For Di Nos Lectornan

Casualidad of Diseño? Mi a caba di lesa e seri “Con Nos A Bin na Existencia? Pa Casualidad of dor di Diseño?” (8 di mei, 1997) El a interesá mi pa vários motibu: (1) E simplicidad cu cua boso a presentá un tópico asina profundo i complicá manera evolucion, i tambe e conviccion cu cua boso a defendé e punto di bista bíblico tocante nos orígen. (2) E plachinan cu boso a usa pa logra boso obhetivo digno di elogio. Mi ta un investigadó i studiante den un scol grandi di comunicacion. Artículonan asina ta proba cu SEMPER boso ta haci investigacion cuidadoso promé cu boso publicá. Sin duda esei ta e motibu pakico tur mi coleganan reportero, editor i investigadó ta lesa i disfrutá regularmente di Spierta!

D. S. T., Camerun

Pakico Asina Malu? Ami ta sinti tur e emocionnan cu Jason a expresá den e artículo “Hóbennan Sa Puntra . . . Pakico Mi Mester Ta Asina Malu?” (8 di mei, 1997) Cada bes cu mi lesa e artículo, mi ta sinti manera mi ta combersando cu un hende cu ta comprendé mi, apreciá mi i ta interesá den mi condicion. Masha, masha danki pa aliviá mi carga. Mi sa cu Jehova ta interesá i cu na su debido tempu, lo e eliminá tur malesa.

O. A., Ghana

Dos siman promé cu e artículo aki a sali, nan a constatá cu mi tin epilepsia. Mi a caba di cumpli 18 aña, i mi malesa a reducí drásticamente tur libertad cu mi a caba di haña. Tin asina tantu precaucion pa tuma i asina tantu píldora pa bebe na un cierto ora. Mi malesa a afectá mi mayornan masha hopi mes, kendenan a perde dos otro yu den morto. E artículo a conmové mi asina tantu cu awa a basha for di mi wowo. El a trata net e pensamentunan cu mi tabata tene aden, i mi a sintí mi un tiki normal atrobe. Mi por a mira cu tin otronan cu problema i preocupacionnan similar. Mediante su organisacion, Jehova ta pone por escrito e informacion cu mi tin mester pa keda para firme.

D. S., Merca

Ora mi a lesa e artículo, mi a realisá cu mi malesa ta causa mas sufrimentu na mi mayornan cu na cualkier otro hende. Nan ta bisá mi cu mi malesa ta heredá, i esei ta deprimí nan. Ora mi mira nan asina, mi ta haña masha duele di nan.

Y. H., Hapon

Durante mi infancia mi tabata bon di salú. Sin embargo, den mi adolesencia mi a haña un malesa tras di otro. Mi a cuminsá traha den e ministerio di tempu completo, i p’e promé dos lunanan, mi no por a alcansá mi metanan pa motibu cu mi tabata malu. Mi a bira hopi deprimí, pensando (eróneamente) cu mi a haci algu malu contra Jehova i e ta castigá mi cu malesa. E artículo a yudá mi ahustá mi pensamentu en cuanto mi situacion i pa cobra ánimo.

C. K., Ghana

Mi yu muher di nuebe aña tin un problema pa siña i tin parálisis celebral. E ta masha spiertu i ta conciente cu su hendikep ta limitá actividad normal. Apesar cu por lo general e ta alegre i felis, de bes en cuando e ta bira un tiki deprimí pa esaki. Huntu cu e consideracionnan cu e tin tur anochi cu su tata tocante e futuro Paradijs unda lo e ta mescos cu otro muchanan, e artículo aki a anim’é masha hopi.

Y. P., Merca

Pa rond di dies aña, mi a bin ta lucha cu un ‘enfermedad scondí,’ unu cu ta afectá mi sistema digestivo. Debí na esei, mi mester a bandoná e ministerio di tempu completo. Lesando e artículo aki, mi ta sinti, pa promé biaha, como si fuera un hende ta comprendé mi lucha. Ta un alivio pa sa cu mi no ta e único. Ta como si fuera nan a kita un carga inmenso for di riba mi. Mi no tin palabra pa gradicí boso. E artículonan animador i oportuno aki ta tene nos riba pia den e sistema bieu aki.

L. C., Cánada