Fe den Dios A Guia Mi den un Pais Comunista

RELATA DOR DI ONDREJ KADLEC

DURANTE verano di 1966, mi tabata dirigí un grupo di turista den e stad caminda mi a nace—Praga, Checoslovakia. Celoso pa mi fe nobo, mi a papia tocante Dios ora mi a mustra e grupo e misa i tempelnan impresionante di nos stad.

Un profesor mericano di economia a puntra, “Bo ta un Testigo di Jehova?”

Mi a contestá cu “No. Mi nunca a tende di Testigo di Jehova. Mi ta católico romano.”

Mi A Bira un Creyente den Dios

Mi a ser criá dor di mayornan cu tabata prominente den e campo di educacion, política i medicina. Un poco tempu despues di mi nacementu na 1944 i e fin di Guera Mundial II e siguiente aña, mi tata a bira comunista. Realmente, e tabata co-fundador dje movementu comunista reformista, i na 1966 el a bira canciyer dje Universidad di Economia situá na Praga. Un par di aña despues, e tabata nombrá minister di educacion di Checoslovakia, cu n’e tempu ei a bira un pais comunista i ateista.

Mi mama tabata un hende escrupulosamente onrado i cu talento. E tabata ciruhana di wowo, cu e fama di ser e mihó dje pais. Tog, el a operá hende den necesidad grátis. E tabatin e custumber di bisa: “Cua don cu hende a ricibí, mester ta usá p’e beneficio dje comunidad i e nacion.” E ni sikiera a pidi tempu liber ora mi a nace di manera cu e por a keda disponibel na su clínica.

Nan a spera pa mi sobresalí na scol. Papa tabata puntra: “Tin un otro cu ta haci mihó cu bo?” Mi a cuminsá gusta e competencia, siendo cu hopi bes mi a gana premionan escolar pa excelencia. Mi a siña ruso, ingles, i aleman i a haci hopi biahamentu den e mundu comunista i mas ayá. Mi tabata gusta refutá conceptonan religioso como supersticion absurdo. I aunke mi a aceptá ateismo totalmente, mi a cuminsá odia e manera cu e tabata ser aplicá den práctica of accionnan político.

Un biahe pa Inglatera na 1965, ora mi tabatin 21 aña di edad so, tabatin un efecto profundo riba mi. Mi a contra cu hende cu a defendé nan fe den un Ser Supremo cu conviccion i cu lógica. Despues cu mi a bolbe pa Praga, un conocí católico romano a sugerí: “No lesa tocante cristianismo. Lesa e Bijbel.” Mi a haci esei. Den tres luna mi a cab’é.

Loke a impresioná mi tabata e manera cu skirbidor dje Bijbel a presentá nan mensahe. Nan tabata franco i a criticá nan mes. Mi a cuminsá kere cu e futuro magnífico cu nan a papia di dje ta algu cu solamente un Dios cu ta un persona por concibí i percurá.

Despues di hopi luna di lesamentu privá di Bijbel i meditacion, mi a sintí mi cla pa enfrentá mi tata i amigunan. Mi tabata sa cu nan lo desafiá mi fe nobo. Despues di esei, mi a bira un predicador ardiente. Ken cu tabata cerca mi—tal como e profesor mericano cu mi a mencioná anteriormente—tabatin cu soportá mi predicacion. Mi asta a cologá un crucifiho na muraya riba mi cama pa concientisá tur hende di mi fe.

Sin embargo, mi mama a keha cu mi apénas por ta un cristian, siendo cu mi tabata mescos cu mi tata, un comunista ardiente. Pero, mi a persistí. Mi a lesa e Bijbel dos bes i tres bes. Anto e ora ei mi a realisá cu pa mi sigui progresá, mi tabatin mester di guia.

Mi Buscamentu Ta Ser Recompensá

Mi a haci contacto cu e Iglesia Católico Romano. E interes principal dje pastor hóben tabata di siñá mi doctrina dje iglesia, cuanan mi a aceptá completamente. Anto, na 1966—p’e bergwensa di mi tata—mi a bautisá. Despues di a sprengu awa riba mi, e pastor a sugerí pa mi lesa e Bijbel, pero a agregá: “E papa a aceptá caba e teoria di evolucion, pues no preocupá; nos lo separá e trigu for dje mal yerba.” Mi a keda di shok cu e buki cu a duná mi fe mester a ser cuestioná.

