Ora Henter e Tera Ta un Refugio

BO KIER mira e criatura di mas peligroso na mundu? Anto wak den spiel! Sí, nos, hende, ta e pió roofdier riba tera! Nos ta asta mata otro riba un escala masal.

Pa haci e tera un lugá sigur pa animalnan den naturalesa, asta den parkenan di bestia—specialmente si nan bira e último refugio—guera, e plaga di humanidad, tin cu ser eliminá. Solamente 91 dje 12.000 animalnan dje Parke di Bestia di Berlin a sobrebibí Guera Mundial II. Hopi otro parke di bestia a sufri den mésun manera. Den e guera recien na e paisnan Balkan, trahadónan balente dje parke di bestia a evacuá hopi dje animalnan i a hiba nan na un lugá sigur; pero cientos di otronan, incluyendo biná, pushi salbahe grandi, beer i lobo a ser matá. Recientemente, den e selvanan di Cambodia, segun algun funcionario citá den e corant The Australian, Khmer Rouge a mata hopi animal raro deliberadamente. Di con? Pa cambia nan cueru i otro productonan pa arma!

Vandalismo ecológico, manera esun cu a ser perpetrá riba e Islanan Peron isolá, zuidwest di Darwin, Australia, ta un otro maldad cu mester eliminá pa no caba cu animalnan—sea paden of pafó di parkenan di bestia. Dos bes den tres aña, e lugá di brui dje pelicannan riba e islanan aki a ser cendé na candela, aparentemente pa ningun otro motibu cu mata, dje manera di mas cruel, miles di para yong cu no a bula ainda.

Sin embargo, den décadanan recien, e pérdida di mas grandi di especienan no a ser causá dor di malicia; e ta e efecto secundario di un poblacion humano aumentante, desesperá pa espacio pa biba i tera pa cultivá. Pa motibu dje invasion implacabel aki den habitatnan di animalnan i huntu cu esei polucion, The World Zoo Conservation Strategy ta spierta: “E prospecto dje sistema natural completo dje tera pa siglo 21 ta mustra scur. No tin nada cu ta indicá cu e destruccion cu ta sosodiendo na prácticamente tur parti di mundu lo stop pronto.”

En bista dje creciente preocupacion tocante e futuro dje tera, e mensahe di un tempu ora henter e planeta lo ta un refugio kisas ta zona demasiado fantástico. Tog e speransa ei ta fundá sólidamente, no riba hende cu poco perspicacia—cu djis 50 aña pasá, segun un escritor científico, no tabatin ningun idea dje devastacion ecológico actual—sino riba esun cu sí a premir’é, Jehova Dios. Mas cu mil nuebeshen aña pasá, el a predicí cu den nos tempu humanidad lo yega asina leu di ‘ruiná e tera.’ (Revelacion 11:18) Siendo cu esei a ser papiá ora tabatin masha poco hende ta biba riba tera, e profecia ei lo por a parce manera un fantasia pa hopi hende cu a biba den e tempu ei, pero ki exacto el a resultá di ta!

Ta un paradox cu e ruinamentu aki ta sosodiendo na un tempu ora ciencia i tecnologia ta parce di por haci casi milager: microtransmisor i satélitenan ta controlá e especienan den peliger di extincion, destruccion di selvanan di yobida ta ser midí na meter cuadrá for di espacio, i polucion di aire ta ser midí den cantidadnan mashá chikititu. Sin embargo, cu masha poco excepcion, hende ta parce di ta incapas pa actua riba e abundancia di datonan aki. Kisas hende ta manera e conductor di un trein cu ta coriendo for di control. E trein ta ekipá cu yen di instrumento electrónico sofisticá i monitornan cu ta bis’é tur loke ta sosodiendo, pero e no por para e trein!

Di Con e Esfuersonan Ta Fracasando?

Imaginá cu den un fábrica grandi, e manager orguyoso i sin escrúpulo ta tende e doño bisa cu lo e no dun’é promocion, sino mas bien, cu lo e kit’é for di trabou den algun luna. Amargá i yen di rencor, e ta usa engaño, soborno i tur sorto di triki bou di man pa haña un cantidad di trahadó pa crea confusion i destruccion. Nan ta pone e mashinnan faya, produccion cai i productonan sali deficiente—pero den un manera asina sabí pa scapa culpa. Miéntras tantu, empleadonan onrado, sin sa loke realmente ta tumando lugá, ta purba haci reparacion; pero mas duru nan purba, pió cosnan bira.

