Parke di Bestia—E Ultimo Speransa pa Animalnan den Naturalesa?

ULTIMO tempu cambionan drástico a tuma lugá discretamente den e parkenan di bestia mas progresivo di mundu. Como un evidencia bisto, nan a remodelá e manera cu nan ta exhibí e animalnan pa hacié cuadra cu e concepto mas humanitario di “hincamentu den un paisahe”—esta di reproducí e medio ambiente natural dje animalnan, completo cu palu, formacion di piedra, mata cu ta rama, neblina, zonido i asta otro animal i paranan compatibel. Aunke e cambionan aki ta caru—rond di 1,2 mil miyon dollar na gastu tur aña pa mehorá parkenan di bestia i acuario na Merca so—nan ta ser considerá necesario en bista dje papel nobo i ambicioso cu parkenan di bestia a asumí.

E Mision pa e Próximo Siglo

Siendo cu e scarcedad di diversidad biológico ta menasando e planeta, e parkenan di bestia mas principal di mundu a definí nan mision pa siglo 21 como unu di conserbacion, educacion i investigacion científico. Inspirá dor dje desafio i forsá dor di su urgencia, algun parke di bestia asta a descartá e nomber ‘parke di bestia’ completamente, i a preferá pa en bes di esei usa términonan manera “reservaat pa animalnan den naturalesa” of “parke pa conserbacion.”

E publicacion The World Zoo Conservation Strategy ta un antorcha cu ta lusa e caminda nobo. Describí dor di un autor como “e documento mas importante den e comunidad di parke di bestia cu a yega di ser producí,” Strategy ta, en esencia, e statutonan zoológico; e “ta definí e responsabilidad i oportunidadnan dje parkenan di bestia i acuarionan di mundu pa por conserbá e variedad mundial di animal den naturalesa.” Eliminando tur duda tocante e caracter nobo, Strategy ta agregá: “E derecho di existencia di un parke di bestia of acuario ta dependé de facto riba e aporte cu e ta duna na conserbacion.”

Dunamentu di educacion n’e público i investigacion científico, specialmente relacioná cu bruimentu di animalnan den cautiverio, ta vital p’e papel nobo aki. Entre nos hóbennan djawe tin e cuidadónan di parke di bestia di mañan, kendenan lo tin e responsabilidad di preservá e restonan salbá di un lista aumentante di especienan cu den naturalesa a bai den extincion. Nan lo cumpli cu e encargo aki cu sabiduria i dedicacion? I humanidad en general lo haña un punto di bista mas iluminá di naturalesa? Pa logra esaki, Strategy ta animá cada parke di bestia pa bira un educadó, pa mira su mes como parti di “un red mundial di concientisacion.”

Parkenan di Bestia Ta Uni den un Red Mundial

Debí n’e magnitud extremo di nan tarea, hopi parke di bestia ta uniendo pa forma un red mundial cu actualmente ta enbolbé 1.000 parke di bestia. Organisacionnan internacional, manera E Organisacion Mundial di Parke di Bestia i e Union Internacional pa e Conserbacion di Naturalesa i Fuentenan Natural, ta vinculá e parkenan di bestia aki huntu i ta percurá coordinacion i direccion.

Indicando un motibu urgente pa un cooperacion asina, e buki Zoo—The Modern Ark (Parke di Bestia—E Arca Moderno) ta bisa: “Pa logra mantené e matadó silencioso, esta inteelt, te na un límite, un parke di bestia no por a keda contentu mas cu manehá su propio grupito di, ban bisa, tigernan siberio. Mas bien, tur tiger siberio den cautiverio den tur e parkenan di bestia di un continente—of asta di mundu—mester a ser tratá como un solo poblacion.” Sí, cientos di cada especie ta necesario pa minimisá of eliminá inteelt—locual lo por hiba na infertilidad i extincion—i ta bisto cu esaki ta fuera dje capacidad di un solo parke di bestia. Strategy ta bisa: “E unimentu grandi aki di tur recurso disponibel lo ta necesario pa duna e biosfeer di nos Tera . . . e mihó oportunidad posibel pa sobrebibí. Tin hopi hende cu ta kere cu si nos no logra conserbá otro especienan, nos lo no logra salba nos mes.” Naturalmente, e actitud pesimista aki no ta tuma na cuenta e promesa bíblico di un tera restorá na condicion paradísico.—Revelacion 11:18; 21:1-4.

