“Un Cas di Oracion pa Tur e Nacionnan”
“No ta pará skirbí, ‘Mi cas lo ser yamá un cas di oracion pa tur e nacionnan’?”—MARCO 11:17.
1. Ki clase di relacion Adam i Eva tabatin originalmente cu Dios?
ORA Adam i Eva a ser creá, nan a disfrutá di un relacion estrecho cu nan Tata celestial. Jehova Dios a comunicá cu nan i a describí su propósito maraviyoso p’e rasa humano. Siguramente, hopi biaha nan emocion a impulsá nan pa alabá Jehova pa su magnífico obranan di creacion. Si Adam i Eva tabatin mester di guia segun cu nan a contemplá nan papel como e futuro tata i mama dje famia humano, nan por a acercá Dios for di cualkier lugá den nan hogar paradísico. Nan no tabatin mester dje servicionan di un sacerdote den un tempel.—Génesis 1:28.
2. Ki cambio a tuma lugá ora Adam i Eva a peca?
2 E situacion a cambia ora un angel rebelde a seducí Eva pa pensa cu su suerte den bida lo a mehorá si el a rechasá e soberania di Jehova, declarando cu lo e “ta manera Dios.” P’esei, Eva a come fruta dje palu cu Dios a prohibí nan di come for di dje. Anto Satanas a usa Eva pa tenta su esposo. Trágicamente, Adam a scucha su esposa pecaminoso, mustrando cu el a duna mas balor na su relacion cuné cu na su relacion cu Dios. (Génesis 3:4-7) En efecto, Adam i Eva a scoge Satanas como nan dios.—Compará cu 2 Corintionan 4:4.
3. Kico tabata e mal resultadonan dje rebelion di Adam cu Eva?
3 Haciendo esei, e promé pareha humano a perde no solamente nan relacion precioso cu Dios sino tambe e prospecto di biba pa semper den un paradijs terenal. (Génesis 2:16, 17) Nan curpa pecaminoso cu tempu a deteriorá te ora nan a muri. Nan yunan a heredá e condicion pecaminoso aki. “Asina,” Bijbel ta splica, “morto a plama na tur hende.”—Romanonan 5:12.
4. Ki speransa Dios a ofrecé na humanidad pecaminoso?
4 Algu tabata necesario pa reconciliá humanidad pecaminoso cu nan Creador santu. Ora Dios a sentenciá Adam cu Eva, el a duna nan futuro yunan speransa dor di primintí un “simia” cu lo a salba humanidad for dje efectonan dje rebelion di Satanas. (Génesis 3:15) Mas despues, Dios a revelá cu e Simia di bendicion lo a bini mediante Abraham. (Génesis 22:18) Cu e propósito amoroso aki na mente, Dios a selectá e desendencia di Abraham, e israelitanan, pa bira su nacion scogí.
5. Pakico nos mester ta interesá den e detayenan di Dios su pacto di Ley cu Israel?
5 Na 1513 P.E.C., e israelitanan a drenta den un relacion di pacto cu Dios i a bai di acuerdo pa obedecé su leynan. E pacto di Ley ei mester ta di gran interes pa tur cu kier adorá Dios awe pasobra el a señalá n’e Simia primintí. Pablo a bisa cu el a contené “un sombra dje bon cosnan pa bini.” (Hebreonan 10:1) Ora Pablo a haci e declaracion aki, e tabata papia dje sirbishi dje sacerdotenan di Israel na un tabernáculo of tent di adoracion portátil. El a ser yamá “e tempel di Jehova” of “e cas di Jehova.” (1 Samuel 1:9, 24) Dor di examiná e sirbishi sagrado efectuá n’e cas terenal di Jehova, nos por yega na apreciá mas plenamente e areglo misericordioso dor di cua humanidad pecaminoso awe por bira reconciliá cu Dios.
