Hóbennan Sa Puntra . . .

Pakico Mi No Por Mantené un Amistad?

“Ami cu mi amiga tabatin hopi cos i hopi actividad en comun; nos a gosa pasamentu di tempu huntu. Pero di ripiente nos amistad a bira cada bes mas friu. Esei a causa un berdadero depresion pa mi.”—Maria.

POR fin bo a haña un amigu cu ta comprendé bo i no ta husgá bo. Anto, di ripiente, boso amistad ta cuminsá desparcé. Bo ta purba di scap’é, pero sin éxito.

Un amigu leal ta di balor incalculabel. (Proverbionan 18:24) I perdementu di dje por ta un experencia penoso. Bijbel ta bisa nos cu ora Job su amigunan a bandon’é, el a lamentá: “Mi conocínan íntimo no ta existí mas, i esnan cu mi a conocé, nan mes a lubidá mi.” (Job 19:14) Bo por sintí bo igualmente afligí si un amistad recientemente a fria. Manera e hóben Patrick a bisa, “ta como si fuera un hende cu bo ta stima a muri.” Pero, con bo ta sintí bo si casi tur amistad cu bo tabatin ta terminá?

Amistadnan Delicado

E buki Adolescence di Eastwood Atwater ta bisa cu amistad di hóbennan “tin e tendencia di bai i bin, cu cambio dramático di ripiente i sintimentu di amargura ora amigunan ta separá.” Kico ta haci amistad di hóbennan asina delicado? Un motibu ta cu ora bo ta bira mas bieu, bo sintimentu, punto di bista, meta, i interesnan ta cuminsá cambia. (Compará cu 1 Corintionan 13:11.) Bo por haña cu bo ta bai dilanti di otro hóben—of ta keda atras—di algun manera.

Pues, ora amigunan ta bira grandi, tin bes cu nan relacion íntimo ta mengua gradualmente—no pa motibu cu nan ta rabiá cu otro, sino pa motibu cu nan ta desaroyá otro meta, interes, i principionan. Por ta asta mihó pa un relacion terminá. Ora bo ta bira mas bieu i ta cuminsá tuma asuntunan spiritual mas na serio, bo por realisá cu algun di bo amigunan di ántes no tabata un influencia saludabel. (1 Corintionan 15:33) Bo ta interesá den nan, pero bo no ta gusta nan compania manera na ántes.

Loke Ta Venená Amistad

Sin embargo, con bo ta sintí bo si bo ta sigui perde amigu—perde relacionnan cu bo kier mantené? Francamente esei por nificá cu bo tin algun defecto di personalidad pa vence. Por ehempel, yaluzí ta venená amistad. Supongámos cu bo tin un amigu cu tin mas placa, mas talento, ta mas atractivo, of ta mas popular cu bo. Bo ta sinti rencor dor cu e ta ricibí mas atencion cu bo? “Yaluzí ta putrimentu pa wesu.” (Proverbionan 14:30) E hóben Keenon a admití, “Ami realmente a envidiá e popularidad di mi amigu i tur loke e tabatin pero cu ami no tabatin, i esei a afectá nos amistad.”

Un caracter dominante por ta un otro inclinacion destructivo. Supongámos cu bo a tende cu un amiga ta pasa cada bes mas tempu cu otro hende i cada bes ménos cu bo. Un hobencita a admití: “Mi a tabata yalurs asta ora otro hende a papia cu algun amiga di mi.” Kisas bo ta considerá cu asociacion di bo amiga cu otro hende ta un traicion.

Perfeccionismo tambe por causa terminacion di amistad. Por ehempel, bo ta tende cu un amigu a papia di bo tras di bo lomba, i kisas asta a revelá asuntunan confidencial. (Proverbionan 20:19) Bo ta bisa cu rabia, “Mi no por confi’é nunca mas!”

Amistad—Ricibí of Duna?

Si yaluzí, un caracter dominante of perfeccionismo ta pone bo amistadnan na peliger, puntra bo mes, ‘Kico mi kier ricibí for di un amistad?’ Bo ta imaginá cu un amistad kier men cu otro hende ta cla pa obedecé bo, un sorto di criá pa duná bo tur loke bo pidi? Bo ta busca amistad pa prestigio, popularidad, of ganashi? Bo ta spera debocion exclusivo for di un amigu, cu poco lugá pa otronan den e relacion? Anto bo tin cu cambia bo idea tocante amistad.

Nos ta siña for di siñansanan bíblico cu bon relacion cu otro hende ta resultá, no di ricibí, sino di duna! Na Mateo 7:12, Jesucristo mes a bisa: “Tur loke boso kier pa hende haci na boso, boso tambe di igual manera tin cu haci na nan.” Ta solamente natural pa bo spera cierto cosnan for di amigunan. E buki Understanding Relationships ta admití: “Ta natural pa spera pa un amigu ser un hende cu ta onrado i franco, ta cariñoso, ta conta nos su secreto i problemanan, ta duna nos yudansa ora nos tin mester di dje, ta confia nos i tambe . . . ta dispuesto pa traha pa resolvé desacuerdo.” Pero, esei no ta e fin dje cuenta. E buki ta agregá: “Esei ta loke hende ta spera pa un amigu haci pa nan i ta spera di haci pa amigu en buelta.”—Letter cursivo di nos.

