Un Mundu Sin Crímen—Con?

E LUCHA contra crímen organisá ta andando na tur parti di mundu. “Den un periodo di tempu hopi corticu a logra progreso notabel contra e Mafia,” U.S.News & World Report a declará, “danki principalmente na un solo ley, e Decreto di Organisacionnan cu Influencia Extorsionista i Corupto, esta RICO.” E ta permití pa condená organisacionnan criminal riba e base di un patronchi di actividad di extorsion, no djis actonan individual. Esaki, huntu cu informacion hañá via combersacionnan grabá den secreto i for di miembronan di gèng cu a bira informante a cambio di un castigu mas leve, a hunga un rol den e éxito dje lucha contra e Mafia na Merca.

Na Italia tambe autoridadnan ta bahando duru riba e gèngnan. Den áreanan manera Sicilia, Sardinia i Calabria, caminda crímen organisá ta fuerte, a manda unidadnan di ehército pa patruyá edificionan público i áreanan importante pa prevení atakenan dor di elementonan criminal. Gobiernu ta considerá esaki di ta mescos cu un guera civil. Cu lidernan notorio di asociacionnan criminal den prizon i un ex-promé minister hibá na huicio pa su supuesto coneccionnan cu Mafia, Italia ta mirando algun resultado.

Na Hapon gobiernu a imponé restriccionnan riba e yakuza ora el a pone na vigor e Ley Contra Crímen Organisá dia 1 di mart, 1992. Bou dje ley aki, una bes un organisacion di gèngster ser designá como tal, e ta prohibí di cometé 11 acto di forsamentu violento, incluyendo exigí placa pa keda ketu tocante un asuntu, participacion den extorsion a cambio di proteccion i intervencion den resolvé pleitu a cambio di un suma. Dor di imponé cumplimentu dje ley aki, e gobiernu tin como meta pa stanca tur fuente di ingreso di mafia. E ley a dal e organisacionnan criminal duru. Algun grupo a cai for di otro, i un lider criminal a cometé suicidio—aparentemente dor cu a imponé cumplimentu cu e ley estrictamente.

En berdad, gobiernunan i agencianan cu ta imponé ley ta bringando duru contra crímen organisá. Tog, Mainichi Daily News, dunando un reportahe tocante un conferencia, tené na 1994, di hues i funcionarionan di polis for di tur parti di mundu, a bisa: “Crímen organisá ta crece bira mas fuerte i mas ricu na prácticamente tur parti di mundu, acumulando te cu 1 biyon dollar mericano tur aña na ganashi.” Lamentablemente, esfuersonan humano pa eradicá asociacionnan criminal for di cara dje tera ta limitá. Un motibu pa esaki ta cu den hopi caso husticia no ta lihé ni sigur. Pa hopi hende, leynan hopi bes ta parce di cai na fabor dje criminal, no dje víctima. Bijbel a declará rond di 3.000 aña pasá: “Pa motibu cu sentencia contra un malecho no a ser ehecutá lihé, p’esei mes e curason dje yunan di hende a keda plenamente determiná den nan pa haci malu.”—Eclesiástes 8:11.

Saliendo for di Organisacionnan Criminal

Ademas di purba kibra crímen organisá for di pafó, gobiernunan a purba yuda esnan cu ta paden pa sali di asociacionnan criminal. E paso ei no ta fácil pa tuma. Segun un dicho bieu, “e único manera pa sali for di Mafia ta den un caha di morto.” Pa un mafioso sali for di un organisacion di yakuza, ta ser rekerí pa e paga un suma grandi di placa of nan mester kita un pida di su pink of e pink completo afó. Aumentando e temor di kibra lasonan cu e baho mundu, un ex-gèngster tin cu enfrentá e realidad di hiba un bida onrado i decente. Su solicitudnan pa trabou lo ser rechasá hopi bes. Sin embargo, den algun pais tin numbernan di telefon pa yama polis pa yuda gèngsternan cu ta purbando di libra nan mes i ta hañando cu ta difícil pa haña un trabou decente.

Pa enfrentá e presion for dje famia di gèng i e prehuicio di sociedad, un mafioso tin mester di un motivacion fuerte pa bai riba bon caminda. Kico lo por motiv’é? Esei por ta amor pa su famia, un anhelo pa hiba un bida pacífico of un deseo pa haci loke ta corecto. Sin embargo, e relato di Yasuo Kataoka den e siguiente artículo ta mustra cua ta e motivacion di mas fuerte.

Yasuo Kataoka ta un caso típico di cientos cu a cambia nan bida completamente. Cualidadnan manera bestia cu nan a desplegá anteriormente a ser reemplasá dor di un personalidad nobo “cu a ser creá segun e boluntad di Dios den berdadero husticia i lealtad.” (Efesionan 4:24) Awor, hendenan cu tabata manera lobo ta bibando na pas meimei di ciudadanonan cu genio suave, manera lamchi, i nan ta asta yudando otro hende!—Isaías 11:6.

Librá Bo dje Spiritu di Mundu

Manera a ser mencioná den e artículo anterior, no solamente tur asociacion criminal ta bou di e solo autoridad invisibel di Satanas e Diabel, sino ta e mundu henter. Hende no ta ni realisá esei, pero Satanas a organisá e mundu pa sirbi su finnan criminal. Mescos cu asociacionnan criminal ta percurá rikesa i sistemanan ficticio di famia, Satanas ta hunga e papel di un doño generoso dor di duna hende rikesa, placer i e sintimentu di unidad. Aunke kisas bo no ta realisá esei, e por a gañá bo cu su complotnan malbado. (Romanonan 1:28-32) Bijbel ta bisa nos cu “amistad cu e mundu ta enemistad cu Dios.” (Santiago 4:4) Ta peligroso pa purba gana e amistad i fabor dje mundu aki, cu ta bou di influencia satánico. E Creador dje universo tin un ehército di angel bou di Jesucristo cla pa caba cu Satanas i su demoñonan afin di limpia e mundu di nan influencia malbado.—Revelacion 11:18; 16:14, 16; 20:1-3.

Con anto bo por sali for di bou dje influencia dje mundu di Satanas? No dor di hiba un bida di un ermitaño, sino dor di libra bo mes dje actitudnan i manera di pensa cu ta dominá e mundu awe. Pa haci esei, lo bo tin cu lucha contra e tácticanan di Satanas pa spantá bo i resistí e incentivonan cu e ta ofrecé pa mantené hende den su gara. (Efesionan 6:11, 12) Esaki lo nificá haci sacrificionan, pero bo por libra bo mes mescos cu otronan a haci si bo ta dicididu i si bo haci uso dje yudansa cu Testigonan di Jehova ta ofrecé.

Kico lo tin despues cu Dios actua pa limpia e mundu caótico aki di crímen? “En cuanto e desendiente dje malbadonan, nan en berdad lo ser cortá,” Bijbel ta bisa, i e ta sigui bisa: “E hustunan mes lo poseé e tera, i nan lo biba pa semper riba dje.” (Salmo 37:28, 29) E ora ei, lo no tin ningun motibu pa tembla pa causa di esnan cu tabatin cualidadnan manera bestia, pasobra nan lo a ser transformá dor di “e conocimentu di Jehova,” locual lo yena e tera.—Isaías 11:9; Ezekiel 34:28.

Awe transformacionnan asina a bira un realidad caba, manera e siguiente historia di bida real di un ex-miembro di yakuza na Hapon ta mustra.

[Plachi na página 10]

Den Dios su mundu nobo, tur hende lo disfrutá dje obra di nan man