LOKE HÓBEN SA PUNTRA
Kon Mi Mester Reakshoná Riba Krítika Konstruktivo?
Tèst bo mes
Tempu tempu, nos tur tin mester di krítika konstruktivo, esta, konseho ku por yuda nos mehorá loke nos ta hasi òf nos aktitut. Ku esei na mente, laga nos analisá e siguiente sirkunstansianan.
● Bo maestro di skol ta bisa bo ku ta parse ku bo a traha bo último proyekto purá purá. Anto e ta bisa bo: “Bo tin ku tuma mas tempu pa buska informashon.”
Kon lo bo reakshoná riba su krítika konstruktivo?
Mi ta rechas’é. (‘E maestro ei no gusta mi.’)
Mi ta asept’é. (‘Mi ta bai apliká su konseho pa mi siguiente proyekto.’)
● Bo mama ta bisa bo ku bo kamber ta bruhá, aunke ku bo a kaba di limpi’é.
Kon lo bo reakshoná riba su krítika konstruktivo?
Mi ta rechas’é. (‘Nunka e no ta kontentu ku loke mi hasi.’)
Mi ta asept’é. (‘Ta bèrdat ku mi por a drecha mi kamber un tiki mas mihó.’)
● Bo ruman muhé chikí ta bisa bo ku e no ta gusta ku bo ta manda riba dje.
Kon lo bo reakshoná riba bo su krítika konstruktivo?
Mi ta rechas’é. (‘Ta e ta esun ku ta manda riba hende.’)
Mi ta asept’é. (‘Kisas mi por ta mas kariñoso kuné bèrdat.’)
Tin algun hóben ta asina krepchi ku djis un tiki krítika ta kibra nan. Abo ta asina? Si esei te kaso, bo ta pèrdiendo gran oportunidat den bida! Dikon? Pasobra, si bo siña aseptá krítika konstruktivo, esei lo yuda bo tantu awor komo den futuro.
No pèrdè e chèns di tende algu ku bo tin mester di dje, djis pasobra bo no ke tende krítika.
Dikon mi tin mester di krítika konstruktivo?
Pasobra bo no ta perfekto. Beibel ta bisa: “Nos tur ta faya hopi biaha.” (Santiago 3:2, nota) P’esei, nos tur tin mester di krítika konstruktivo òf konseho.
“Mi ta purba di kòrda ku nos tur ta imperfekto i ku kometé fayo ta parti di bida. Pues, ora hende korigí mi, mi ta purba di siña for di mi foutnan i evitá di kometé mesun fayo atrobe.”—David.
Pasobra semper bo por mehorá. Beibel ta bisa: “Duna instrukshon na un hende sabí, i e lo bira mas sabí ainda.” (Proverbionan 9:9) Krítika konstruktivo por ta benefisioso pa bo, basta bo asept’é.
“Mi tabatin un punto di bista robes di krítika konstruktivo. Mi tabata pensa ku esei lo a pone mi pasa bèrgwensa. Pero awor sí mi ta asept’é i asta ta pidi hende konseho. Mi ke sa kon mi por mehorá.”—Selena.
Ta klaru ku ora bo mes pidi konseho, òf krítika konstruktivo, esei ta diferente for di ora bo hañ’é sin ku bo a pidié. Natalie ta kòrda ku el a yega di haña un karchi ku konseho ku e no a pidi p’e. El a bisa: “Mi a keda di shòk i desanimá. Mi tabata ègt hasi mi bèst pa hasi kos bon, pero úniko kos ku mi a haña ta krítika.”
Algu asina a yega di pasa ku bo? Si ta asina, kon bo por trata ku e situashon?
Kiko por yuda mi aseptá krítika konstruktivo?
Sea kla pa skucha.
Beibel ta bisa: “Esun ku midi su palabranan tin konosementu, i esun ku tin un spiritu kalmo ta un hende di komprondementu.” (Proverbionan 17:27) Ora un hende ta konsehá bo, no strob’é di papia. Ni no respondé sin pensa, pa bo no bisa algu ku lo bo lamentá despues.
“Ora mi risibí krítika, mi tin e tendensia di bira defensivo. Na lugá di hasi esei, mi mester siña for di e korekshon i purba di hasi kos mas mihó e siguiente biaha.”—Sara.
Konsentrá riba e mensahe, no riba e mensahero.
Por sosodé ku nos ta kla pa mustra dede riba e fayonan di e persona ku ta duna nos konseho. Pero lo ta mas mihó pa hasi loke Beibel ta bisa, esta, “ta kla pa skucha, slo pa papia, slo pa rabia.” (Santiago 1:19) Generalmente, un krítika tin algu di bèrdat den dje. Pues, no pèrdè e chèns di tende algu ku bo tin mester di dje, djis pasobra bo no ke tende krítika.
“Ora mi mayornan sa korigí mi, mi tabatin e kustumber di rabia i bisa: ‘sí, sí, mi sa kaba’. Pero ora mi skucha nan i apliká nan konseho, mi ta haña mihó resultado.”—Edward.
Mantené un punto di bista balansá di bo mes.
E echo ku bo ta haña krítika konstruktivo no ta nifiká ku bo ta un frakaso. Esei ta nifiká simplemente ku bo ta hasi fout, meskos ku tur otro hende. Asta e persona ku ta kritiká bo sa tin mester di konseho de bes en kuando. De echo, Beibel ta bisa: “No tin hende hustu riba tera ku kontinuamente ta hasi bon.”—Eklesiástes 7:20.
“Mi amiga a duna mi algun krítika konstruktivo ku, segun mi, mi no tabatin mester. Mi a gradisié pa su onestidat, pero mi a sinti mi ofendí. Ku tempu, mi a realisá ku tabatin algu di bèrdat den su krítika. Su konseho a yuda mi mira riba kiko mi tabatin ku traha—algu ku, riba mi mes, lo mi no a kai ariba.”—Sophia.
Pone meta pa bo mehorá.
Beibel ta bisa: “Esun ku aseptá reprendementu [òf, korekshon, NW] ta prudente.” (Proverbionan 15:5) Si bo aseptá korekshon, lo ta mas fásil pa bo pasa over di bo sintimentunan i trata na mehorá loke bo a haña konseho riba dje. Plania kon lo bo hasié i nota bo progreso durante e siguiente lunanan.
“Pa bo por reakshoná positivo riba krítika bo mester ta onesto ku bo mes. Si bo ta onesto lo bo atmití bo fayonan, pidi despensa, i hasi bo bèst pa mehorá.”—Emma.
Konklushon: Beibel ta bisa: “Manera heru ta mula heru, asina un hende ta mula kara di su amigu.” (Proverbionan 27:17) Krítika konstruktivo ta loke por yuda bo bira un mihó persona, tantu awor komo den futuro.