Un Bon Calidad di Bida sin un Brasa of Pia

“SUBIDÓ di ceru a yega top atrobe.” Asina un korant a bisa di Tom Whittaker, kende a alcansá e top di Mount Everest. Hopi a yega di subi e ceru haltu ei, pero Tom Whittaker tabata e promé hende cu pia amputá cu a logra! Whittaker a perde su pia den un accidente di tráfico. Pero un pia artificial, un protésis, a haci posibel p’e bolbe cuminsá practicá su deporte. Aparatonan similar ta permití miles di otro hende cu amputacion disfrutá di un calidad di bida haltu. De echo, no ta straño mas pa mira hende cu amputacion core careda, hunga basket of core baiskel.

E promé versionnan di pia i man artificial tabata pida palu poco acabá i hak di heru. Mehoracion a bini dor cu gueranan a pone hopi hende keda mutilá. P’esei, no ta un sorpresa cu ta un ciruhano militar, e frances Ambroise Paré di siglo 16, a haña e mérito como esun cu a bin cu e promé berdadero protésisnan. Awendia e protésisnan tin sistemanan hidráulico, djoint di rudia sofisticá, i pia flexibel di fibra di carbon, silicon, plestik i otro productonan di alta tecnologia, cu ta pone cu hopi por cana i move mas natural i cómodo di loke hende a yega di soña. Avancenan den e tecnologia microelectrónico ta permití hende move brasa i man cu mas naturalidad. Protésis a mehorá den aparencia tambe. Brasa cu pia artificial moderno tin dede i tenchi, i algun ta asta parce di tin ader. De echo, un modelo femenino cu a perde un pia debí na cancer, a haña un protésis asina natural cu e por a sigui cu su carera den modelahe.

Actitud Mental Ta Importante

No obstante, e experto den salú mental, Ellen Winchell, ta duna e spiertamentu aki: “Ora bo pasa dor di un crísis personal, manera un amputacion, bo ta ser probá profundamente den tur aspecto di bo ser: físico, emocional, mental i spiritual.” Tuma por ehempel, William, kende a perde un pia pa via di gangrena despues di un herida. E ta bisa: “Un dje clavenan pa vence cualkier desafio den bida ta nos actitud mental. Nunca mi no a mira mi desabilidad como un desbentaha. Mas bien, mi a mantené un punto di bista positivo relacioná cu e incumbiniencianan cu mi tabatin for di tempu dje accidente.” Ellen Winchell, cu tambe tin un miembro amputá, ta di acuerdo, i ta bisa cu hende cu un punto di bista positivo tin mas chens di ahustá mihó na un pérdida di brasa of pia cu hende pesimista. Manera Bijbel ta bisa: “Un curason cu ta gososo ta bon como curadó.”—Proverbionan 17:22.

Spierta! a papia cu algun cristian cu a adaptá bon na e pérdida di un brasa of pia. Mayoria a sugerí pa hende cu amputacion evitá di ta demasiado conciente di nan mes of di no kier papia di nan desabilidad. “Lo mi sinti mi mas malu si otronan sinti cu esaki ta un dje tópiconan prohibí,” segun Dell, kende a perde su pia robes bou di su rudia. “Pa mi, esei ta haci tur hende incómodo.” Algun experto ta recomendá pa si bo a perde bo man drechi i nan cera bo conocí cu un hende, bo mester dal bai dun’é bo man robes. I si un hende puntra algu tocante bo protésis, cont’é. Si abo ta cómodo, bo ta yuda e otro persona relahá. Por lo general, un djis e combersacion lo bai riba otro tópico.

Tin “un tempu pa hari.” (Eclesiástes 3:4b) Un señora cu a perde un man ta bisa: ‘Mas cu tur cos, no perde bo sentido di humor! Semper nos tin cu corda cu nos actitud en cuanto nos mes, ta determiná hopi ki actitud hende tin pa cu nos.’

“Un Tempu pa Yora”

Na principio, ora Dell a perde su pia, el a bisa den su mes: “OK, esaki ta fin di mi bida.” Florindo i Floriano, tur dos a perde miembronan di curpa pa via di minanan di tera na Angola. Florindo ta bisa cu el a yora pa tres dia i tres anochi. Floriano tambe a bringa cu su emocionnan. E ta skirbi: “Ta 25 aña so mi tabatin. Un dia mi tabata por a haci tur cos, i e siguiente dia mi no por a ni lanta para. Mi tabata deprimí i desanimá.”