Entretantu, den otoño di 1966, mi a papia cu un amigu di un famia católico i a splik’é mi kerementu. E tambe tabata conocé e Bijbel, i a papia cu mi tocante Armagedon. (Revelacion 16:16) El a bisa cu e tabatin contacto cu Testigo di Jehova, cua nomber mi a tende p’e promé bes rond di dos luna promé ora mi tabata dirigí e grupo di turista mencioná anteriormente. Pero, mi a considerá Testigo di Jehova como insignificante na comparacion cu mi Iglesia Católico Romano grandi, fuerte, i ricu.

Durante mas combersacion, nos a examiná tres cuestion ardiente. Promé, E Iglesia Católico Romano ta heredero dje cristianismo dje promé siglo? Di dos, Cua mester ser considerá como e autoridad di mas haltu—e Iglesia of e Bijbel? I di tres, Cua ta corecto, e relato bíblico di creacion of e teoria di evolucion?

Siendo cu e Bijbel tabata e fuente di fe pa nos tur dos, mi amigu no tabatin problema di convencé mi cu siñansa dje Iglesia Católico ta mashá diferente cu e siñansa di cristianismo di promé. Por ehempel, mi a siña cu asta fuentenan católico ta admití cu e siñansa prominente dje Iglesia di tres divina persona no ta fundá riba e siñansanan di Jesucristo i su apostelnan.

Esei a hiba nos n’e pregunta relacioná cu cua mester ta e autoridad di mas haltu. Mi a referí n’e palabra di San Agustin: “Roma ­locuta est; causa finita est,” es decir, “Roma [e Iglesia Católico Romano] a papia; e cuenta a caba.” Pero mi amigu a persistí cu e Palabra di Dios, e Bijbel, mester ta nos autoridad supremo. Mi tabatin cu aceptá e palabra di apostel Pablo: “Laga Dios ser hañá berdadero, aunke tur hende ta ser hañá mentiroso.”—Romanonan 3:4.

Finalmente, mi amigu a ofrecé mi un manuscrito gastá, skirbí na mashin titulá Evolucion Contra e Mundu Nobo. Pa motibu cu Testigonan di Jehova tabata prohibí den Checoslovakia cerca 1950, nan tabata traha copia di nan publicacion i tabatin cuidou ken a ricibí nan. Ora mi a lesa e foyeto, mi tabata sa cu el a contené e berdad. Mi amigu a cuminsá un studio bíblico cu mi. E tabata fiá mi vários blachi a la bes dje buki pa yuda cu studio bíblico “Dios sea berdadero,” i nos tabata considerá e blachinan huntu.

Un poco tempu despues cu nos a cuminsá e consideracionnan aki—durante e temporada di pascu di 1966—amigunan di West Alemania a bini na Praga pa bishitá mi. Den un combersacion cu nan, nan a despreciá hende cristian como hipócrita instigador di guera. Nan a bisa: “Como soldat di paisnan di OTAN, nos por bringa contra bo como hende yamá cristian bibando den un pais bou dje Pacto Comunista di Warschau.” Nan conclusion: “Mihó ser cínico cu ser hipócrita.” Mi a kere cu tal bes nan tabatin razon. Pues, durante mi siguiente studio bíblico, mi a pidi mi amigu splicá mi e punto di bista di cristian berdadero di guera i entrenamentu p’e.

Decisionnan cu Mi A Enfrentá

E splicacion claro di mi amigu a turdí mi. Pero, cumplimentu cu siñansa bíblico di ‘bati spada na ploeg’ lo a cambia dramáticamente mi bida i ofishi planeá. (Isaías 2:4) Mi tabatin cu gradua den cincu luna for dje universidad di medicina, despues di locual nan a exigí pa mi cumpli cu un periodo di sirbishi militar obligatorio. Kico mi mester haci? Mi a keda turdí. Pues, mi a haci oracion na Dios.