E Santísimo
6. Kico tabata posicioná den e Santísimo, i con e presencia di Dios a ser representá ei?
6 “E Haltísimo no ta biba den cas trahá na man,” Bijbel ta declará. (Echonan 7:48) Sin embargo, e presencia di Dios den su cas terenal a ser representá dor di un nubia den e compartimentu mas interior yamá e Santísimo. (Levítico 16:2) Evidentemente, e nubia aki a briya hopi cla, dunando lus den e Santísimo. E tabata posicioná riba un caha sagrado yamá “e arca di testimonio,” cu a contené tablanan di piedra grabá cu algun dje mandamentunan cu Dios a duna Israel. Riba e tapa dje Arca tabatin dos kerubin di oro cu halanan di span, cuanan a representá criaturanan spiritual di un rango haltu den e organisacion celestial di Dios. E nubia milagroso di lus tabata situá riba e tapa i meimei dje dos kerubinnan. (Exodo 25:22) Esaki a transmití e concepto di Dios Todopoderoso entronisá riba un garoshi celestial cargá dor di kerubinnan bibiente. (1 Crónicanan 28:18) Esaki ta splica pakico Rey Ezekías a resa: “O Jehova di ehércitonan, e Dios di Israel, sintá riba e kerubinnan.”—Isaías 37:16.
E Lugá Santu
7. Ki mobilario tabatin den e Lugá Santu?
7 E di dos compartimentu dje tabernáculo tabata yamá e Lugá Santu. Den e seccion aki, na banda robes dje entrada tabatin pará un bunita candelaria di shete brasa, i na banda drechi tabatin un mesa di pan di presentacion. Stret dilanti tabatin un altar for di cua e aroma di censia cu tabata kimando tabata subi. E tabata situá dilanti un cortina cu a separá e Lugá Santu for dje Santísimo.
8. Ki debernan e sacerdotenan tabata efectuá regularmente den e Lugá Santu?
8 Tur mainta i tur anochi, un sacerdote tabatin cu drenta den e tabernáculo i kima censia riba e altar di censia. (Exodo 30:7, 8) Parti mainta, segun cu e censia tabata kima, mester a reabastecé e shete lampinan cu tabata riba e candelaria di oro cu zeta. Anochi e lampinan a ser cendí pa tira lus den e Lugá Santu. Tur sabat un sacerdote tabatin cu pone 12 pan frescu riba e mesa di pan di presentacion.—Levítico 24:4-8.
E Patio
9. Kico tabata e propósito dje ponchera di awa, i ki les nos por siña di esaki?
9 E tabernáculo tabatin un patio tambe, rondoná pa un curá di tela di tent. Den e patio aki tabatin un ponchera grandi unda e sacerdotenan tabata laba nan man cu pia promé cu nan drenta e Lugá Santu. Tambe nan tabatin cu laba nan man cu pia promé cu ofrecé sacrificio riba e altar cu tabata situá den e patio. (Exodo 30:18-21) E rekisito aki di limpiesa ta un recordatorio fuerte pa Dios su sirbidornan awe cu nan mester haci esfuerso pa ta puru den sentido físico, moral, mental i spiritual si nan ta kier pa Dios aceptá nan adoracion. (2 Corintionan 7:1) Cu tempu, esclabonan no-israelita dje tempel tabata soru pa palu p’e candela riba e altar i pa awa p’e ponchera.—Hosué 9:27.
10. Cua tabata algun dje ofrendanan cu tabata ser hací riba e altar di sacrificio?
10 Tur mainta i tur anochi, un chubatu yong sacrificial a ser kimá riba e altar huntu cu un ofrenda di grano i bebida. (Exodo 29:38-41) Otro sacrificionan tabata ser hací riba dianan special. Algun biaha mester a haci sacrificio debí na un picá personal specífico. (Levítico 5:5, 6) Na otro ocasion un israelita por a ofrecé un sacrificio di comunion boluntario den cua e sacerdotenan i esun cu a haci e ofrenda tabata come porcionnan dje sacrificio. Esaki a indicá cu pecadornan humano por tabatin pas cu Dios, disfrutando di un cuminda cuné, na moda di papia. Asta un residente stranhero por a bira un adorador di Jehova i ser privilegiá pa presentá ofrendanan boluntario na Su cas. Pero afin di mustra debido onor na Jehova, e sacerdotenan por a aceptá solamente ofrendanan di e mihó calidad. E hariña di ofrenda di grano mester tabata mulá fini-fini, i animalnan pa sacrificio mester tabata sin ningun defecto.—Levítico 2:1; 22:18-20; Malakías 1:6-8.
