Kòrda Hasi Orashon pa Otro

1. Kon nos sa ku nos orashonnan ta importante pa Yehova?

ORASHON ta algu masha spesial. Pensa un ratu: Yehova a duna e angelnan sierto tarea pa hasi. (Sal. 91:11) Ademas, el a duna su Yu hopi responsabilidat importante. (Mat. 28:18) Pero kiko di e tarea di skucha orashon? Esei ta algu ku Yehova no a duna niun otro persona. Ta E so ta “skucha orashon.”—Sal. 65:2.

2. Kiko nos ta siña for di Pablo tokante hasi orashon pa otro hende?

² Aunke ta bon pa nos hasi orashon tokante nos mes problemanan, no ta esei so nos tin ku hasi. Nos tin ku hasi orashon pa otro hende tambe. Apòstel Pablo ta un hende ku a hasi esei. Por ehèmpel, el a hasi orashon pa e kongregashon na Efeso i a bisa nan: ‘Mi ta sigui hasi orashon pa boso.’ (Efe. 1:16) Pero el a hasi orashon pa hende individual tambe. Por ehèmpel, el a bisa Timoteo: ‘Mi ta gradisidu na Dios, . . . semper mi ta kòrda riba bo den e súplikanan ku mi ta hasi di dia i anochi.’ (2 Tim. 1:3) Pablo tabatin su mes preokupashonnan pa konta Yehova den orashon. (2 Kor. 11:23; 12:​7, 8) Pero tòg, el a tuma tempu pa hasi orashon pa otro hende.

3. Dikon tin biaha nos ta lubidá di hasi orashon pa otro hende?

³ Tin biaha, nos ta lubidá di hasi orashon pa otro hende. Dikon esei ta pasa? Un ruman ku yama Sabrinaa a menshoná un motibu. El a bisa: “Nos bida ta hopi drùk. Tin biaha nos ta asina enfoká riba nos problemanan, ku nos ta lubidá riba otro hende.” Esei sa pasa ku bo? Si ta asina, e artíkulo akí por yuda bo. Nos lo trata (1) dikon ta importante pa nos hasi orashon pa otro hende i nos lo haña (2) algun sugerensia pa yuda nos sa kon pa hasi esei.

DIKON NOS MESTER HASI ORASHON PA OTRO?

4-5. Dikon nos por bisa ku nos orashonnan tin hopi poder i ta yuda sigur? (Santiago 5:16)

⁴ Nos orashonnan ‘tin hopi poder. Nan . . . ta yuda sigur.’ (Lesa Santiago 5:16.) Pero, hasi orashon pa otronan ta yuda ku algu? Sigur ku sí. Esei tabata bisto ora ku Hesus a hasi orashon pa Pedro, sabiendo ku lo el a neng’é. Hesus a bis’é: “Mi a supliká Dios pa bo, pa bo fe no debilitá.” (Lúk. 22:32) Pablo tambe tabata sa ku orashon ta yuda. Ora ku e tabata den prizòn na Roma, el a skirbi Filemon: ‘Mi ta spera ku, danki na boso orashonnan, lo mi ser entregá bèk na boso.’ (Flm. 22) Anto ta esei mes a sosodé. Poko tempu despues, Pablo a sali for di prizòn anto e por a sigui prediká.

⁵ Pero klaru ku esei no ke men ku djis pasobra nos a hasi orashon, Yehova ta obligá di kumpli ku loke nos a pidi. E ta mira kuantu un kos ta preokupá nos, i, tin biaha, e ta disidí pa kumpli ku nos petishonnan. Sabiendo tur esei ta yuda nos sigui hasi orashon fervientemente tokante un asuntu i lag’é den Yehova su man, konfiando ku lo e atend’é na e mihó manera.—Sal. 37:5.

6. Ki nos ta haña ora nos hasi orashon pa otro? Splika. (1 Pedro 3:8)

⁶ Ora nos hasi orashon pa otro, e ta yuda nos haña “tierno kompashon.” (Lesa 1 Pedro 3:8.) Kompashon ta laga ku un persona ta ripará loke un otro hende ta pasa aden i ke hasi algu pa yud’é. (Mar. 1:​40, 41) Un ansiano ku yama Michael a bisa: “Ora mi hasi orashon pa mi rumannan mi ta bira mas konsiente di tur e kosnan ku nan ta lucha kuné i mi ta stima nan mas. Esei ta pone ku mi ta sinti mi mas será ku nan maske nan mes no sa.” Anto un ansiano ku yama Richard ta menshoná un otro benefisio. El a bisa: “Ora nos ta hasi orashon pa un persona, esei ta motivá nos pa yud’é.” Anto el a agregá: “Ora bo hasi algu práktiko pa e persona ku bo a hasi orashon p’e, den un sierto sentido bo ta parti di e yudansa ku bo a pidi p’e den orashon.”

