Kico Ta Dios Su Proposito?

HOPI hende cu ta duda cu ta existí un Dios todopoderoso i amoroso, ta puntra: Si di berdad tin un Dios, di con el a permití asina tantu sufrimentu i maldad atrabes di historia? Di con e ta permití e estado deplorabel di cosnan cu nos ta mira rond di nos awe? Di con e no ta haci algu pa trece un fin na guera, crímen, inhusticia, pobresa i otro problema cu ta escalando di manera alarmante den asina tantu pais?

Tin hende ta bisa cu Dios a crea universo, a pone hende riba planeta Tera, i despues a laga nan pa nan cuenta. Segun e punto di bista aki, no mester culpa Dios pa e problema i miseria cu hende ta trece riba nan mes debí na nan golosidad of mal maneho.

Sin embargo, otronan ta rechasá e teoria aki. Por ehempel, profesor di física, Conyers Herring, kende ta reconocé cu e ta kere den Dios, ta declará: “Mi ta nenga di aceptá e idea di un Dios cu hopi tempu pasá a pone un gran oloshi cana i for dje tempu ei a sinta man crusá mira hende kibra cabes cu e puzel. Un motibu pakico mi ta rechasá esaki ta cu mi experencia científico no ta duna mi motibu pa kere cu ta existí un modelo exacto dje universo cu ta esun finalmente i absolutamente corecto. Semper nos teorianan científico . . . lo por ser refiná mas i mas, pero mi tin sigur cu semper nan lo resultá di ta imperfecto. Segun mi cu ta mas safe pa kere den e forsa bibiente cu ta haci e mehoracion aki semper posibel.”

Dios Tin un Propósito

Dios su propósito original tabata pa hende hustu i perfecto biba riba planeta Tera. Profeta Isaías a skirbi: “Esaki ta loke Jehova a bisa, e Creador di shelu, E, e Dios berdadero, e Formador dje tera i e Hacidor di dje, E, Esun cu a establec’é firmemente, cu no a cre’é simplemente pornada, cu a form’é asta pa ser habitá.”—Isaías 45:18.

En bes di pobla e tera cu hende creá individualmente, Dios tabata kier pa hende yena e tera mediante procreacion. Ora Adam cu Eva a rebelá contra Dios, esaki no a stroba su propósito original, pero sí e mester a ahustá algun detaye pa por cumpli cu su propósito relacioná cu hende i tera.

Pa mas of ménos e promé 6.000 añanan dje periodo aki, Dios a permití humanidad operá independiente di su guia directo. Esei ta loke nos mayornan original a scoge di nan mes boluntad liber. (Génesis 3:17-19; Deuteronomio 32:4, 5) Dor di permití nan ta independiente di Dios su guia i, como consecuencia, experenciá e gobernacion di hende en bes di esun di Dios, lo a sali na cla cu hende no por dirigí su mes paso i no por goberná su próhimo cu éxito.

Claro, Jehova tabata sa di antemano cu esaki lo bai ta e resultado. El a inspirá escritornan bíblico pa skirbi esaki. Por ehempel, profeta Jeremías a skirbi: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.”—Jeremías 10:23.

E homber sabí Sálomon a comentá riba e resultadonan desastroso di ora hende ta purba dominá nan próhimo, manera nan a haci atrabes di siglonan. “Tur esaki mi a mira, i mi a dirigí mi curason na tur obra cu a haci bou di shelu, durante e tempu cu hende a dominá hende pa su perhuicio.”—Eclesiástes 8:9.

Sin embargo, leu di “sinta man crusá mira hende kibra cabes cu e puzel,” Dios Todopoderoso tabatin bon motibu pa permití e miles di añanan aki pasa sin intervení directamente den bida di mayoria hende.

El A Sirbi un Bon Propósito

E último 6.000 añanan di historia humano por parce un tempu largu ora compar’é cu e duracion promedio di nos bida cu ta ménos cu 100 aña. Pero segun Dios su orario i su punto di bista di tempu cu ta pasa, e miles di añanan aki ta manera seis dia, sí, ménos cu un siman! Apostel Pedro a splica: “No laga esun echo aki scapa boso, stimánan, cu un dia pa Jehova ta manera mil aña i mil aña ta manera un dia.”—2 Pedro 3:8.

Despues Pedro ta contrarestá cualkier acusacion di cu Dios ta negligente of ta posponé asuntunan, dor di agregá: “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu.”—2 Pedro 3:9.

Pues, ora e cantidad di aña permití terminá, e Creador lo trece un fin na e mal maneho di nos bunita planeta. Lo el a permití suficiente tempu pa hende demostrá su inabilidad di goberná of di trece un fin na guera, violencia, pobresa, malesa i otro causa di sufrimentu. E ora ei hende lo mira pa nan mes cu loke Dios a bisa for di cuminsamentu tabata berdad, esta, cu nan tin cu sigui guia divino pa nan por tin éxito.—Génesis 2:15-17.

Segun profecia bíblico cu ta cumpliendo, nos ta bibando awor den e parti final di “e último dianan” dje sistema di cosnan malbado aki. (2 Timoteo 3:1-5, 13; Mateo 24:3-14) E tempu cu Dios a tolerá maldad i sufrimentu i a permití hende goberná independiente di dje, ta yegando su fin. (Daniel 2:44) Pronto nos lo mira e tribulacion di mas grandi cu e mundu aki a yega di mira. Lo e culminá den “e guera dje gran dia di Dios e Todopoderoso,” Armagedon. (Revelacion 16:14, 16) E guera aki cu Dios mes lo dirigí, lo no destruí Dios su obra di arte, esta tera, sino lo “causa e ruina di esnan cu ta ruinando e tera.”—Revelacion 11:18.

Dios Su Reino di Mil Aña

Lo bai tin miyones di sobrebibiente riba tera ora Armagedon pasa. (Revelacion 7:9-14) E profecia na Proverbionan 2:21, 22 lo a haña su cumplimentu: “E rectonan ta esnan cu lo biba riba e tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes; i en cuanto esnan traicionero, nan lo ser rancá for di dje.”

Dios su propósito ta pa despues dje guera hustu di Armagedon, bini un periodo special di mil aña. (Revelacion 20:1-3) Esaki lo ta e Reinado di Mil Aña dje Yu di Dios, Cristo Jesus, como Rey dje Reino celestial di Dios. (Mateo 6:10) Durante e gobernacion gososo aki di Reino riba e tera, miyones i miyones di hende lo haña un resureccion for di nan soño di morto i lo uni cu e miyones di hende cu a sobrebibí Armagedon. (Echonan 24:15) Huntu nan lo bira perfecto, anto e ora ei, na fin dje Reinado di Mil Aña di Cristo, por fin e tera lo ta yená cu homber i muher perfecto, tur desendiente di Adam cu Eva. Dios su propósito lo a realisá di un manera glorioso i exitoso.

Sí, Dios su propósito ta pa “ ‘seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.’ I Esun sintá riba e trono a bisa: ‘Mira! mi ta traha tur cos nobo.’ ” (Revelacion 21:4, 5) E propósito ei lo cumpli sin falta den un futuro hopi cerca.—Isaías 14:24, 27.

[Plachi na página 5]

Den Dios su mundu nobo, hende lo biba pa semper den felicidad