11. (a) Kico tabata ser hací cu e sanger di sacrificio di animal, i na kico esaki a señalá? (b) Kico ta e punto di bista di Dios di tantu sanger humano como sanger di animal?
11 E sanger dje sacrificionan aki a ser trecé n’e altar. Esaki a sirbi como un recordatorio diario p’e nacion cu nan tabata pecador den necesidad di un redentor kende su sanger dramá por a expiá permanentemente nan picánan i salba nan for di morto. (Romanonan 7:24, 25; Galationan 3:24; compará cu Hebreonan 10:3.) E uso sagrado aki di sanger tambe a recordá e israelitanan cu sanger ta representá bida i cu bida ta pertenecé na Dios. Semper Dios a prohibí hende pa haci cualkier otro uso di sanger.—Génesis 9:4; Levítico 17:10-12; Echonan 15:28, 29.
E Dia di Expiacion
12, 13. (a) Kico tabata e Dia di Expiacion? (b) Promé cu e sumo sacerdote por a trece sanger den e Santísimo, kico e mester a haci?
12 Un biaha pa aña riba loke tabata ser yamá e Dia di Expiacion, henter e nacion di Israel, incluyendo residentenan stranhero cu a adorá Jehova, tabatin cu para tur trabou i yuna. (Levítico 16:29, 30) Riba e dia importante aki, e nacion a ser limpiá di picá na un manera figurativo pa por disfrutá di un relacion pacífico cu Dios pa un aña mas. Laga nos imaginá e esena i considerá algun dje puntonan sobresaliente.
13 E sumo sacerdote ta den e patio dje tabernáculo. Despues di a laba su mes den e ponchera di awa, e ta mata un toro pa usa como sacrificio. E sanger dje toro ta ser bashá den un conchi; lo e ser usá den un manera special pa expiá e picánan dje tribu sacerdotal di Levi. (Levítico 16:4, 6, 11) Pero promé cu e sumo sacerdote bai mas aleu cu e sacrificio, tin algu cu e mester haci. E ta coge censia perfumá (probablemente poniend’e den un cuchara grandi) i ta coge carbon cendí for dje altar pone den un tenedor di candela. Awor e ta drenta den e Lugá Santu i ta cana bai den direccion dje cortina dje Santísimo. E ta cana pasa lentamente rond dje cortina i ta para dilanti e arca di pacto. Siguientemente, fuera dje bista di cualkier otro hende, e ta basha censia riba e carbonnan cayente-cayente, i e Santísimo ta yena cu un nubia cu ta hole dushi.—Levítico 16:12, 13.
14. Pakico e sumo sacerdote mester a drenta e Santísimo cu e sanger di dos animal diferente?
14 Awor Dios ta dispuesto pa mustra misericordia i ser reconciliá den un manera figurativo. P’e motibu aki e tapa dje Arca a ser yamá e “asiento di misericordia” of “tapa di reconciliacion.” (Hebreonan 9:5, nota) E sumo sacerdote ta sali for dje Santu di Santunan, ta coge e sanger dje toro, i ta drenta e Santísimo atrobe. Manera e Ley a manda, e ta dop su dede den e sanger i ta sprengu’e shete biaha dilanti e tapa dje Arca. (Levítico 16:14) Siguientemente e ta bai bek n’e patio i ta mata un cabritu, cua ta un ofrenda di picá “p’e pueblo.” E ta trece un tiki dje sanger dje cabritu den e Santísimo i ta haci cuné mescos cu el a haci cu e sanger dje toro. (Levítico 16:15) Otro servicionan importante tambe a tuma lugá riba e Dia di Expiacion. Por ehempel, e sumo sacerdote mester a pone su mannan riba cabes di un di dos cabritu i confesá riba dje “e erornan dje yunan di Israel.” E cabritu bibu aki a ser hibá e ora ei den e desierto pa bai cu e picánan dje nacion den un sentido figurativo. Den e manera aki a haci expiacion cada aña “p’e sacerdotenan i pa tur e pueblo dje congregacion.”—Levítico 16:16, 21, 22, 33.
15. (a) Con e tempel di Sálomon tabata similar cu e tabernáculo? (b) Kico e buki di Hebreonan ta bisa tocante e sirbishi sagrado cu a ser efectuá tantu n’e tabernáculo como n’e tempel?