7. Kon orashon ta yuda nos stòp di focus riba nos mes problemanan? (Filipensenan 2:​3, 4) (Wak e plachi.)

⁷ Hasi orashon pa otro hende ta yuda nos stòp di focus riba nos mes problemanan. (Lesa Filipensenan 2:​3, 4.) Komo ku nos ta biba den un mundu dominá pa Satanas, nos tur ta lucha ku algu. Si no ta esun, ta e otro. (1 Huan 5:19; Rev. 12:12) Ora ku nos ta hasi orashon pa otronan regularmente, esei ta yuda nos kòrda “ku rònt mundu henter e hermandat ta soportá e mesun tipo di sufrimentu.” (1 Ped. 5:9) Un pionero ku yama Katherine, a bisa: “Ora mi ta hasi orashon pa otronan, esei ta yuda mi kòrda ku otro hende tambe tin problema. Esei ta yuda mi stòp di focus demasiado riba mi mes problemanan.”

NOS MESTER HASI ORASHON PA NAN

8. Ken asina nos por inkluí den nos orashon?

⁸ Pa ken nos por hasi orashon? Nos por hasi orashon pa tur nos rumannan rònt mundu. Por ehèmpel, nos por pidi Yehova yuda esnan ku tin problema di salú, e hóbennan ku ta haña nan ku preshon na skol òf esnan ku ta lucha debí na edat avansá. Ademas, hopi di nos rumannan ta enfrentá oposishon, sea di nan mes famia òf di gobièrnu. (Mat. 10:​18, 36; Echo. 12:5) Pensa tambe riba nos rumannan ku mester a hui debí na violensia òf ku a sufri debí na desaster natural. Kisas nos no konosé e rumannan akí personalmente. Pero ora nos hasi orashon pa nan, nos ta obedesé Hesus su mandamentu pa “stima otro.”—Huan 13:34.

9. Dikon nos mester hasi orashon pa e rumannan ku ta enkargá ku responsabilidat den e organisashon i pa nan esposanan?

⁹ Nos por hasi orashon tambe pa e rumannan ku ta enkargá ku kualke responsabilidat den e organisashon. Entre e rumannan ei tin Kuerpo Gobernante i nan ayudantenan. Tambe e miembronan di e Komité di Sukursal, superintendentenan na e sukursalnan, superintendentenan di sirkuito, ansianonan i sirbidónan ministerial. Aunke e rumannan akí ta traha duru pa yuda nos, hopi di nan tin nan mes preokupashonnan i problemanan. (2 Kor. 12:15) Por ehèmpel, un superintendente di sirkuito ku yama Mark a bisa: “Ta hopi difísil pa mi ta asina leu for di mi mayornan ku ta birando grandi. Nan salú ta bayendo mas i mas atras. I aunke mi ruman muhé i su kasá ta hasiendo un tremendo trabou pa kuida nan, tòg mi ta sinti mi hopi kulpabel ku mi no por hasi mas pa yuda nan.” Tur e rumannan ei ta traha hopi duru i sea nos ta konsiente òf nò di loke nan preokupashon ta, lo ta hopi bon si nos sigui hasi orashon pa nan. (1 Tes. 5:​12, 13) Anto, no lubidá nan esposanan. Lealmente nan ta yuda nan kasánan pa nan por sigui den nan asignashon.

10-11. Yehova ta keda kontentu ora nos hasi orashon pa nos rumannan rònt mundu? Splika.

¹⁰ Manera nos a mira kaba, hopi biaha nos ta hasi orashon pa nos rumannan rònt mundu. Por ehèmpel, kisas sin ku nos tin un ruman spesífiko na mente, nos ta pidi pa Yehova yuda esnan ku ta den prizòn òf ku a pèrdè un ser kerí. Un ansiano ku yama Donald a bisa: “Tin asina tantu ruman ku ta pasa den difikultat, ku nos ta djis pidi Yehova pa yuda nan tur.”

¹¹ Pero Yehova lo keda kontentu ku tipo di orashonnan asina? Sigur ku sí! E ta komprondé ku nos no sa ki nesesidat spesífiko kada ruman tin. P’esei no ta malu pa hasi un orashon general. (Huan 17:20; Efe. 6:18) Ora nos hasi tipo di orashon asina, nos ta demostrá ku nos ta “stima henter e hermandat.”—1 Ped. 2:17.

ORA NOS TA HASI ORASHON PA UN RUMAN

12. Kiko por yuda nos pa ta mas spesífiko den nos orashonnan?

¹² Sea atento. Fuera di hasi orashon pa nos rumannan rònt mundu, ta bon pa nos hasi orashon tambe pa rumannan individual. Puntra bo mes: ‘Tin un ruman den mi kongregashon ku ta lucha ku un malesa króniko? Tin un hóben ku ta desanimá pa motibu di e preshon ku e ta hañ’é kuné na skol pa hasi kos robes? Tin un mama soltero ku ta hasiendo hopi esfuerso pa lanta su yu “di akuerdo ku e instrukshonnan di Yehova”?’ (Efe. 6:4) Si bo ta atento na loke bo rumannan ta pasando aden, lo bo stima nan mas i haña mas deseo di hasi orashon pa nan.b—Rom. 12:15.