Despues di dianan di pensamentu profundo, mi no por a haña ningun motibu pa no cumpli cu e rekisito pa cristian berdadero ser hende di pas. Despues di a gradua for dje universidad, mi a determiná cu te cu nan a sentenciá mi como persona cu ta oponé pa motibu di concenshi, lo mi aceptá un puesto den un hospital. Pero, e ora ei mi a siña loke e ­Bijbel ta bisa tocante abstené di sanger. Mirando cu mi trabou por enbolbé mi den dunamentu di transfusion di sanger, mi a dicidí di stop di traha den e hospital. (Echonan 15:19, 20, 28, 29) E decision a resultá den difamacion público di mi nomber na tur parti.

Despues cu mi tata a haci sigur cu mi no a bira un instigador cu e deseo di destruí su puesto político, el a entremeté i a posponé mi sirbishi militar obligatorio pa un aña. E verano ei di 1967 tabata difícil pa mi. Considerá mi situacion: Mi tabata un studiante nobo di Bijbel kende su instructor di studio, e único Testigo di Jehova cu mi a conocé, no tabatei p’e temporada di verano. I el a laga atras solamente algun capítulo dje buki “Dios sea berdadero” pa mi studio personal. Esakinan i mi Bijbel tabata e único fuente di guia spiritual cu mi tabatin.

Despues, mi a yega di conocé otro Testigo di Jehova, i dia 8 di mart, 1968, mi a simbolisá mi dedicacion na Jehova Dios dor di bautismo bou di awa. E siguiente aña mi a haña e oferta di un curso di dos aña den estudionan mas haltu na Universidad di Oxford na Inglatera. Algun hende a sugerí pa mi aceptá e oferta i bai Inglatera unda mi por progresá spiritualmente den un pais unda Testigo di Jehova no tabata prohibí. A la bes, mi por a prepará mi pa un ofishi profesional excelente. Pero, un anciano cristian a bisa cu mi sirbishi no tabata tantu necesario den Inglatera como na Checoslovakia. P’esei mi a dicidí di nenga e oferta di sigui cu mi educacion seglar, i mi a permanecé na Checoslovakia pa yuda cu e trabou di predicacion clandestino.

Na 1969, mi tabata invitá pa asistí na un curso dje Scol di Ministerio di Reino cu tabatin un programa special di instruccion pa superintendente cristian. Tambe na 1969 mi a ricibí un beca como e mihó farmacólogo hóben di Checoslovakia. Como resultado, mi a asistí na un congreso dje Union Internacional di Farmacologia na Suecia.

Un Científico Ta Cambia Su Punto di Bista

Durante un discurso cu mi a scucha na 1970, un científico yamá Frantis̆ek Vyskočil a splica e tópico complicá di transmision di impulso di nervio. El a bisa cu ki ora cu tabatin un necesidad den un miembro di bo curpa, tabatin percuracion di un solucion sobresaliente. El a concluí: “Naturalesa, e Encantadora, sa con pa haci esaki.”

Despues dje discurso mi a acerk’é. Mi a puntra, “Bo no ta kere cu e crédito p’e diseño ­excelente den cosnan bibiente mester ta duná na Dios?” Mi pregunta tabata un sorpresa p’e, pasobra e tabata ateista. El a respondé cu otro clase di pregunta. El a puntra: “Di unda maldad a bini?” i “Ken ta responsabel p’e cantidad di mucha cu ta huérfano?”

Ora mi a duna contesta razonabel, basá riba Bijbel, esei a lanta su interes. Pero el a puntra pakico Bijbel no ta duna informacion científico specífico, tal como detaye di structura di cel, di manera cu hende por reconocé mas ­fácilmente cu e Creador ta su autor. Mi a respondé, “Cua ta mas difícil, splica of crea?” Mi a fi’é e buki ¿Llegó a existir el hombre por evolución, o por creación?

Despues di un lesamentu superficial di dje, Frantis̆ek a yam’é simpel i incorecto. Ademas, el a criticá loke Bijbel ta bisa tocante poligamia, e adulterio di David, i David su ­asesinato di un homber inocente. (Génesis 29:23-29; 2 Samuel 11:1-25) Mi a refutá su argumentonan, mustrando cu e Bijbel ta informá onradamente dje faltanan asta di sirbidor di Dios, i tambe di nan picánan abierto.

