper, bo tin ku siña konosé Dios. Esei ta muchu mas ku djis aseptá ku e ta eksistí òf djis sa un par di kos tokante dje. Bo tin ku bira su amigu. Por ehèmpel, si bo ke bira mas será ku un amigu di bo, lo bo hasi esfuerso pa pasa mas tempu kuné. Meskos ta konta si bo ke bira amigu ku Dios. Awor, ban wak algun bèrdat den Beibel ku por yuda nos forma un amistat ku Dios i manten’é.

E Bèrdatnan Ku Nos Ta Siña for di Beibel

Semper Dios tabata ke pa hende biba den un paradeis.

Dios a krea e promé hendenan, Adam ku Eva, anto el a pone nan den e hòfi di Eden, un lugá masha bunita. Nan tabata perfekto, i Dios a duna nan tur kos ku nan tabatin mester pa nan ta felis. Nan por a biba pa semper, tanten ku nan a keda amigu di Dios. Pero, nan a skohe pa desobedesé un simpel mandamentu ku el a duna nan.

E motibu pakiko nos ta sufri awe.

Ora e promé hende, Adam, a desobedesé Dios, el a pèrdè e chèns di biba pa semper. Esei a konta pa tur su desendientenan tambe. Beibel ta bisa: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) Pues, Adam a pasa imperfekshon pa tur su yunan, meskos ku mayornan por pasa defekto pa nan yunan. Komo resultado, nos tur ta bira bieu i muri.

Loke Dios a hasi kaba pa yuda nos.

Beibel ta bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Dios a manda Hesus na tera pa entregá su bida pa nos. Prabhakar, un hòmber di India di 86 aña, a bisa: “Esei ta laga mi mira kuantu Yehovaa ta stima mi. I danki na esei, mi tin e speransa di biba pa semper.”

Kon pa mustra Dios ku nos ta gradisidu pa loke el a hasi pa nos.

Beibel ta bisa ku nos por mustra nos gratitut pa tur loke Dios a hasi pa nos ora nos ta “kumpli ku su mandamentunan.” (1 Huan 2:3) Ku amor Yehova ta siña nos kiko nos tin ku hasi pa nos tin un bida felis for di awor. (Isaías 48:17, 18) Dios no ke pa nos sufri. P’esei el a primintí ku si nos sigui su konsehonan, nos lo tin un bida felis awor i tambe e chèns pa biba pa semper.

LESA BEIBEL, DIOS SU PALABRA, TUR DIA

E zùster ta wak shelu despues di lesa Beibel den pousa pafó. — Bo por sobrebibí fin di mundu si bo pidi Yehova yuda bo i si bo hasi su boluntat

Pa nos por keda na bida nos tin ku kome. Pero, Hesus a bisa: “Hende no mester biba di pan so, sino tambe di tur palabra ku ta sali for di boka di Yehova.”—Mateo 4:4.

Awe nos por haña Yehova su palabranan den Beibel. Beibel ta un buki sagrado, anto segun ku bo ta studi’é lo bo haña sa loke Dios a hasi den pasado, loke e ta hasiendo aworakí i loke e ta bai hasi den futuro.

PIDI DIOS YUDA BO

Kiko si bo ta purbando di hasi bo bèst pa obedesé Dios, pero bo ta haña ku ta difísil pa stòp di hasi e kosnan ku e ta bisa ku ta malu? Si esei ta asina, loke por yuda bo ta di siña konosé Dios bon.

Wak e ehèmpel di un señora ku nos lo yama Sakura, kende tabata hiba un bida masha inmoral. Ora el a kuminsá studia Beibel, el a haña sa ku Dios ta bisa pa “hui di fornikashon.” (1 Korintionan 6:18) Sakura a pidi Yehova pa dun’é forsa anto el a logra stòp di hasi e kosnan ku Yehova no ta gusta. Pero, te ainda e ta sigui lucha ku tentashon. El a bisa: “Ora mi kuminsá pensa riba kosnan inmoral, mi ta konta Yehova tur kos pasobra mi sa ku riba mi mes mi no por lucha kontra esaki. Anto mirando kon orashon ta ègt yuda ta hala mi mas serka di Yehova.” Meskos ku Sakura, tin miónes di hende ku ta konosiendo Dios. Anto Dios ta duna nan e forsa ku nan tin mester pa hasi e kambionan den nan bida i pa biba na un manera ku ta agrad’é.—Filipensenan 4:13.

Mas mihó abo siña konosé Dios, mas mihó tambe Dios lo konosé abo i mira bo komo un bon amigu. (Galationan 4:9; Salmo 25:14) Ta e ora ei lo bo por sobrebibí i drenta Dios su mundu nobo. Pero, kon e mundu ei lo ta? E siguiente artíkulo lo splika esei.

a Beibel ta bisa ku Dios su nòmber ta Yehova.