Medionan pa Yuda e Parkenan di Bestia Tin Exito

E crísis di extincion a inspirá tambe e creacion di algun yudansa di alta tecnologia internacionalmente accesibel pa brui animalnan den cautiverio: bukinan di genealogia di animalnan, e International Zoo Yearbook (IZY), i e Sistema di Informacion Internacional di Especienan (ISIS) computerisá.

Cada buki di genealogia zoológico ta duna un lista detayá di tur animal di un cierto especie cu ta bibando den parke di bestia, unda cu e por ta na mundu. Como un registro internacional, e ta e clave pa preservá un coleccion genético saludabel i pa mantené e ‘matadó silencioso,’ esta inteelt, te na un límite. E Parke di Bestia di Berlin a habri e promé-promé buki di genealogia ora cu, na 1923, el a cuminsá cria e wisent, of bison europeo, cu a ser hibá te n’e rand di extincion dor di Guera Mundial I.

Pa facilitá e distribucion mundial di datonan científico manera bukinan di genealogia, IZY i datonan demográfico, ISIS a bai on-line na 1974 na Merca. Su netwerk electrónico cu ta expandiendo i su inmenso data base cu ta sigui crece sin stop, ta yudando parkenan di bestia traha huntu pa combertí den realidad e concepto di tin hopi parke di bestia ta traha huntu.

E instrumentonan biológico cu e parkenan di bestia a aceptá ta, entre otro, determinacion dje perfil di DNA, transplante di embrio, fertilisacion in vitro i criogénica (vrismentu di sperma i embrio). Determinacion dje perfil di DNA ta yuda parkenan di bestia identificá e mayornan dje bestianan cu un exactitud di 100-porciento, loke ta esencial pa controlá inteelt entre especienan manera animalnan cu ta biba den manadanan caminda ta difícil pa controlá e liña di decendencia. Miéntras tantu, transplante di embrio i fertilisacion in vitro, ta acelerá e reproduccion. Un manera ta dor di amplia e base dje “mayor” dje especienan cu ta den peliger di extincion. Por hinca nan embrio den animalnan cu ta famia hopi djacerca—asta animalnan doméstico—cu ta sirbi e ora ei como mamanan substituto. Cu e técnica aki un baca holstein a duna lus na un gaur (bue di mondi) i un pushi doméstico a duna lus na e pushi di desierto indio den extremo peliger di extincion. Tambe esei ta reducí e gastu, rísico i trauma di transportá animalnan pa rasa cu ta den peliger di extincion. Un paki di embrio of sperma congelá ta tur loke mester hiba.

Siendo cu tin e posibilidad cu algun especie por disparcé totalmente, un cantidad di parke di bestia a asta empleá e ciencia di criogénica—vris sperma i embrio pa warda pa términonan largu. E parke di bestia congelá aki, ta ofrecé e prospecto cu desendientenan lo nace décadanan, kisas asta siglonan despues cu nan a bai den extincion! Aunke e ta yen di insiguridadnan, el a ser yamá e “garantia di último recurso.”

Estudionan den Naturalesa Ta Yuda Parkenan di Bestia Traha Mas Baby

Un estudio científico di animalnan, incluyendo nan comportacion den nan habitat natural, ta crucial pa brui animal den cautiverio i ta e inspiracion tras dje “hincamentu den un paisahe.” Pa animalnan por keda salú i producí crio, parkenan di bestia tin cu tuma nan instintonan na consideracion i tene nan “contentu.”

Por ehempel, chitanan machu i hembra, ta keda visualmente isolá den mondi i ta comunicá cu otro solamente dor dje holó di nan orina i sushi. E nanishi dje machu ta bis’é ki ora e hembra ta cla pa dek, anto e ta keda cuné pa solamente un of dos dia. Ora e parkenan di bestia a haña sa dje conducta aki, nan a modificá e lugánan caminda tin e chitanan cerá pa mantené e dos sexonan visualmente apart henter ora, cu excepcion dje periodo di dek, anto esei tabatin bon resultado; babynan a cuminsá nace.