Finalmente, den un combersacion, mi a bisa Frantis̆ek cu si hende no tin intencion onrado, si nan ta falta stimacion p’e berdad, ningun forma di argumento ni razonamentu por convencé nan dje existencia di Dios. Ora mi tabata cla pa bai, el a pará mi i a pidi un studio bíblico. El a bisa cu lo e lesa di nobo e buki ¿Llegó a existir el hombre por evolución, o por creación?—awor cu un mente habrí. Despues, su actitud a cambia completamente, locual e siguiente palabra di un carta di dje a mustra: “E halsamentu di hende terenal tin cu buig, i e arogancia di hende tin cu ser rebahá; i Jehova so tin cu ser halsá den e dia ei.”—Isaías 2:17.

Den verano di 1973, Frantis̆ek i su esposa a bautisá como Testigo di Jehova. Actualmente, e ta sirbi como anciano den un congregacion di Praga.

Predicacion bou di Prohibicion

Durante e prohibicion, nos a haña instruccion di cumpli cu nos ministerio di veld cu hopi cautela. Un biaha, un testigo hóben a persistí pa mi traha huntu cuné den e trabou di predicá. El a duda cu esnan cu ta hiba e delantera den e organisacion di Testigo di Jehova realmente ta sali den sirbishi. Nos a disfrutá di hopi bon combersacion den nos ministerio informal. Pero, despues, nos a contra cu un homber cu, aunke n’e tempu ei mi no tabata sa, a corda cu el a mira mi cara den un album di potret dje polis secreto di gobiernu. Aunke nan no a detené mi, dje ora ei padilanti polis a vigilá mi continuamente, locual a stroba e eficacia di mi actividad den nos predicacion clandestino.

Durante verano di 1983, segun mi custumber di añanan promé, mi a organisá un grupo di testigo hóben pa pasa algun dia dunando testimonio informal den un parti remoto dje pais. Sin haci caso di conseho sabí, mi a core mi mes auto pasobra tabata mas cumbiniente cu transporte público. Ora nos a tuma un pausa breve pa cumpra algun artículo den un tienda, mi a para mi auto dilanti dje. Ora mi tabata paga p’e artículonan, mi a mustra riba algun trahador hóben i a bisa un empleado di mas edad: “Den futuro, nos tur por ta hóben.” E señora a dal un sonrisa. Mi a sigui, “Pero, esei no ta posibel pa hende haci. Yudansa djariba ta necesario.”

Siendo cu e persona no a respondé, mi a bai. Sin cu mi tabata sa, e señora a sospechá cu mi tabata plama siñansa religioso, i a wak mi dor dje bentana ora mi a pone e paki den mi auto. Anto el a yama e polis. Mas lat, despues cu nos a participá den dunamentu di testimonio informal den otro parti dje stad, ami i mi compañero a bolbe n’e auto. Di ripiente, dos polis a presentá i a detené nos.

N’e warda di polis, nan a haci nos pregunta pa hopi ora promé cu nan a bisa cu nos por bai. Mi a corda promé kico mi mester haci cu direccion di hende interesá cu nos a skirbi e dia ei. P’esei mi a drenta den baño pa flush nan den w.c. Pero, promé cu mi por a hacié, e man fuerte dje polis a detené mi. El a saca e papel for di conchi di w.c. i a haci nan limpi. Esei a pone mas presion riba mi, ya cu hende cu a duná mi nan direccion tabata den peliger awor.

Despues, nos tur a ser hibá na nos hotel, unda polis a haci un invasion den nos kamber caba. Pero, nan no a haña ningun otro direccion di hende interesá, aunke nos no a percurá pa sconde nan bon. Despues, na mi lugá di ­empleo como neuro-farmacólogo, mi a ricibí reprendementu público pa motibu di a participá den actividad ilegal. Ademas, e superintendente dje trabou di predicá na Checoslovakia a censurá mi severamente, kende mas promé a advertí mi di no usa mi auto ora nos bai pa participá den e ministerio.

