Ki Aparencia Jesus Tabatin?

TIN vários factor cu a influenciá masha tantu e manera con historia seglar a describí Jesus su aparencia. Debí na e factornan aki tin diferencianan grandi den e manera con artistanan a pint’é.

Dos factor ta cultura dje pais i e periodo di tempu den cua a producí e obra di arte. Ademas, e creencianan religioso dje artistanan i di esnan cu a comisioná nan, a influenciá e manera con nan a pinta Jesus.

Atrabes di siglonan, artistanan famoso, manera Michelangelo, Rembrandt i Rubens, a dedicá hopi atencion na Cristo su aparencia físico. Nan obranan, cu hopi bes tabata yen di simbolismo i misticismo, tabatin un influencia grandi riba e idea general dje aspecto di Jesus. Pero riba kico nan a basa nan interpretacionnan?

Loke Historia Seglar Ta Bisa

Hopi bes, obranan di arte cu ta data dje tempu promé cu e reinado di emperador romano Constantino, kende a biba rond di aña 280 pa 337 E.C., a presentá Jesus como un “Bon Wardadó” yong, sea cu cabei corticu of largu yen di krul. Pero tocante esaki, e buki Art Through the Ages (Arte Atrabes di Siglonan) ta bisa: “Por haña e tema dje Bon Wardadó via arte [pagano] griego arcaico bek na arte egipcio, pero aki e ta bira símbolo dje protector leal dje tou cristian.”

Cu tempu, e influencia pagano aki a bira mas fuerte ainda. E buki ta agregá: “Tabata fácil pa identificá Jesus cu e deidadnan conocí dje mundu mediteráneo, foral cu Helios (Apolo), e dios di solo [kende su krans di lus a ser duná na Jesus i despues na e “santunan”], of cu su aspecto oriental estilo romano, Sol Invictus (Solo Invicto).” Den un mausoleo descubrí bou dje basílica di San Pedro na Roma, nan a asta pinta Jesus como Apolo “manehando e cabainan dje garoshi di solo atrabes di shelu.”

Pero e forma mas hóben aki no a dura pa hopi tempu. Den su buki Christian Iconography (Iconografia Cristian), Adolphe Didron ta splica loke a sosodé: “E figura di Cristo, cu na principio tabata hóben, ta bira mas i mas bieu cu transcurso di siglo . . . segun cristianismo mes tambe ta bira mas bieu.”

Un texto di siglo 13, cu ta pretendé di ta un carta di un tal Publio Lentulo pa Senado Romano, ta duna un descripcion dje aparencia físico di Jesus. E ta bisa cu e tabatin “cabei dje matis di un hazelnoot cu falta pa hecha [maron cla] i ta lisu casi te na su oreanan, pero djei bin abou e tin krul cu ta un tiki mas scur i mas briyante cologá riba su scoudernan; su cabei ta partí meimei . . . , e tin hopi barba, dje mésun color di su cabei, no largu, pero un tiki partí na dos na su cachete; . . . wowo shinishi . . . i briyante.” E descripcion falsu aki, na su turno, a influenciá hopi artista. New Catholic Encyclopedia ta bisa: “Cada periodo a crea e tipo di Cristo cu hende tabata kier.”

Loke tabata cierto di cada periodo, a conta tambe pa rasa i religion. Arte religioso for dje camponan di misionero na Africa, continente di América i Asia, ta mustra e Cristo cabei largu estilo di Occidente; pero segun e enciclopedia, tin biaha nan a añadí “característicanan nativo” na su aparencia.

Protestantnan tambe tabatin nan artista, i esakinan tabatin nan mes interpretacion di Cristo su aparencia. Den su buki Christ and the Apostles—The Changing Forms of Religious Imagery (Cristo i e Apostelnan: Imágennan Religioso Cu Ta Cambia), F. M. Godfrey ta bisa: “E Cristo trágico di Rembrandt ta un producto dje punto di bista protestant, esta, tristu, cara halá i bleek, serio, . . . un imágen dje alma protestant abnegá i introspectivo.” Segun Godfrey, por mira esaki den “Su curpa flacu-flacu, e abnegacion di carni, e ‘humildad, solemnidad i e manera cu ta provocá lástima’ cu cua [Rembrandt] a concibí e épica cristian.”