Miéntras cu e chita ta gusta amor djaleu, esaki no ta e caso cu e flamingo. E ta rasa solamente ora e trupa ta demasiado grandi pa mayoria parke di bestia manehá. Di manera cu un parke di bestia na Inglatera a haci un experimento—el a “duplicá” e tamaño dje trupa mediante un spiel grandi. Pa promé biaha, e paranan berdaderamente a cuminsá haci nan ritual dramático di rasa! E ehempelnan aki ta duná bo un idea con complicá e bida di animalnan den naturalesa ta? Siguramente e parkenan di bestia ta enfrentá un desafio extraordinario.

Con Realístico e Meta di Salba e Animalnan Ta?

Dunando un indicacion dje potencial dje programa nobo, algun especie cu a ser criá den cautiverio, ya caba a ser introducí bek den nan habitat nativo. Entre esakinan tin e cóndor di California, e bison europeo, e búfalo mericano, e orix arabir, e tamarin leon di oro i e cabai di Przhevalsky. No obstante, tin nubianan scur riba e prospectonan riba término largu.

“E sociedad humano ta asina complicá, i e problemanan di mundu asina tantu,” Strategy ta bisa, “cu apesar cu hende a bira mas conciente i preocupá tocante naturalesa i medio ambiente, no tabata posibel pa pone un paro na hopi dje procesonan destructivo.” Como resultado, “conserbacionistanan mester ta prepará pa haña un medio pa pasa dor dje periodo crítico cu ta ser sperá,” e ta agregá. Ta natural cu esaki ta rekerí cooperacion riba tur nivel dje sociedad. E cooperacion actual, segun un autor científico, ta “deplorablemente ménos di loke e mester ta.” Si e presionnan cu ta hiba animalnan na extincion djis baha un poco pero no dal un buelta completo, asta e mihó esfuersonan por resultá di ta nulo tog. Mester crea habitatnan substancial i completo—no djis áreanan isolá cu ta hiba na inteelt. Ta solamente e ora ei parkenan di bestia por laga e animalnan cu nan a cria bai bek den mondi cu confiansa. Pero esaki ta un speransa realístico of e ta djis un ilusion?

Ademas, ta difícil pa kere cu un gran cantidad di parke di bestia trahando huntu mundialmente lo por solucioná e problema. “E berdad tristu,” segun Profesor Edward Wilson, “ta cu tur e parkenan di bestia na mundu awe por sostené un máximo di solamente 2.000 especie di mamífero, para, reptil i anfibio”—e top dje ijsberg. Di manera cu parkenan di bestia tin e tarea inenvidiabel di dicidí cua especienan ta selectá pa conserbacion miéntras cu e resto ta uni e lista largu di esnan cu ta na caminda pa pasa pa olvido.

Pa e expertonan riba e tereno di conserbacion, esaki ta lanta un pregunta masha grandi: En bista dje interdependencia di tur cos bibiente, ki ora biodiversidad lo baha te na e punto crítico caminda cu lo e desencadená un avalancha di extincion cu lo por caba cu hopi dje bida cu ta resta riba tera, incluyendo humanidad? Científiconan por solamente rei. “E eliminacion di un of dos of cincuenta especie lo tin efectonan cu nos no por premirá,” Linda Koebner ta bisa den Zoo Book. “Extincionnan ta creando cambio asta promé cu nos ta comprendé e consecuencianan.” Miéntras tantu, e buki Zoo—The Modern Ark ta bisa, “parkenan di bestia ta keda un dje refugionan mas crucial di bida den un guera planetario contra bida di animal, un guera di cua nos no por predicí con extenso lo e ta, pero unu pa cua futuro generacionnan lo tene nos masha responsabel.”

Pues, tin base pa speransa? Of ta asina cu futuro generacionnan ta condená na haña un mundu di monotonia biológico, miéntras cu nan mes ta na caminda di extincion?

[Plachi na página 7]

Hende ta nan pió enemigu

[Rekonosementu]

Tiger and Elephants: Zoological Parks Board of NSW

[Plachi na página 8]

Algun animal den peliger di extincion—bison, chita i rinócero pretu

[Rekonosementu]

Bison and Cheetahs: Zoological Parks Board of NSW

Rhinoceros: National Parks Board of South Africa