Kiko Bo Por Hasi si Bo Haña Bo ku un Problema di Salú?

Bo salú a bai atras diripiente? Si esei ta e kaso, bo sa ku problema di salú por kansa bo mentalmente i emoshonalmente. Ademas, tratamentu médiko por kosta bo hopi plaka. Kiko por yuda bo trata ku e situashon ei? Kon bo por yuda un famia di bo òf un amigu trata ku un problema di salú? Beibel no ta un buki médiko, pero e por yuda bo trata ku bo situashon di e mihó manera.

Algun tep ku por yuda bo trata ku un problema di salú

• Bai dòkter

  Loke Beibel ta bisa: “Hende bon di salú no tin mester di dòkter, ma hende malu sí.”—Mateo 9:12.

  Kiko esei ke men: Bai dòkter ora esei ta nesesario.

  Loke bo por hasi: Buska e mihó tratamentu médiko ku bo por haña. Tin biaha, ta bon pa buska un di dos opinion serka un otro dòkter. (Proverbionan 14:15) Sòru pa bo tin un bon komunikashon ku e dòkternan: Hasi sigur ku bo ta komprondé nan i ku nan tin un bon bista di tur bo síntomanan. (Proverbionan 15:22) Haña sa mas tokante bo malesa, i ki tratamentunan tin disponibel. Ora bo sa kiko bo por ferwagt, lo bo ta mihó prepará emoshonalmente pa trata ku bo situashon, i lo bo por tuma bon desishon tokante bo tratamentu.

• Hiba un bida salú

  Loke Beibel ta bisa: “Entrenamentu físiko ta yuda.”—1 Timoteo 4:8.

  Kiko esei ke men: Ta bon pa bo hiba un bida salú, por ehèmpel, hasi ehersisio regularmente.

  Loke bo por hasi: Hasi ehersisio regularmente, kome salú i drumi sufisiente ora tur anochi. Kisas bo tin ku hasi algun kambio den bo bida debí na bo problema di salú, i esei no ta fásil. Pero vários eksperto ta bisa ku si bo hasi esfuerso pa desaroyá kustumber ku ta yuda bo hiba un bida salú, esei lo duna bon resultado. Klaru ku bo tin ku hasi sigur ku loke bo skohe pa hasi ta bon pa bo salú i no ta stroba bo tratamentu médiko.

• Pidi bo amigunan yuda bo

  Loke Beibel ta bisa: “Un berdadero amigu ta stima semper; e ta un ruman ku bo por konta kuné den tempu difísil.”—Proverbionan 17:17.

  Kiko esei ke men: Bo amigunan por yuda bo den tempu difísil.

  Loke bo por hasi: Papia ku un amigu di konfiansa tokante kon bo ta sinti. Esei por yuda baha bo strès i laga bo sinti mas mihó. Kasi sigur bo famia i amigunan tin gana di yuda bo, pero kisas nan no sa kiko pa hasi. Pues, bisa nan kiko nan por hasi pa yuda bo. Sea rasonabel den loke bo ta ferwagt pa hende hasi pa bo, i semper sea gradisidu pa e yudansa ku nan ta duna bo. Pero kòrda ku maske bo amigunan tin bon intenshon, tin biaha bo por sinti bo un poko anshá pa motibu di tur e kosnan ku nan ke hasi pa yuda bo. P’esei, lo ta bon pa bo palabrá ku nan kuantu bishita bo por haña i kon largu e bishitanan por ta.

• Sea positivo

  Loke Beibel ta bisa: “Alegria ta un bon remedi; ferdrit ta kaba ku hende.”—Proverbionan 17:22.

  Kiko esei ke men: Ora bo ta un hende positivo i optimista, esei por yuda bo keda kalmu i trata ku bo problema di salú.

  Loke bo por hasi: Segun ku bo ta adaptá bo mes na bo situashon nobo, konsentrá riba loke bo por hasi i nò riba loke bo no por hasi. No kompará bo mes ku otro hende ni kompará bo situashon aktual ku kon bo tabata promé ku bo malesa. (Galationan 6:4) Pone meta rasonabel i ku bo por alkansá. Esei lo yuda bo keda positivo. (Proverbionan 24:10) Purba di hasi kos pa otro hende, te asina leu ku bo situashon ta permití. Kòrda ku ora bo ta hasi kos pa otro hende, bo ta sinti bo mas felis, i esei lo yuda bo pa bo no keda pensa muchu riba bo problemanan.—Echonan 20:35.

Dios lo yuda nos ora nos tin problema di salú?

Beibel ta mustra ku Yehova Diosa por yuda hende trata ku problema di salú. Nos no por ferwagt ku Dios ta kura su sirbidónan na un manera milagroso. Kon sí Dios ta yuda nan? E ta yuda nan na e siguiente maneranan:

Dios ta duna pas. Yehova por duna nos “e pas di Dios ku ta surpasá tur komprondementu.” (Filipensenan 4:6, 7) E pas mental ei por yuda nos pa no preokupá di mas. Dios ta duna nos e pas ei si nos ta hasi orashon na dje i kont’é loke ta preokupá nos.—1 Pedro 5:7.

Dios ta duna sabiduria. Yehova por duna nos sabiduria pa tuma bon desishon. (Santiago 1:5) Si nos studia Beibel i pone na práktika e konsehonan ku tin den Beibel, nos lo bira hende sabí.

Dios ta duna un bunita speransa pa futuro. Yehova ta primintí nos ku den futuro niun hende lo no bisa: “Mi ta malu.” (Isaías 33:24) E speransa ei ta yuda hopi hende keda positivo maske nan ta sufri di un malesa grave.—Yeremías 29:11, 12.