Kuerpo Gobernante Tin Dos Miembro Nobo

RIBA 5 di òktober 2024, tabatin un anunsio spesial na e reunion anual: Ruman Jody Jedele i Ruman Jacob Rumph a ser nombrá pa sirbi komo miembro di Kuerpo Gobernante di Testigunan di Yehova. Nan tur dos tin hopi aña kaba ta sirbi Yehova fielmente.

Ruman Jedele a nase na Missouri, Merka i a lanta den e bèrdat. Su famia a biba den un área ku no tabatin hopi Testigu. Debí na esei, hopi ruman tabata bini pa yuda nan kubri nan teritorio. Asina ei, Ruman Jedele a siña konosé rumannan di diferente background. E amor i union entre e rumannan a impreshon’é. El a batisá riba 15 di òktober 1983. E tabata stima sirbishi i, despues ku el a kaba skol sekundario, el a kuminsá traha pionero na sèptèmber 1989.

Ora Ruman Jedele tabata chikitu, su mayornan tabata hiba e i su ruman muhé chikitu Bètel. E bishitanan ei a pone ku tantu e komo su ruman a pone e meta pa bai traha na Bètel, i nan tur dos a logra esei. Na sèptèmber 1990 Ruman Jedele a kuminsá sirbi na Bètel na Wallkill. E promé departamento ku el a traha den dje tabata di limpiesa i djei el a traha den e departamento ku tabata atendé ku asuntunan médiko di e famia di Bètel.

Durante e tempu ei, e kongregashonnan spañó den serkania di Bètel tabata kresiendo i tabatin mester di ruman hòmber. Pues Ruman Jedele a bai un di e kongregashonnan ei i a kuminsá siña spañó. Poko tempu despues, el a topa Damaris, un ruman pionero ku tabata den e mesun sirkuito. Ku tempu, nan a kasa i Damaris a djòin e na Bètel.

Na 2005, nan a sali fo’i Bètel pa kuida nan mayornan. Durante e tempu ei nan a traha pionero regular. Ruman Jedele tabata instruktor na Skol di Sirbishi di Pionero, i a forma parti di e Komité di Kontakto ku Hospital den su área i Komité Regional di Konstrukshon.

Na 2013, a pidi pareha Jedele pa bin yuda ku e proyekto di konstrukshon na Warwick. Despues djei, nan a sirbi na Patterson i Wallkill. Ruman Jedele a traha den Departamento Lokal di Diseño i Konstrukshon i tambe den Servisio di Informashon di Hospital. Na mart 2023, a nombr’é ayudante di Komité di Sirbishi. Ora Ruman Jedele pensa bèk riba tur su asignashonnan, el a bisa: “Ora bo haña asignashon nobo, tin biaha bo por haña miedu. Pero nèt e ora ei bo tin ku kòrda pa konfia Yehova pasobra e ta esun ku lo yuda bo bira loke el a pidi bo.”

Ruman Rumph a nase na California, Merka. Tempu e tabata chikitu, su mama tabata inaktivo pero el a hasi esfuerso pa siña Ruman Rumph e bèrdatnan di Beibel. Ademas, tur aña Ruman Rumph tabata bai serka su wela part’i tata. Su wela, ku tabata un Testigu, a yud’é haña gana di sa mas tokante Beibel. Anto ora e tabatin 13 aña, el a pidi un estudio di Beibel. El a batisá 27 di sèptèmber 1992. Ta un goso pa sa ku Ruman Rumph su mama a bira aktivo bèk i tambe ku tantu su tata komo su rumannan a hasi progreso i batisá.

Tempu Ruman Rumph tabata hóben, el a mira kon felis pioneronan ta. Pues despues di kaba skol sekundario, el a kuminsá traha pionero na sèptèmber 1995. Na 2000, el a bai biba na Ecuador pa sirbi kaminda tabatin nesesidat di mas publikadó. Ei el konosé Inga, un pionero di Canada, i ku tempu nan a kasa. Despues ku nan a kasa, nan a bai yuda un grupo chikitu di publikadó den un pueblo na Ecuador. Awe e grupo ei ta un kongregashon fuerte.

Ku tempu, Pareha Rumph a haña asignashon komo pionero spesial i despues pa e trabou di sirkuito. Na 2011 nan a haña invitashon pa bai e di 132 klas di Gálad. Despues ku nan a gradua nan a bai sirbi na vários pais i a disfrutá di diferente privilegio manera traha na Bètel, hasi e trabou di misionero i di sirkuito. Tambe Ruman Rumph tabatin e privilegio di ta instruktor na e Skol pa Predikadó di Reino.

Debí na e pandemia di COVID-19, Pareha Rumph a regresá Merka. Nan a pidi nan bai Bètel na Wallkill, kaminda Ruman Rumph a haña entrenamentu den Departamento di Sirbishi. Algun tempu despues, nan a bai e sukursal na Ecuador bèk. Ei Ruman Rumph a sirbi den e Komité di Sukursal. Na 2023 nan a bai sirbi na Warwick. Anto na yanüari 2024, Ruman Rumph a ser nombrá komo ayudante di Komité di Sirbishi. Ora e pensa bèk riba tur e lugánan ku el a sirbi, el a bisa: “Loke ta hasi un asignashon spesial no ta e lugá sino e rumannan ku bo ta traha kuné.”

Nos ta apresiá e trabou duru di e ruman hòmbernan akí, i nos ta ‘sigui mustra ku [nos] ta apresiá e tipo di ruman hòmbernan ei.’—Flp. 2:29.