15 P’e promé 486 añanan dje historia di Israel como Dios su pueblo di pacto, e tabernáculo portátil a sirbi pa nan como e lugá pa adorá nan Dios, Jehova. Anto, Sálomon di Israel a ricibí e privilegio di construí un structura permanente. Aunke e tempel aki mester tabata mas grandi i mas elaborá, e plan cu Dios a percurá a sigui e mésun patronchi dje tabernáculo. Mescos cu e tabernáculo, el a representá un areglo mas grandi i mas eficas pa adoracion cu Jehova lo a “lanta, i no hende.”—Hebreonan 8:2, 5; 9:9, 11.
E Promé i di Dos Tempel
16. (a) Ki peticion amoroso Sálomon a haci ora el a dedicá e tempel? (b) Con Jehova a mustra cu el a aceptá e oracion di Sálomon?
16 Ora Sálomon a dedicá e tempel glorioso ei, el a incluí e peticion inspirá aki: “N’e stranhero cu no ta parti di bo pueblo Israel i cu realmente ta bini di un tera leu pa causa di bo gran nomber . . . , i nan realmente ta bini i ta haci oracion den direccion di e cas aki, e ora ei sea digno di scucha abo mes for di shelu, for di bo lugá establecí di habitacion, i bo mester haci conforme cu tur loke e stranhero ta sclama na bo; afin cu tur pueblo dje tera por conocé bo nomber i por tem’é bo mescos cu bo pueblo Israel ta haci, i por sa cu bo nomber a ser yamá riba e cas aki cu mi a construí.” (2 Crónicanan 6:32, 33) Den un manera inekibocabel, Dios a mustra cu el a aceptá Sálomon su oracion di dedicacion. Un rayo di candela a cai for di shelu i a consumí e sacrificionan di animal riba e altar, i e gloria di Jehova a yena e tempel.—2 Crónicanan 7:1-3.
17. Cu tempu, kico a sosodé cu e tempel cu Sálomon a traha, i pakico?
17 Lamentablemente, e israelitanan a perde nan temor saludabel di Jehova. Cu tempu, nan a profaná su gran nomber dor di actonan di dramamentu di sanger, idolatria, adulterio, incesto i dor di maltrato di huérfanonan, biudanan i stranheronan. (Ezekiel 22:2, 3, 7, 11, 12, 26, 29) Pues, na aña 607 P.E.C., Dios a ehecutá huicio treciendo e ehércitonan babilónico pa destruí e tempel. E israelitanan sobrebibiente a ser hibá cautivo pa Babilonia.
18. N’e di dos tempel, ki privilegionan a habri pa algun homber no-israelita cu a apoyá e adoracion di Jehova cu henter nan curason?
18 Despues di 70 aña di cautiverio un resto hudiu repentí a regresá Jerusalem i a ricibí e privilegio di reconstruí e tempel di Jehova. Interesantemente, tabatin un scarcedad di sacerdote i levita pa sirbi den e di dos tempel aki. Como resultado, e netineonan, cu a bini for dje esclabonan no-israelita di tempel, a ricibí privilegionan mas grandi como ministernan dje cas di Dios. Sin embargo, nan nunca a haña e mésun posicion cu e sacerdotenan i e levitanan.—Esdras 7:24; 8:17, 20.
19. Ki promesa Dios a haci tocante e di dos tempel, i con e palabranan aki a ser realisá?
19 Na promé instante a parce cu e di dos tempel lo no tabata nada na comparacion cu esun anterior. (Ageo 2:3) Pero Jehova a primintí: “Lo mi sagudí tur e nacionnan, i e cosnan deseabel di tur e nacionnan mester drenta; i lo mi yena e cas aki cu gloria . . . E gloria dje cas mas despues aki lo bira mas grandi cu esun dje [cas] anterior.” (Ageo 2:7, 9) Manera a ser profetisá, e di dos tempel en berdad a alcansá un gloria mas grandi. El a dura 164 aña mas tantu cu esun promé, i hopi mas adorador for di hopi mas pais a congregá den su pationan. (Compará cu Echonan 2:5-11.) Un renobacion dje di dos tempel a cuminsá den e dianan di Rey Herodes, i su pationan a ser ampliá. Elevá riba un plataforma masivo di piedra i rondoná cu columnanan bunita, el a igualá na grandesa e tempel original cu Sálomon a construí. El a incluí un patio grandi parti pafó pa hende dje nacionnan cu kier a adorá Jehova. Un barera di piedra a separá e Plenchi dje Gentilnan aki for dje pationan interior reservá pa israelita so.
