Extendiendo cu Mannan cu Ta Haci Seña
CUMINSANDO den juni di 1995 i siguiendo durante e tempu di zomer, Testigonan di Jehova, den e teritorio dje oficina di sucursal mericano a celebrá 181 asamblea di districto cu e tema “Alabadornan Gososo.” Na dos di nan—un na oost i e otro na west di Merca—e programa henter tabata presentá directamente na American Sign Language (papiamentu cu seña). Asina e claridad dje programa a mehorá mashá—pasobra presentacion directo pa hende surdu na papiamentu cu seña ta hopi mas comprendibel cu interpretacion for di palabra papiá.
Delegado a bini di 11 congregacion di hende surdu i di mas cu 30 grupo di hende surdu di tur parti di Merca. Pero tambe, tabatin delegado di Alemania, Cánada, Dinamarca, Ecuador, Hapon, Inglatera, México, Noruega, Puerto Rico, República Dominicana i Rusia. Pues, tabatin un ambiente internacional.
Pantaya di video tabata usá pa hende por mira e programa cu circuito cerá. Pero, tabatin vários delegado surdu i ciegu. Con e hendenan aki por a beneficiá dje programa? Tabata berdaderamente conmovedor pa mira mas cu shen ruman boluntario tuma turno comunicando e programa di cada dia cu nan usando interpretacion di toke.
N’e dos congresonan aki, 36 a simbolisá nan dedicacion na Jehova Dios via bautismo. Un otro punto sobresaliente tabata e drama, Onrando Esnan Digno den Nan Añanan di Behes. Tabata ki emocionante pa presentá e drama henter na papiamentu cu seña, haciendo posibel pa ruman surdu tene un parti principal den e presentacion!
Anto a yega e presentacion dje buki nobo pa studio bíblico, Conocimentu cu Ta Hiba na Bida Eterno. Delegado a keda specialmente felis pa tende cu un traduccion dje buki na papiamentu di seña ta hací disponibel na caset di video! Volúmen 1, presentá n’e congreso, ta contené e promé tres capítulo. Cincu otro volúmen lo sigui. Un delegado di Ohio a bisa, “Ki gradicidu nos ta keda p’e video nobo aki. E por yuda nos acelerá e trabou di evangelisá den teritorio di hende surdu.”
E 2.621 delegado cu a asistí n’e dos congresonan a bai cas spiritualmente refrescá. Mas cu nunca nan a keda determiná di declará e palabra dje salmista: “Tur loke ta hala rosea—alabá Jah. Boso alabá Jah!”—Salmo 150:6.