Nos Yu No Ta Gagu Mas!

PA CASI ocho década, Spierta! ta yuda su lectornan trata cu problemanan di tur dia. Tin biaha e ta alertá nan pa desaroyo i tendencianan nobo riba tereno médico cu lo por tin un influencia profundo riba nan bida, manera e siguiente relato ta mustra.

Matthew a nace den nort di Inglatera na 1989. Te cu dos aña, e tabata un mucha normal. Anto, di ripiente asina, durante un vakansi, el a desaroyá un problema serio di papia gagu.

Su mama, Margaret, ta splica: “Ami cu mi casá a bai n’e clínica local di logopedia, i nan a bisa nos cu nan no por haci nada p’e te ora e haci shete aña, pasobra ta cu e edad ei mucha por controlá nan stemband. Pero ora Matthew a cuminsá bai scol, e no tabata por cu e tentamentu di otro mucha i su problema di gaga a empeorá. E tabata odia bai caminda tin hopi hende i a bira un mucha ketu. Tabata difícil asta p’e bai reunion na Salon di Reino.

Anto nos a topa cu e artículo ‘Speransa pa Hende Gagu,’ den ‘Observando e Mundu’ den e ¡Despertad! di 8 di april 1995. El a splica en breve e trabou di un tim di logopedista na Sydney, Australia, cu tabatin éxito den trata mucha gagu.

Nos a skirbi e Universidad di Sydney i a haña un contesta masha lief di Dr. Mark Onslow. El a sugerí pa nos yam’é na telefon. Ya cu nos ta biba n’e otro banda di mundu, su tim di logopedista a dicidí di purba ‘terapia a largu distancia.’ Nos, como mayornan di Matthew, a haña instruccion tocante e técnica dje tim via telefon, fax i audiocaset. Nan a adaptá e terapia na e necesidadnan personal di Matthew. Ami mes tabata sinta cuné i tabata yud’é den un forma relahá i informal pa corigí e palabranan cu e tabatin problema cuné. Mi tabata dun’é masha hopi elogio i recompensanan chikitu ora el a papia sin pega.

Seis luna despues, Matthew no tabata un mucha ketu, bibando den su propio mundu chikitu mas, sino tabata un hobencito normal, felis i spontáneo. Awor e ta contestá na reunion di congregacion i ta gusta mashá pa duna parti di lesamentu di Bijbel na Salon di Reino. Tambe e tin un participacion significativo den e ministerio di cas-pa-cas. E ta papia normal!

Ki gradicidu nos ta pa e pida noticia chikitu ei den Spierta! cu a transformá bida di nos yu!”—Contribuí.