20. (a) Ki distincion sobresaliente a marca e di dos tempel? (b) Kico a mustra cu e hudiunan tabatin un punto di bista robes dje tempel, i kico Jesus a haci como reaccion riba esaki?
20 E di dos tempel aki a disfrutá dje gran distincion di tabatin e Yu di Dios, Jesucristo, siña otronan den su pationan. Pero mescos cu e promé tempel, e hudiunan en general no tabatin un punto di bista apropiado di nan privilegio di tin e cas di Dios bou di nan custodia. Figurá bo, asta nan a permití comerciantenan haci negoshi den e patio dje gentilnan. Ademas, nan a permití hende usa e tempel pa corta caminda ora nan tabata hiba cosnan di un parti pa otro den Jerusalem. Cuater dia promé cu su morto, Jesus a limpia e tempel di tal prácticanan no-religioso, miéntras cu el a sigui bisando: “No ta pará skirbí, ‘Mi cas lo ser yamá un cas di oracion pa tur e nacionnan’? Pero boso a hacié un cueba di ladron.”—Marco 11:15-17.
Dios Ta Bandoná Su Cas Terenal pa Semper
21. Kico Jesus a indicá relacioná cu e tempel di Jerusalem?
21 Debí na Jesus su accion yen di curashi pa defendé e adoracion puru di Dios, e lidernan religioso hudiu tabata determiná pa mat’é. (Marco 11:18) Sabiendo cu pronto lo el a ser matá, Jesus a bisa e lidernan religioso hudiu: “Boso cas ta ser bandoná pa boso.” (Mateo 23:37, 38) Dje manera ei el a indicá cu pronto Dios lo no a aceptá mas e forma di adoracion cu a ser practicá n’e tempel típico den Jerusalem. Lo e no ta mas “un cas di oracion pa tur e nacionnan.” Ora su disipelnan a mustra Jesus e magnífico edificionan dje tempel, el a bisa: “Boso no ta contemplá tur e cosnan aki? . . . Di ningun manera lo ser lagá aki piedra riba piedra cu lo no ser tumbá.”—Mateo 24:1, 2.
22. (a) Con e palabranan di Jesus tocante e tempel a ser cumplí? (b) En bes di centralisá nan speransa riba un stad terenal, kico cristiannan di promé a busca?
22 Jesus su profecia a cumpli 37 aña despues na aña 70 E.C., ora ehércitonan romano a destruí Jerusalem i su tempel. Esei a duna prueba dramático cu Dios en berdad a bandoná su cas típico. Jesus nunca a profetisá cu un otro tempel lo ser reconstruí den Jerusalem. Relacioná cu e stad terenal ei, apostel Pablo a skirbi n’e cristiannan hebreo: “Nos no tin aki un stad cu ta sigui, sino nos ta busca cu empeño esun cu ta bini.” (Hebreonan 13:14) Cristiannan di promé a spera cu anhelo pa bira parti di “Jerusalem celestial”—e Reino di Dios parecido na un stad. (Hebreonan 12:22) Pues, e adoracion berdadero di Jehova no ta centralisá mas na un tempel físico riba tera. Den nos siguiente artículo, nos lo considerá e areglo superior cu Dios a establecé pa tur cu ta deseá di ador’é “cu spiritu i cu berdad.”—Juan 4:21, 24.
Preguntanan di Repaso
◻ Ki relacion cu Dios Adam i Eva a perde?
◻ Pakico e rasgonan dje tabernáculo mester interesá nos?
◻ Kico nos ta siña for dje actividadnan den e patio dje tabernáculo?
◻ Pakico Dios a permití su tempel ser destruí?
[Plachi na página 10, 11]
TEMPEL Cu Herodes A Reconstrui
1. Santísimo
2. Lugá Santu
3. Altar di Ofrenda Kimá
4. Laman Bashá
5. Plenchi di Sacerdotenan
6. Plenchi di Israel
7. Plenchi di Hende Muher