KON NOS POR YUDA VENSE ODIO?

2 | No Tuma Vengansa

Loke Beibel Ta Bisa:

“No paga malu ku malu. . . . Si ta posibel, te asina leu ku ta dependé di boso, keda na pas ku tur hende. No tuma vengansa, . . . pasobra ta pará skirbí: ‘Vengansa ta di mi; ami lo paga bèk, Yehova ta bisa.’”—ROMANONAN 12:17-19.

Kiko Esei Ta Nifiká?

Aunke ku ta normal pa rabia ora ku un hende trata nos malu, Dios no ke pa nos tuma vengansa. Mas bien, e ke pa nos tene pasenshi, pasobra pronto e mes lo kaba ku tur inhustisia.—Salmo 37:7, 10.

Loke Bo Por Hasi:

Ora hende imperfekto tuma vengansa, e ta kousa mas odio. P’esei, si un hende ofendé bo òf hasi bo daño, no tuma vengansa. Purba di kontrolá bo sintimentunan i reakshoná na un manera pasífiko. Den algun kaso, ta mihó pa djis ignorá loke a pasa. (Proverbionan 19:11) Den otro kaso, kisas ta mihó pa raportá loke a pasa. Por ehèmpel, ora abo ta e víktima di un krímen, bo por skohe pa raportá e krímen na polis òf otro outoridat superior.

Tuma vengansa no ta yuda bo ku nada

Awor kiko si bo no ta mira un manera pasífiko pa resolvé e problema? Òf kiko si ya bo a hasi tur loke bo tabata por pa resolvé e problema na un manera pasífiko? No tuma vengansa. Esei probablemente lo hasi e situashon bira mas pió. Si bo no tuma vengansa, lo bo yuda vense odio. Konfia ku Yehova lo resolvé e problema na su debido tempu. Beibel ta bisa lo siguiente tokante Dios: “Konfia . . . den dje, i e lo hasié.”—Salmo 37:3-5.

Eksperensia—ADRIÁN

A Siña Ku Ta Mihó Pa No Tuma Vengansa

Komo adolesente, Adrián tabata violento, i e tabata kla pa bringa ora ku hende hasié daño. El a bisa: “Hopi biaha mi tabata enbolbí den tiroteo, i vários biaha mi a keda tur na sanger i kasi morto bentá riba kaya.”

Adrián a kuminsá studia Beibel ora e tabatin 16 aña. El a sigui bisa: “Segun ku mi tabata siña mas durante mi kurso di Beibel, mi a mira e nesesidat pa hasi kambio den mi personalidat.” E mester a siña vense odio i stòp di ta violento. El a benefisiá masha hopi mes di loke el a siña na Romanonan 12:17-19, esta, pa no tuma vengansa. El a bisa: “Mi a bin aseptá ku Yehova lo atendé ku inhustisia na su mes manera i na su mes tempu. Pokopoko mi a kambia mi estilo di bida violento.”

Un anochi, un gang ku ántes tabata bringa kontra Adirián a atak’é. E lider di e gang a grita: “Defendé bo mes awor!” Adrián a bisa: “Mi tabatin masha gana di defendé mi mes.” Pero, en bes di kuminsá bringa, el a hasi un orashon kòrtiku na Yehova i a logra skapa i bai fo’i djei.

Adrián a sigui bisa: “Su manisé, mi a topa e lider di e gang ora e tabata su so. Mi sanger a herebé den mi kurpa, pero den silensio mi a bolbe pidi Yehova yuda mi kontrolá mi mes. Pa mi sorpresa, e hóben a kana bini serka mi i a bisa: ‘Pordoná mi pa loke a pasa ayera nochi. Bèrdat ta ku lo mi tin gana di ta manera bo. Mi ke studia Beibel.’ Mi tabata masha kontentu ku mi por a dominá mi rabia. Danki na esei, el a kuminsá un kurso di Beibel.”