Sin embargo, manera nos ta bai mira awor, e Cristo frágil, delicado, melancólico, cu cabei largu i krans di lus, cu hopi bes ta aparecé den arte di cristiandad, no ta cuadra cu berdad. En realidad e ta masha leu for dje Jesus di Bijbel.

Bijbel i Jesus Su Aparencia

Como “e Lamchi di Dios,” Jesus tabata sin defecto. Pues no tin duda cu e tabata un homber di bon aparencia. (Juan 1:29; Hebreonan 7:26) I ta sigur cu lo e no tabatin henter ora e mirada melancólico cu arte popular ta dun’é. Ta cierto cu durante su bida el a pasa den hopi cos angustioso, pero den su disposicion general el a duna un refleho perfecto di su Tata, “e Dios felis.”—1 Timoteo 1:11; Lucas 10:21; Hebreonan 1:3.

Jesus tabatin cabei largu? Ta nazareo so no tabatin mag di corta nan cabei ni bebe biña, pero Jesus no tabata un nazareo. Pues, no tin duda cu e tabatin su cabei nèchi cortá mescos cu cualkier otro homber hudiu. (Númeronan 6:2-7) Tambe el a disfrutá di biña na cantidad moderá ora e tabata den compania di otro hende, i esaki ta reforsá e idea cu e no tabata un persona tristu tur ora. (Lucas 7:34) Echo ta cu e mes a traha biña dor di haci un milager na un fiesta di casamentu na Cana di Galilea. (Juan 2:1-11) I evidentemente e tabatin barba, pasobra un profecia tocante su sufrimentu a papia di esei.—Isaías 50:6.

Kico di Jesus su color i forma di cara? Cu tur probabilidad nan tabata semítico. Lo el a heredá e característicanan aki di su mama, Maria, cu tabata hudiu. Maria su antepasadonan tabata hudiu, den e liña di desendencia dje hebreonan. Pues, probablemente Jesus tabatin e color i forma di cara cu ta comun pa hudiu.

Aparentemente, ni meimei di su apostelnan Jesus no a destacá como físicamente mashá diferente, pasobra ora Hudas a traicion’é den man di su enemigunan, e mester a dun’é un sunchi pa identifik’é. Esei ta nificá cu den un multitud Jesus no tabata masha riparabel. I por lo ménos na un ocasion, el a biaha for di Galilea te na Jerusalem sin cu ningun hende a reconoc’é.—Marco 14:44; Juan 7:10, 11.

Tog tin hende ta bisa cu Jesus mester tabata un homber frágil. Di con? Pa cuminsá, e tabatin mester di yudansa pa carga su staca di tormento. Tambe, dje tresnan cu tabata clabá na staca, e ta esun cu a muri promé.—Lucas 23:26; Juan 19:17, 32, 33.

Jesus No Tabata Frágil

Contrali na tradicion, Bijbel no ta describí Jesus como un homber frágil ni delicado. Mas bien, e ta bisa cu asta como hóben el “a sigui progresá den sabiduria i crecementu físico i den e fabor di Dios i di hende.” (Lucas 2:52) El a traha como carpinté pa casi 30 aña. Esei no ta parce di ta un ofishi pa un persona cu un curpa delicado of débil, foral den e tempu ei ora cu no tabatin mashin moderno cu ta facilitá trabou. (Marco 6:3) Tambe, Jesus a core cu baca, carné i trocadó di placa for dje tempel i a boltu e mesanan dje trocadónan di placa. (Juan 2:14, 15) Esaki tambe ta duna indicacion cu e tabata un persona baronil i físicamente vigoroso.

Durante e último tres aña i mei di su bida riba tera, Jesus a cana cientos di kilometer riba su biahenan di predicacion. Tog, nunca e disipelnan no a bis’é pa “sosegá un poco.” Mas bien, Jesus ta esun cu a bisa nan, algun di nan piscadó fuerte: “Boso, ban den privá, na un lugá solitario i sosegá un poco.”—Marco 6:31.

Sí, “henter e relato di evangelio,” segun Cyclopædia di M’Clintock i Strong, “ta duna indicacion [cu Jesus tabata] di bon salú físico i vigor.” Pakico anto e tabatin mester di yudansa pa carga su staca di tormento, i di con el a muri promé cu e otronan cu tabata clabá na staca huntu cuné?