13. Kon nos por hasi orashon spesífiko pa e rumannan ku nunka nos no a konosé?

¹³ Usa nan nòmber. Nos por hasi orashon asta pa rumannan ku nunka nos no a konosé. Por ehèmpel, nos por hasi orashon pa e rumannan será den prizòn na Crimea, Eritrea, Rusia, Singapur òf otro pais. Riba jw.org, bo por haña nan nòmber.c Un superintendente di sirkuito ku yama Brian a bisa: “Loke ta yuda mi kòrda nòmber di un ruman den prizòn ta ora mi skirbié i djei bis’é na bos haltu. Asina, ta mas fásil pa mi hasi orashon pa e ruman.”

14-15. Kon nos por ta spesífiko den nos orashonnan?

¹⁴ Pidi kosnan spesífiko. Michael, menshoná anteriormente, a bisa kiko e ta hasi: “Segun mi ta lesa e relatonan riba jw.org tokante e rumannan den prizòn, mi ta purba di hinka mi mes den nan sapatu. Mi sa ku ami lo preokupá tokante mi kasá i lo mi ke hasi sigur ku e ta bon kuidá. Pues mi ta menshoná esei spesífikamente ora mi ta hasi orashon pa e ruman hòmbernan kasá ku ta den prizòn.”—Heb. 13:​3, nota.

¹⁵ Segun ku nos ta imaginá kon bida ta pa nos rumannan den prizòn, ta sigur ku nos lo haña mas kos ku nos por menshoná spesífikamente den orashon. Por ehèmpel, nos por hasi orashon pa e wardadónan di prezu trata nos rumannan bon i pa hende ku tin outoridat permití nos rumannan adorá Yehova libremente. (1 Tim. 2:​1, 2) Nos por pidi Yehova tambe pa e ehèmpel di fieldat di e ruman den prizòn animá e rumannan den su mes kongregashon òf ku su bon kondukta lo motivá hende ku no ta Testigu pa skucha nos mensahe. (1 Ped. 2:12) I nos por hasi algu similar pa nos rumannan ku ta enfrentá otro tipo di prueba. Ora nos ta atento na loke nos rumannan ta pasando aden, ta usa nan nòmber i ta pidi kosnan spesífiko, nos ta mustra ku nos tin hopi “amor pa otro.”—1 Tes. 3:12.

MIRA NOS ORASHONNAN NA MANERA REALÍSTIKO

16. Kiko nos tin ku tene kuenta kuné tokante nos orashonnan? (Mateo 6:8)

¹⁶ Manera nos a mira den e artíkulo akí, ora nos hasi orashon pa un hende, esei por yuda kambia loke por pasa kuné. Pero tin algun kos ku nos mester tene kuenta kuné. Ora nos hasi orashon, kòrda ku Yehova sa kaba kiko ta pasando pues nos no ta kontando e algu nobo. Ni tampoko nos no ke bisa Yehova kiko ta e mihó kos pa e hasi. No lubidá ku e sa kiko su sirbidónan tin mester asta promé ku nan òf asta nos mes sa. (Lesa Mateo 6:8.) Si esei ta e kaso, pakiko nos tin ku hasi orashon pa otro anto? Fuera di e motibunan ku nos a mira kaba den e artíkulo akí, orashon ta un manera ku nos ta mustra ku nos ta stima otro. Amor ta motivá nos pa hasi orashon pa otro, i Yehova ta bira masha kontentu ora e mira nos imitá su amor.

17-18. Dikon Yehova ke pa nos hasi orashon pa nos rumannan? Ilustrá esei.

¹⁷ Asta si nos orashonnan no kambia e situashon di un ruman, e ta mustra kuantu nos stima nos rumannan, i Yehova ta mira esei. Nos por ilustr’é asin’akí. Imaginá un famia ku dos yu. Un yu muhé, i un yu hòmber. E yu hòmber ta malu na kama. Anto e yu muhé ta roga su tata: “Plis Papa! Yuda mi ruman, e ta hopi malu.” E tata ya kaba tin atenshon pa e asuntu. E stima su yu hòmber i ta kuidando e bon. Pero bo por imaginá bo kon kontentu e ta bira ora e tende ku su yu muhé stima su ruman hòmber asina tantu ku e ta roga su tata pa yud’é?

¹⁸ Ta esei ta loke Yehova ta animá nos pa hasi, esta pa stima otro i hasi orashon pa otro. Segun ku nos ta hasi esei, Yehova ta mira ku nos no ta pensa riba nos mes so, ma ku nos ta ègt stima nos rumannan. (2 Tes. 1:3; Heb. 6:10) Fuera di esei, nos a mira tambe ku nos orashonnan por asta yuda kambia loke ta bai pasa ku un hende. P’esei, laga nos tur hasi nos bèst i hasi orashon pa otro.