‘Asta e Lenga di Hende Gagu Lo Papia’

TABATA e sesion djatardi di un dia special di asamblea di Testigonan di Jehova na Checoslovakia (awor e República Checo), i cientos di hende a reuní pa ricibí instruccion bíblico. Mi tabata pará tras dje plataforma repasando mi parti dje programa. E no tabata un parti grandi. Dos testigo hóben tabatin cu conta experencia, i ami simplemente tabatin cu sirbi como presidente pa nan parti. E mainta ei mi a sinti presion interno, i awor e tabata aumentando. Mi a sintí mi literalmente paralisá, cargá, i no por a papia.

Tal bes bo ta pensa cu casi tur hende ta nervioso den un situacion asina. Pero, esei tabata mas cu simplemente un caso di nervio. Lagá mi splica pakico.

Mi Problema cu Papiamentu

N’e edad di 12 edad, mi a cai i heridá mi cabes, nek i wesu di lomba. Despues di esei, mi a bira gagu de bes en cuando of tabatin dificultad pa forma palabra, specialmente palabranan cu ta cuminsá cu e letternan p, k, t, d, i m. Avéces mi no por a papia mes.

E problema no a molestiá mi muchu n’e tempu ei; el a parce como simplemente un incumbinencia. Pero miéntras cu e añanan a pasa, mi a desaroyá un berdadero miedu di cualkier sorto di papiamentu na público. Un biaha mi a cai flauw dunando un spreekbeurt dilanti klas na scol. I tabatin bes ora mi tabata haci compra, ora cu e bendedornan a puntrá mi kico mi tabata busca, mi no por a contestá nan. Miéntras cu mi a lucha pa papia, iritacion dje bendedor a aumentá: “Pura. Mi no por warda henter dia. Otro cliente ta wardá mi.” Como resultado, mi no por a cumpra e artículonan cu tabata necesario.

Mi añanan di scol tabata mashá difícil. Ora mi tabatin spreekbeurt, e otro alumnonan a harí mi, pasobra mi tabata gagu. Pero, mi a gradua di scol secundario i na 1979 mi a sigui studia na Universidad di Praga, Checoslovakia. Siendo cu mi a gusta deporte, mi a tuma cursonan pa duna les di gimnastik. Pero, con mi por cumpli cu mi doel? Apesar di mi desconfiansa, mi a forsa padilanti.

Buscando Yudansa

Mester tabatin un manera pa librá mi dje obstáculo den mi papiamentu. P’esei, despues di a gradua di universidad, mi a determiná di haña yudansa profesional. Mi a busca un clínica na Praga cu a specialisá den tratamentu di problema di papiamentu. Durante e promé consulta, un enfermera a bisa sin pensa: “Bo neurósis ta raro!” Tabata doloroso pa mi kere cu el a considerá mi neurótico, aunke expertonan ta di acuerdo cu gagamentu no ta un estado neurótico. Pronto mi a mira cu un desafio raro a enfrentá mi: Mi tabata un homber hóben di 24 aña di edad, i tur e otro pashentnan tabata mucha.

Pronto, tur e personal, incluyendo e sicólogo, tabata duná mi yudansa. Nan a purba tur cos. Un biaha, nan a prohibí mi di papia cu otro hende pa cincu siman. Un otro biaha, nan a permití mi papia cu un solo tono i m-a-s-h-a lento. Aunke e tratamentu aki a yudá mi, como resultado nan a duná mi e bijnaam di Encantador di Colebra pasobra hopi hende a pega soño durante mi spreekbeurtnan.

Contacto cu Testigonan di Jehova

Un dia den zomer di 1984, ora mi tabata canando den centro dje stad, dos homber hóben a acercá mi. Nan aparencia físico no a sorprendé mi sino loke nan a bisa. Nan a bisa cu Dios tin un gobiernu, un Reino, cu lo pone fin na tur problema di humanidad. Nan a duná mi nan number di telefon, i mi a yama nan despues.

N’e tempu ei e gobiernu comunista no a reconocé e Testigonan di Jehova como un organisacion religioso legal na Checoslovakia. Pero, pronto mi interes a aumentá asina tantu cu mi a cuminsá asistí na nan reunionnan. Mi simplemente por a sinti e amor i interes cu e Testigonan di Jehova tabatin un pa otro.

E Caminda pa Confiansa

Yudansa pa mi problema di papia a bini den forma di loke ta yamá e Scol di Ministerio Teocrático, un scol conducí semanalmente den tur congregacion di Testigonan di Jehova. Nan a urgí mi pa inscribí, i mi a hacié. Riba base di un sugerencia presentá den un buki di siñansa dje scol, yamá Guía para la Escuela del Ministerio Teocrático, mi a traha riba cualidadnan oratorio tal como afluencia, pronunciacion, énfasis cu ta comunicá sentido, i modulacion.a

Mi promé parti, locual tabata lesamentu di Bijbel, tabata un fracaso completo. Mi tabata mashá nervioso mes i casi no por a yega cas. Cuantu mi a apreciá e efectonan relahante di un baño cayente!