Un factor clave tabata angustia extremo. Ora e dia di Jesus su ehecucion tabata acercando, el a bisa: “En berdad, mi tin un bautismo cu cua mi mester ser bautisá, i ki angustiá mi ta sinti mi te ora e ta cumplí!” (Lucas 12:50) E angustia aki a bira “agonia” riba e último anochi: “Drentando den agonia el a sigui haci oracion cu mas fervor; i su sodó a bira manera gota di sanger cu tabata cai na suela.” (Lucas 22:44) Jesus tabata sa cu e prospecto di humanidad pa haña bida eterno a dependé di su integridad te na morto. Esta un carga pisá! (Mateo 20:18, 19, 28) Tambe e tabata sa cu Dios su pueblo mes lo a bai ehecut’é como un criminal “maldicioná.” Pues, e tabata preocupá cu esaki lo por a trece reproche riba su Tata.—Galationan 3:13; Salmo 40:6, 7; Echonan 8:32.

Despues di su traicion, el a sufri di un crueldad tras di otro. Den un huicio falsu cu a tuma lugá den mardugá grandi, e funcionarionan mas haltu dje pais a ridiculis’é, scupié i dal e cu moketa. Pa duna e huicio di mardugá un aparencia di legitimidad, tabatin un otro huicio su manisé trempan. Ei, Pilato a interogá Jesus, despues Herodes tambe, kende, huntu cu su trupanan, a haci bofon di dje. Caba, Pilato a bolbe interogu’é. Finalmente, Pilato a laga sut’é. Anto esaki no tabata cualkier sota. The Journal of the American Medical Association ta bisa tocante e manera romano di suta hende:

“E instrumento usual tabata un zwiep corticu . . . cu vários faha di cueru los of di flegtu di diferente largura, na cua tabatin, cada tantu distancia, bolita di heru of pida skerpi di wesu di carné hincá. . . . Segun cu e soldánan romano tabata sigui bati e víctima den lomba cu tur nan forsa, e bolitanan di heru tabata causa daño profundo i e fahanan di cueru cu e wesunan di carné tabata corta e cueru i e tehidonan bou di cueru. Anto, segun cu e sutamentu tabata sigui, e cortánan tabata yega te na e músculonan di eskeleto eibou i tabata saca repinan di carni bibu cu ta sangra.”

Ta evidente cu Jesus su vitalidad tabata cabando hopi promé cu el a cai bou dje peso dje staca cu e tabata carga. De echo, The Journal of the American Medical Association a declará: “E abusu físico i mental di parti di hudiu i romano, como tambe falta di cuminda, awa i soño, a contribuí na su estado general débil. P’esei, asta promé cu e crucificacion mes, Jesus su condicion físico tabata por lo ménos grave i kisas crítico.”

Su Aparencia Ta Importante?

E descripcion falsu di Lentulo, e obranan maestro di artistanan famoso i e bentananan moderno cu cuadro di color pintá den glas, tur ta indicá cu cristiandad ta keda encantá cu loke ta capta e bista. E arsobispu di Turin, guardian dje controversial Mantel di Turin a bisa: “Nos mester conserbá e poder excepcionalmente evocativo dje imágen di Jesucristo.”

Sin embargo, e Palabra di Dios ta laga detayenan “evocativo” asina di Jesus su aparencia expres afó. Di con? Probablemente esei lo a kita atencion for di loke ta nificá bida eterno, esta, conocimentu bíblico. (Juan 17:3) Jesus mes, nos gran ehempel, “no ta wak aparencia exterior di hende,” cu otro palabra, e no ta considerá esei importante. (Mateo 22:16; compará cu Galationan 2:6.) Enfatisá aparencia físico di Jesus ta bai contrali na e spiritu dje Evangelionan inspirá, ya cu nan no ta haci absolutamente ningun mencion di esei. De echo, manera nos lo mira den e siguiente artículo, Jesus no tin ni sikiera e aparencia humano mas.a

[Nota]

[Plachinan na página 7]

E Cristo frágil i bleek cu artistanan den cristiandad a pinta, ta contrali na un descripcion di Jesus basá riba relatonan bíblico

[Rekonosementu]

Jesus Ta Predicá na Laman di Galilea di Gustave Doré