Bo Tabata Sa?

Kon tabata deshasí di tur e sanger di e bestianan ku e saserdotenan tabata mata?

TUR aña, e saserdotenan na e tèmpel na Herúsalèm tabata mata míles di bestia riba e altar komo ofrenda. Segun Hosefo, un historiadó di promé siglo, riba Pasku Hudiu tabata mata mas ku 250.000 lamchi di karné. Pues lo tabatin hopi sanger. (Lev. 1:​10, 11; Num. 28:​16, 19) Awor kon tabata deshasí di tur e sanger ei?

Arkeólogonan a koba den e área rònt di e tèmpel ku tabata eksistí den tempu di Hesus. Anto nan a haña un afvur ku tabata usa pa deshasí di e sanger di e bestianan.

Ban papia di dos kos ku a yuda tene e altar limpi:

• Burakunan na suela banda di e altar: Un buki di siglo tres ku ta konta tokante lei- i tradishonnan hudiu a deskribí e sistema di afvur pa e altar. E buki ta bisa ku na un dje skinanan abou tabatin dos buraku. Tantu sanger di e ofrendanan komo e awa ku a laba nan kuné tabata bai den e burakunan ei baha den e afvur i bai basha den vaye Kídròn.

  Un buki mas moderno tokante historia di e hudiunan ta duna e mesun splikashon tokante e afvur ei. A base di loke nan a deskubrí, arkeólogonan ta di akuerdo ku tabata deshasí di e sanger via e burakunan.

• Bastante awa: E saserdotenan tabatin mester di basta awa pa e suela banda di e altar i yuda e sanger sigui kore den e afvur. Nan tabata haña awa for di e stat. E stat tabata haña awa via kanal, akuadukto, rembak i dam. E arkeólogo Joseph Patrich a bisa ku ta parse ku niun otro tèmpel di e tempu ei no tabatin un sistema asina bon di pèrkurá awa i di deshasí di awa sushi.