Despues dje promé parti ei, e superintendente di scol cu bondad a duná mi atencion personal. E no solamente a duná mi conseho constructivo sino a encomendá mi. Esei a duná mi e curashi pa sigui purba. Un poco despues, na 1987, mi a bira un Testigo di Jehova bautisá. Un poco luna despues, mi a muda for di Praga te n’e pueblo trankilu di Žďár nad Sázavou. E grupo local chikitu di Testigonan di Jehova a duná mi un bon biní caluroso. Tambe nan a aceptá mi moda di papia basta poco poco, i tal aceptacion a fortalecé mi respet propio.

Cu tempu, mi a cuminsá conducí un grupo chikitu di studio bíblico, anto a duna mi promé discurso bíblico público. Cu tempu, despues dje cambio di gobiernu na Checoslovakia, mi a cuminsá duna discursonan asina den congregacionnan bisiña. Den ambientenan straño e problema cu mi papiamentu a bolbe. Pero, mi no a entregá.

Enfrentando Desafionan Special

Un dia un anciano cristian a invitá mi na su lugá di empleo. El a bisa: “Petr, mi tin bon noticia pa bo! Nos kier pa bo participá den e binidero asamblea di circuito.” Mi a sinti cu lo mi bai flauw i mi mester a sinta. P’e desilusion di mi amigu, mi a nenga e oferta.

E nengamentu ei a molestiá mi. Mi no por a kit’é for di mi mente. Durante reunionnan cristian ora mencion a wordu hací di confiansa den Dios, mi a corda e nengamentu cu dolor. Den e reunionnan tin bes nan a mencioná Gideon, cu bou di direccion di Dios a enfrentá henter e ehército di Madian cu 300 homber so. (Huesnan 7:1-25) Gideon berdaderamente a confia den su Dios, Jehova! Mi a sigui ehempel di Gideon ora mi a nenga e asignacion? Francamente, mi no por bisa cu mi a hacié. Mi a sinti bergwensa.

Sin embargo, mi rumannan cristian a nenga di bandoná mi. Nan a ofrecé mi un otro oportunidad. Mi a ser invitá pa participá den e programa di dia special di asamblea. E biaha aki mi a aceptá. Aunke mi a apreciá e privilegio, francamente, e idea di papia cu un sala yen di hende a paralisá mi. Mi realmente tabatin cu traha pa aumentá mi confiansa den Jehova. Pero con?

Mediante un consideracion atento i cabal dje fe i confiansa cu otro Testigonan a pone den dje. E hacimentu di esei a fortalecé mi. Asta un carta skirbí dor di Verunka di seis aña di edad, e yu muher di un amigu, a sirbi como un bon ehempel pa mi. Verunka a skirbi: “Na september, mi ta bai scol. Mi no sa con lo bai cu e himno nacional. Mi ta kere cu Jehova Dios lo bringa pa mi, mescos cu el a haci pa Israel.”

Wel, esei tabata solamente algun dje cosnan cu a sosodé promé cu e sesion djatardi dje dia special di asamblea cu mi a mencioná na principio. Mi a haci oracion cu fervor. Awor mi preocupacion no tabata tantu riba afluencia di mi papiamentu sino riba e dunamentu di alabansa n’e gran nomber di Dios dilanti dje auditorio grandi aki.

Pues, mi a para ei i e microfon a enfrentá mi, dilanti cientos di hende. Anto, tumando na cuenta cu e mensahe ta mas importante cu e mensahero, mi a hala un rosea grandi i a cuminsá. Despues, mi tabatin tempu pa analisá e situacion. Mi tabata nervioso? Sigur cu sí, i mi asta a bira gagu un par di biaha. Pero, sin e apoyo di Dios mi sa cu mi no por a papia mes.

Despues, mi a cuminsá meditá riba loke un ruman cristian a bisá mi un biaha: “Keda contentu cu bo tin e problema di ta gagu.” N’e tempu cu el a bisa esei, e palabranan tabata un berdadero sorpresa pa mi. Con e por bisa esei? Cordando awor, mi ta comprendé loke e tabata kier men. Mi problema di ser gagu a yudá mi confia den Dios en bes di confia den mi mes.

Vários aña a pasa desde e atardi dje dia special di asamblea. Durante e añanan aki mi a haña otro privilegionan di papia dilanti auditorionan grandi. Mi a ser nombrá como anciano cristian den Žďár nad Sázavou i tambe como pionero, locual ta un evangelisador di tempu completo di Testigonan di Jehova. Imaginá bo! N’e tempu ei mi a dedicá mas cu shen ora tur luna papiando cu hende tocante e Reino di Dios, sin mencioná e tempu cu mi a dedicá tur siman siñando den nos reunionnan cristian. I awor mi ta sirbi como superintendente di circuito, dunando discursonan den un congregacion diferente tur siman.

Mi curason simplemente ta yen di aprecio ki ora cu mi ta lesa e profecia special ei den e buki bíblico di Isaías: “Asta e lenga di hende gagu lo ta lihé papiando cosnan claro.” (Isaías 32:4; Exodo 4:12) Jehova en berdad a resultá di ta cu mi, i a yudá mi ‘papia cosnan claro’ na su onor, alabansa, i gloria. Mi ta mashá contentu i felis cu mi por alabá nos Dios sumamente misericordioso.—Manera Petr Kunc a relatá.

[Nota]