Aceptando Disiplina

Na 1976 mi tabata asigná pa sirbi como miembro dje comité cu ta supervisá e trabou di predicacion di Testigo di Jehova na Checoslovakia. Pero, siendo cu e polis secreto tabata vigilá mi actividad atentamente debí na mi falta di sano huicio den asuntunan manera a ser mencioná anteriormente, mi a perde e privilegio di sirbi como miembro dje comité nacional i vários otro privilegio. Un dje privilegionan aki cu mi a apreciá specialmente tabata como maestro dje scol pa superintendente biahero i pionero, manera nos ta yama evangelisador di tempu completo.

Mi a aceptá e disiplina cu mi a ricibí, pero e tempu aki entre 1985 i 1989 tabata un tempu difícil di examinacion propio pa mi. Lo mi siña usa mas prudencia trahando den actividad teocrático i evitá mas imprudencia? Salmo 30, versículo 5, ta bisa: “Den anochi yoramentu por haña posada, pero den mainta tin un gritu di goso.” Tal mainta a yega pa mi ora e gobiernu comunista den Checoslovakia a cai na november di 1989.

Bendicionnan Maraviyoso

Tabata ki un cambio pa participá den nos ministerio libremente i pa disfrutá di comunicacion abierto cu e sede di Testigo di Jehova na Brooklyn, New York! Pronto mi a ser asigná como superintendente biahero, i mi a cuminsá e trabou aki na januari di 1990.

Anto, na 1991, mi tabatin e privilegio di asistí n’e Scol di Entrenamentu Ministerial na Manchester, Inglatera. Tabata ki un bendicion pa pasa dos luna disfrutando di asociacion cu homber cristian maduro i ricibí instruccion fo’i nan! Durante un parti di tur dia, nos como studiante tabatin un asignacion di trabou, locual tabata un alivio for di nos instruccion académico intenso. Mi a ser asigná pa laba bentana.

Unbes despues di a bolbe for di Inglatera, mi a cuminsá yuda haci areglo p’e reunimentu grandi di Testigo di Jehova celebrá dia 9 te 11 di augustus di 1991 den e enorme Stadion Strahov na Praga. N’e ocasion ei 74.587 hende di hopi tera a reuní libremente pa adorá nos Dios, Jehova!

E siguiente aña mi a kita for di mi trabou seglar como neuro-farmacólogo. Pa casi cuater aña mi ta traha den e oficina na Praga, unda mi ta sirbi di nobo como miembro dje comité cu ta supervisá e trabou di Testigo di Jehova den e República di Checoslovakia. Recientemente, un edificio nobo di dies piso, regalá na Testigo di Jehova, a ser renobá i ta ser usá como oficina di sucursal. Dia 28 di mei, 1994, e facilidad excelente aki a ser dedicá n’e sirbishi di Jehova Dios.

Entre e bendicionnan di mas grandi cu mi tin ta e privilegio di compartí berdad bíblico cu otro hende, incluyendo mi famia. Te cu awor, mi tata ni mama no a bira Testigo di Jehova, pero nan ta faborabel awor en cuanto mi actividad. Durante añanan recien, nan a asistí na algun reunion di nos. Mi speransa sincero ta cu nan dos, huntu cu miyones di otro hende di curason onrado, lo someté nan mes humildemente n’e gobernacion dje Reino di Dios i disfrutá di bendicion eterno cu Dios tin wardá pa esnan cu dicidí di ­sirbié.

(E publicacionnan na cua ta ser referí den e artículo aki a ser publicá dor di Watchtower Bible and Tract Society of New York, Inc.)

[Plachi na página 12]

Ora mi tabata alumno di universidad

[Plachinan na página 13]

Mi tata, cu a bira minister di educacion di Checoslovakia, i mi mama, cu tabata un prominente ciruhana di wowo

[Plachi na página 15]

Frantis̆ek Vyskočil, un científico i ateista, cu a bira Testigo di Jehova

[Plachi na página 16, 17]

Desde e caimentu di comunismo, Testigo di Jehova a celebrá hopi asamblea grandi den Oost Europa. Mas cu 74.000 hende a asistí n’e asamblea ei na Praga na 1991

[Plachi na página 18]

Na mi asignacion di trabou ora mi a asistí n’e Scol di Entrenamentu Ministerial na Inglatera

[Plachi na página 18]

Nos edificio di sucursal na Praga, dedicá dia 28 di mei, 1994