Ripará con Jesus mes a trata amigu íntimo di dje. El a bisa su disipelnan: “Mi no ta yama boso esclabo mas, pasobra un esclabo no sa loke nan doño ta haci. Pero mi a yama boso amigu.” Pero, e amistad di Jesus cu su disipelnan tabata fundá riba loke nan por a haci pa Jesus? Al contrario. Jesus a bisa: “Ningun hende tin mayor amor cu esaki, cu un hende entregá su alma na fabor di su amigunan.” (Juan 15:13, 15) Sí, e berdadero base pa amistad ta amor cu ta haci sacrificio propio! Ora amor ta e fundeshi, un relacion por sobrebibí pleitu i problemanan.

Ora Problema Ta Presentá

Por ehempel, imaginá bo cu bo amigu tin mas placa, mas inteligencia of mas talento cu bo. Amor inegoista ta yudá bo alegrá cu bo amigu. En todo caso, segun Bijbel: “Amor no ta yalurs.”—1 Corintionan 13:4.

Of, supongámos cu bo amigu ta bisa of ta haci algu cu ta ofendé bo. Esei kier men e fin di boso amistad? No necesariamente. Apostel Pablo a keda hopi decepcioná ora su amigu Marco a bandon’é durante un biahe di misionero. Pablo a keda asina decepcioná cu el a nenga di laga Marco bai cuné riba su siguiente biahe! Pablo asta tabatin un pleitu cu Barnabas, primu di Marco, tocante e asuntu. Pero, hopi aña despues, Pablo a mencioná Marco cu cariño, i asta a invit’é na Roma pa yud’é. Ta parce cu nan a resolvé nan problema.—Echonan 15:37-39; 2 Timoteo 4:11.

Pakico no purba di haci mescos ora problema ta presentá den bo amistadnan? No laga asuntunan empeorá. (Efesionan 4:26) Promé cu bo tuma un decision lihé of haci acusacionnan den rabia, scucha loke bo amigu tin di bisa tocante e asuntu. (Proverbionan 18:13; 25:8, 9) Tal bes tin un mal comprendimentu. Pero, supongámos cu bo amigu realmente no a usa sano huicio. Corda cu bo amigu ta solamente hende. (Salmo 51:5; 1 Juan 1:10) I nos tur ta culpabel di a bisa of a haci cosnan cu ta causa duele despues.—Compará cu Eclesiástes 7:21, 22.

No obstante, bo por expresá francamente cuanto dolor e accion di bo amigu a causá bo. Esei por conmové bo amigu p’e pidi pordon sinceramente. Siendo cu amor “no ta tene cuenta dje daño,” kisas bo por lubidá e incidente. (1 Corintionan 13:5) Cordando un amistad cu el a perde, e hóben Keenon a bisa: “Si mi tabatin cu haci tur esei di nobo, lo mi no a spera perfeccion den nos amistad. Lo mi a scuch’é mas i a apoy’é i no a engrandecé su defectonan. Mi ta comprendé awor cu loke ta necesario pa un amistad exitoso ta di confrontá i resolvé e prueba i desafionan.”

Pero, supongámos cu bo amigu no ta pasa mes tantu tempu cu bo manera na ántes of mes tantu cu lo bo gusta? Por ta cu bo ta purba di dominá demasiadamente e tempu i atencion di bo amigu? Esaki por sofocá un relacion. Hende cu tin relacionnan saludabel ta duna un e otro e libertad pa haci loke nan kier. (Compará cu Proverbionan 25:17.) Nan ta permití suficiente tempu pa nan gosa e compania di otro hende! En todo caso, Bijbel ta consehá hende cristian pa “expandé” nan amistadnan. (2 Corintionan 6:13) Pues, ora un amigu ta haci esei, no ta necesario pa consider’é como desleal.

Realmente, no ta un bon idea pa bira demasiadamente dependiente riba ningun hende tog. (Salmo 146:3) Ta sabí pa cultivá amistadnan fuera di e grupo di hóbennan di bo mes edad, tal como bo mayornan, ancianonan, i otro adulto cariñoso i responsabel. Ana ta conta un experencia cu gustu: “Mi mama ta mi mihó amiga. Mi por papia cuné tocante cualkier cos i tur cos.”

Bo Por Disfrutá di Amistad Duradero!

Bijbel ta bisa na 1 Pedro 3:8: “Finalmente, boso tur sea dje mésun ánimo i parecer, compartiendo sintimentu como compañero, teniendo cariño fraternal, tiernamente compasivo, humilde di mente.” Sí, mustra bondad, compasion, integridad moral, i berdadero interes den otronan, i lo bo semper atraé amigunan! Ta cierto cu amistadnan duradero ta exigí esfuerso i determinacion. Pero, e recompensanan cu nan ta duna ta wel bale la pena.

Interesantemente, Bijbel ta mencioná David i Jonatan. Nan a disfrutá di un amistad sobresaliente. (1 Samuel 18:1) Nan por a pasa por haltu di yalurs insignificante i defecto di personalidad. Esaki tabata posibel pasobra tantu David como Jonatan a apreciá amistad cu i lealtad na Jehova Dios mas cu tur otro cos. Haci mescos, i lo bo tin poco dificultad pa mantené amistad cu hende temeroso di Dios!

[Plachinan na página 26]

Hopi bes amistadnan ta terminá ora un amigu ta kere cu ta desleal pa bo cera mas amistad cu otro hende