Ora cu Tur Desabilidad Disparcé
UN SEÑORA paralisá for di su nek bai abou a yega di bisa cu mayoria hende tin “un curpa físicamente fuerte pa un tempu” so. Ki cierto esaki ta, pasobra tardi of trempan, debilidadnan físico ta presentá cerca nos tur! P’esei por mira un aumento drástico den benta di bril, contact lens, djente falsu, aparato pa oido, pacemaker electrónico i implante pa rudia. Manera Romanonan 8:22 ta bisa, “henter e creacion ta sigui suspirá huntu i keda den dolor huntu te awor.”
P’esei, nos tur por haña consuelo den Dios su promesa pa restorá hende obediente na salú físico perfecto den un “tera nobo” hustu. (2 Pedro 3:13; Revelacion 21:3, 4) Isaías 35:5 i 6 ta bisa: “N’e tempu ei wowo di esnan ciegu lo ser habrí, i orea mes di esnan surdu lo ser habrí. . . . Esun coho lo subi mescos cu un biná, i lenga di esun muda lo sclama di alegria.”
Bijbel ta predicí cu “un multitud grandi” lo sobrebibí e destruccion dje sistema malbado aki. (Revelacion 7:9, 14; Salmo 37:10, 11, 29) No tin duda cu djis despues dje destruccion ei, esnan cu desabilidad i problema di salú serio lo experenciá un curacion instantáneo for di nan enfermedad! (Isaías 33:24) Como muestra dje curacion cu lo tuma lugá den Dios su tera nobo, Jesus a haci curacionnan similar ora e tabata riba tera. (Compará cu Marco 5:25-29; 7:33-35.) No tin palabra mes pa describí con contentu hende lo ta i e lágrimanan di goso cu nan lo drama ora hende cu amputacion tira nan protésis, kruk i rolstoel afó! Cu un curpa sano, nan lo por yuda den e asignacion cu Dios a duna pa transformá e tera den un hogar paradísico.—Lucas 23:43.
Miéntras tantu, esnan desabilitá awe tin cu lucha ainda cu nan limitacionnan. Nelson, un persona desabilitá na Cánada, ta bisa: “Ora mi cuminsá haña duele di mi mes, mi ta corda riba Jesus su palabranan na Mateo 24:13: ‘Esun cu a wanta te na fin ta esun cu lo ser salbá.’ ” Apesar di nan limitacionnan, esnan desabilitá por ta completo i sano den e sentido mas importante di tur, esta, den e sentido spiritual, dor di wanta den e fe cristian.—Santiago 1:3, 4.
Testigonan di Jehova a yuda miyones di hende haña e fe aki. Dell, e homber desabilitá citá den e artículo anterior, ta bisa: “Mi no tin palabra pa expresá con mi a sinti ora mi a haña sa cu problemanan físico manera esun di mi ta temporal so.” Sí, fortalecí dor di un speransa asina, Dell, i hopi otronan manera e, no por ser yamá hendikep.
[Plachi na página 10]
Sobrebibientenan dje binidero destruccion lo mira nan enfermedad ser curá den forma milagroso