Tin “un tempu pa yora.” (Eclesiástes 3:4a) I ta masha natural pa pasa dor di un periodo di pena ora bo sufri un pérdida serio. (Compará cu Huesnan 11:37; Eclesiástes 7:1-3.) “E único manera pa libra di pena, ta pasa dor di dje,” Ellen Winchell ta skirbi. Loke ta yuda hopi ta pa expresá bo sintimentunan na un scuchadó comprensivo. (Proverbionan 12:25) Pero pena no ta sigui pa semper. Pa un tempu algun individuo lo por bira emocionalmente mas instabil, negativo, anshá of alehá for di hende despues dje trauma di perde un brasa of pia. Pero generalmente e sintimentunan aki ta mengua. Si esei no ta e caso, podisé e persona a bira clínicamente deprimí. Esaki ta un malesa cu generalmente ta rekerí intervencion médico. Miembronan di famia i amigunan lo mester ta alerto pa ripará cualkier señal di cu nan ser kerí tin mester di yudansa den e direccion aki.a

W. Mitchell, kende tur dos su pianan ta paralisá, ta skirbi: “Nos tur tin mester di hende cu ta interesá den nos. Nos por soportá casi cualkier cos si nos ta sinti nos rondoná dor di hopi amigu i famia, miéntras cu cualkier cos chikitu lo por sagudí bo si bo trata di lucha den bida bo so. I amistad no ta algu cu ta bini di mes. Bo mester haci esfuerso pa cumins’é i haci esfuerso pa manten’é, sino e ta marchitá.”—Compará cu Proverbionan 18:24.

Un Bon Calidad di Bida sin un Brasa of Pia

Apesar di nan desabilidad, hopi hende cu falta un brasa of pia a logra tin un bon calidad di bida. Russell, por ehempel, a nace cu e parti ariba so di su pia robes. Na edad di 78 aña, ainda e ta haci ehercicio regularmente i ta hiba un bida satisfaciente, aunke e ta usa un garoti awor. Di naturalesa Russell ta alegre i el a conta cu ya pa hopi tempu su nomber di cariño ta Felis.

Douglas, kende a perde un pia den Guera Mundial II, ta cana cu un protésis moderno. E ta un Testigo di Jehova, i tabatin e goso di a sirbi como pionero regular, un evangelisadó di tempu completo, pa seis aña. I bo ta corda Dell, kende a pensa cu su bida a caba ora el a perde su pia? E tambe ta hiba un bida satisfaciente como pionero, i por gana su pan di cada dia.

Pero con ta bai cu hendenan cu ta biba den paisnan pober of asotá pa guera i cu a perde brasa of pia? E Organisacion Mundial di Salú ta bisa: “E realidad awe ta cu un porcentahe chikitu so di hende cu desabilidad ta haña yudansa.” Hopi di nan tin cu usa garoti of kruk cu nan mes a traha pa por move. Tog, tin biaha por haña yudansa. Floriano i Florindo, e víctimanan di mina di tera na Angola, tur dos a haña protésis via Crus Corá Internacional i gobiernu di Suisa. Floriano ta sirbi felismente como sirbidó ministerial den e congregacion local di Testigonan di Jehova, i Florindo ta sirbi como anciano i evangelisadó di tempu completo.

Un asociacion cu ta cuida hende cu desabilidad ta expres’é bon dor di bisa: “E único hendenan hendikep ta esnan cu a perde ánimo!” Ta interesante cu Bijbel a hunga un papel importante den duna hende desabilitá ánimo. Dell ta bisa: “Siña e berdad di Bijbel miéntras cu mi tabata recuperá, a yuda mi masha hopi mes.” Russell tambe ta conta: “Semper e speransa cu mi tin basá riba Bijbel a yuda mi pasa dor di dificultad.” Ta ki speransa Bijbel ta ofrecé hende cu desabilidad?

[Notas]

[Kuadro na página 8]

Dolor Fantasma

Sensacion di brasa of pia fantasma ta referí na e sintimentu masha real cu e miembro amputá t’ei ainda. E ta e sintimentu cu hende cu tin amputacion ta haña normalmente despues di operacion, i e ta asina real cu un foyeto pa hende cu amputacion ta bisa: “Tene cuidou cu sensacion fantasma ora di lanta for di cama of stul sin bo protésis. Semper wak abou pa corda bo mes cu bo pia no t’ei.” Un pashent cu a perde tur dos pia a bai lanta para pa duna su dokter man, pero en bes di esei el a cai abou!

Un otro problema ta dolor fantasma. Esaki ta un dolor real cu nan ta sinti ta bini como si fuera dje brasa of pia amputá. E intensidad, tipo i duracion dje dolor fantasma ta varia di persona pa persona. Afortunadamente, por lo general tantu sensacion fantasma como dolor fantasma ta mengua cu tempu.

[Plachi na página 6]

Protésis moderno ta haci bida muchu mas deleitabel pa hopi hende desabilitá

[Rekonosementu]

Potret pa cortesia di RGP Prosthetics

[Plachi na página 7]

Pena ta un reaccion normal pa un pérdida serio

[Plachi na página 8]

Hopi hende desabilitá ta disfrutá di un bon calidad di bida