Di mésun manera e “manager” tramposo dje mundu aki a trama un plan contra humanidad i e tera. Pero den e caso aki nos no tin cu keda “ignorante tocante su mal intencionnan,” pasobra Bijbel ta desenmascar’é i ta revelá un criatura spiritual amargá—Satanas e Diabel—un angel cu a crea idea di grandesa i a deseá masha tantu pa ser adorá. (2 Corintionan 2:11; 4:4) Dios a sak’é for di Su famia celestial i a sentenci’é na destruccion.—Génesis 3:15; Romanonan 16:20.

Mescos cu e manager tramposo dje fábrica, e ‘tata aki di mentira’ tambe ta usa un arsenal di métodonan bou di man pa expresá su rabia. E ta odia Jehova Dios i kier daña Su creacion. (Juan 8:44) E instrumentonan mas potente di Satanas ta propaganda yen di mentira, golosidad, materialismo i siñansanan religioso dañino. Cu esakinan el a ‘gaña henter e tera habitá’ i a combertí hende—esnan cu mester a bira e guardiannan dje tera—den su roofdiernan di mas brutal, de echo, disipelnan di Nimrod di antigwedad “un yagdó poderoso na oposicion cu Jehova.”—Revelacion 12:9, 12; Génesis 1:28; 10:9.

E Unico Speransa Realístico pa un Refugio Terenal

Sin embargo, no ta imposibel pa vence e forsanan humano i sobrehumano cu ta causa extincion. E Creador todopoderoso di tur cos bibiente por saca nos for dje remolino teribel aki, anto el a primintí di haci esaki pa medio di su gobiernu celestial. E ta primintí di ruiná e roofdiernan ei cu ta ruinando e tera. Nos ta haci oracion pa esaki ora nos ta bisa: “Laga bo reino bini; bo boluntat sea hasí na tera meskos ku na shelu.”—Mateo 6:9, 10, Sosiedat Antiano di Beibel; Revelacion 11:18.

Bo a ripará cu e binimentu dje Reino ta vinculá cu e hacimentu dje boluntad di Dios na tera? Esaki ta pa motibu cu e Reino di Dios ta Dios su gobiernu pa reina riba e tera. I siendo un reino, e tin un rey—Jesucristo, e “Rey di reynan i Señor di señornan.” (Revelacion 19:16) Tambe e tin súbditonan. De echo, Jesus a bisa: “Felis ta esnan di genio suave, ya cu nan lo heredá e tera.” (Mateo 5:5) Sí, e personanan aki di genio suave ta su súbditonan terenal, i cu yudansa dje Reino di Dios, nan lo cuida nan herencia amorosamente, transformand’e den un paradijs cu ta bona i ta abundá cu bida. Ta interesante cu Strategy ta bisa: “E futuro di sernan humano i naturalesa ta solamente sigurá si henter humanidad por biba den un armonia nobo cu naturalesa.”

Historia i hende imperfecto ta indicá cu ta imposibel pa “henter humanidad” awe biba un dia den un “armonia nobo” asina cu naturalesa, ya cu nan ta laga Jehova afó. De echo, un motibu pakico Dios a laga e mundu aki sigui pa asina tantu tempu ta pa proba cu hende no por goberná nan mes. Pero, pronto, esnan cu ta anhelá pa e gobernacion di Cristo lo disfrutá di pas exkisito. Isaías 11:9 ta confirmá esaki, i tambe e ta señalá na e motibu pakico solamente e hendenan aki lo por biba den un “armonia nobo” cu naturalesa: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.” Sí, educacion divino ta e clave. I acaso esei no ta razonabel, ya cu ken otro cu no ta e Autor di naturalesa tin e sabiduria ei?

Kico di esnan cu ta persistí pa ignorá Jehova? “En cuanto hende malbado, nan lo ser cortá for dje tera mes,” Proverbionan 2:22 ta bisa. Sí, nan gana di haci guera of nan apatia lo costa nan nan bida den e “tribulacion grandi” cu ta acercando lihé—Dios su medio pa duna na tur cu ta persistí den explotá i vandalisá su creacion egoistamente nan huicio merecí.—Revelacion 7:14; 11:18.

Abo kier participá den e programa di rehabilitá e tera? Si ta asina, por fabor, siña loke Dios ta rekerí di bo dor di studia Bijbel. Bijbel so tin e poder di armonisá bo pensamentu cu esun dje Creador. (2 Timoteo 3:16; Hebreonan 4:12) Ademas, dor di aplicá loke bo ta siña, lo bo no solamente bira un mihó ciudadano awor, sino lo bo demostrá tambe cu en berdad bo ta e clase di persona na ken Jehova lo confia su “tera nobo” cu ta acercando rápidamente.—2 Pedro 3:13.

E publicadónan dje revista aki of e congregacion di Testigonan di Jehova mas cerca di bo lo ta encantá pa yudá bo cu un studio di Bijbel grátis na cas of cu mas literatura cu ta splica e asuntunan aki si bo ta deseá.